2009年9月18日 星期五

hea爆雜思

這幾天,忙着hea...


hea...但是忙...那...怎樣hea呢?


 


朋友帶我去看冰上仙履奇緣...


妹妹教我造蛋糕,又陪我hea了幾天...


到了小學老師家作客...


到了狗場主人家玩狗狗...


親愛的和我去看黃子華棟篤笑...


自己在家hea做麵粉花,玩網上遊戲,和朋友在網上chat,打長途/情電話...


到中環吃雲吞麵,牛腩麵,蛋撻,奶茶,西多士...


今天,叔叔到來請我吃午飯,又hea了一天...


 


有一日,hea住去順寧道街市買餸......

牛肉佬:喂,你吾好食牛肉啦!


我:嘩,而家都咁啦,有得食好食,有得玩好玩啦,


  點知我仲可以玩幾耐架?


牛肉佬:你吾好咁講啦!你咁講,我好心翕架!我要


    年年都見到你架!


然後,他收了我廿元,切了很多很多的牛肉給我,大概有四十元吧...


 





無論是家人,朋友,同事,就是萍水相逢的,都很關心我,令我覺得很感動!


更有從未有緣見面的blog友,願意在我入院時,免費供應一日三餐...


 


我知道有朋友為我要闖過一關之後又要跨一欄而感到難過...


其實,我並不覺得我自己有多慘情...


我想,這是因為我是甘心的!


進行八次化療時:捱過了就會好,無死啦!


乳癌手術後,個'鬆'細左:都仲有d剩...


三十多次的電療:一大早完成電療,可以到山頂,香港公園,動植物公園,海洋公園逛!


因為擬似良性瘤要開刀,躺在手術床上待宰時,我跟自己說:暑假去了歐洲,玩過了!我很甘心!


手術後,手上有八個孔三條喉一個手指夾加一個呼吸器時:開完刀了,醒來了比醒不過來好!


醫生說我的病情有點複雜:應該都仲可以擺多陣啩?無咁快死呀?


要開多刀:我張海洋公園全年入場證又可以用多幾次!(趁住病假可以去多幾次!)


開多刀之後,吾知會仲有咩野手尾跟:到時先算啦!不要預支明日的煩惱(愉臨教我的!)


 


縱然死神一次又一次走近,我也不大怕,因為有更多與死神更接近,坐在握手位的同路人,我的情況,真是小兒科!


 


我,不大怕死...即是有點怕,但不是太怕...死神來了,但願我能戰戰兢兢地跟他說聲hi吧!


不大怕,是因為我覺得自己真的沒有什麼好怨的,我享受了豐足的三十多年(雖然大家都以為我只有廿幾歲...),學喜歡學的,做喜歡做的,吃喜歡吃的,玩喜歡玩的,到過我喜歡到的,結交我喜歡結交的...大概,這就是活在當下真正實行版吧!


我常替兒童病房的小朋友可惜,小小年紀,就要承受成人都難以負擔的痛苦,每次一想到,一方面無限唏噓,另一方面,又悄悄慶幸自己好歹都叫做精彩了這麼多年...


我並不是一個虔誠的天主教徒,但我相信,天主自有祂的安排,我從無求過祂徹去我的苦杯,如果祂要我背起這個十字架,我絕無怨言,我相信天主的安排,自有衪的用意...通過我,有否為你帶來什麼新的思維呢?


不用為我難過,我很好,也希望你們可以好好享受生命,想學想做想玩想吃想到想結交的,go ahead! 就是明天再有天大的事發生,也要甘心!


對於我,生命,從來不論長短,只有精彩斑斕充實與否!


朋友,共勉之!


當然,我還沒玩夠...神啊!請你給我多一點時間!PS:如果可以膽拖不勞而穫就更好...


2009年9月4日 星期五

原來,可能可以仲差


上回說到......


 


醫生:子宮瘤九成九都係良性,幾年都無一個惡性


   既,你吾洗擔心啦!


我:(吾會咁好彩呀?幾年一個都比我中?


  但...我又真係超級黑仔王喎!)


 






姑娘:其實,個報告都吾係咁差啫!


 


究竟,有幾吾差呢?原來,可能可以仲差...


 


今早見醫生,係後生靚女醫生蒞...


我:醫生,要吾要攞定紙巾出蒞先呀?


醫生:吓...(吾識答)


 


然後,講左一輪個手術好順利之類(因為好難開口),入正題嘞...又有一個老成d既男醫生入埋蒞,係內科既...


 


醫生:同你檢驗過d細胞,好擲界,因為d細胞好


   活躍,個瘤大得好快,我地都介定吾到算吾


   算係惡性腫瘤,我都噚過晒d外國文獻架啦


   (吓?咁嚴重?),但係因為好少見,有


   多未知數,而家都係傾向係良性既...


我:咁香港多吾多病例呀?


醫生:香港好少,有幾單囉(吾怪之得之前醫生話


   幾年都無一個啦!),其實外國都好少架,


   由於患者都超過四十歲,所以全部都係連子


   宮切除後至化驗到,而你就保留子宮,所以


   會吾會病變,會點變,幾時變,變成點,快


   吾快,都吾知架!


我:因為未有數據作研究?


醫生:係!(即係,我係史上第一人?)


 


又經過一輪討論之後,結論係...


1. 其實醫生都吾知咩野事,所以吾識醫


2. 選擇一:由得佢,做白老鼠,可能有事,可能無


3. 選擇二:馬上把子宮切除,免除後患


4. 我諗左三秒,決定把子宮切除


5. 醫生安排我10月22日再開一刀


6. 婦科內科要同腫瘤科開會,才決定個手術點做


7. 切除子宮後再化驗,若發現有惡性細胞,可能要


 進行其他治療,即係化療電療之類啦!(所以我


 話可能可以仲差,就係咁解嘞!)


8. 9月尾覆診腫瘤科時,再同醫生商量下


 


 


吾感想一


又開一刀,又要過一關,又要跨多個欄...喂,我以為我係跑百一米欄喎,點知,係四百米欄,早d講ar,真係,劉翔都要抖抖啦!


 


吾感想二


原來,我係咁獨特,睇蒞,可以申請入住海洋公園熊貓館,因為,我都好罕有架!


2009年9月3日 星期四

案件重演?

去年在廣華醫院做完檢查後...


醫生:睇片同各項報告,加埋剛才既檢查,你個


   瘤,應該係良性既,吾洗擔心啦!如果無


   接到電話,你下個星期攞住張入院紙入院,


   幫你割左佢啦!


即係話,接到電話,就大鑊啦!


點知,過左兩日,真係接到電話...


當日放學後,開小差去看中醫,然後搭的士回校時,電話響起...


姑娘:你吾洗入院啦,聽日返蒞見醫生,聽報告啦!


我:咁...即係點呀?


姑娘:m...見醫生時,醫生會講啦!到時見啦!


當時情境,依然瀝瀝在目...


結果,醫生話,個瘤係惡性既,即係癌症!


 


上兩星期,入院切除子宮瘤後...


醫生:子宮瘤九成九都係良性,幾年都無一個惡性


   既,你吾洗擔心啦!病理報告大約兩個星期


   左右會出,無特別既都吾會打比你架啦!你


   跟返十月二十日覆診就得啦!


我:(吾係咁好彩呀?幾年一個都比我中?


  但...我又真係超級黑仔王喎!)


d台詞,係咪好相似呢?


故事發展,都好相似噃!


因為,我今早,又收到電話...


又係姑娘:你聽日早上九時半左右返蒞病房見醫生啦!


我:吓!咁大鑊?(d台詞,又係咁熟口熟面既?)


都係姑娘:其實,個報告都吾係咁差啫!


我:(咁...即係仲有幾耐呀?)哦!


 


欲知後事如何,要睇下我千日有無心情同大家報告...


2009年9月2日 星期三

six feet under vs a cube feet

幾年前,英國電視劇<六尺風雲>(Six Feet Under)講述人死後的種種;


當時,我一面追看,一面暗暗決定,他日若有什麼山高水低時,一切從簡----也不用什麼葬禮山墳,我也會一路好走;只要草草化掉後,水裏去也可,火裏去也成,既環保,又省錢----當然,帛金最好在我在世時能預繳,那麼我就可以有份用了...


我相信我走後,也會活在心中有我的人的心裏,山墳墓地骨灰龕,只是儀式習俗文化習慣罷了!


這只是我個人的想法...


他人的想法,我絕對尊重!


因此,縱然我是天主教徒,但我也安排我媽安放在道觀內,因為,我愛我媽,我尊重她的意願


因此,親愛的的媽媽希望他日能安身於青松觀內,我也絕對支持,因為我愛我身邊的人,也愛他的親人


親愛的預留了兩天假期,為奶奶通宵輪候青松仙苑的骨灰龕


本來是先到得的形式發售,但卻在發放第一次籌號後,臨時宣佈要以抽籤形式發售


 


結果,我們在中國的鬼節露宿街頭


結果,我們在酷熱天氣警告下守候


因為我們相信香港是有公理公道的地方


但到頭來,卻一場喜歡一場空,一場不守遊戲規則的一場夢


 


懷着信心,無言地等,伴我是青天酷日無雲,誰料到天色不及人那麼狠,像鐵般不仁


  


...好像尚欠一個兜,就可以賺外快了...


 


比天價的凱旋門豪宅更天價,一立方尺的價值由五萬至廿萬,我們,真的貼錢買難受;問題是,竟日竟夜地排隊,把錢送到門口,對方也不願收......自我感覺極差----折墮可憐乞求......


  


 


  


結論是,真的不值讓這一班狼子野心的修道之人賺取暴利......奈何,這是老人家的意願,我們,只有支持到底...


結論是,民主黨的議員在初期未及詢問我們的意見,就請纓為我們爭取了抽籤的方法----我們全不知情,真係多得佢地吾少!之後,全程做了縮短烏龜,同樣欠我們一個交代!


反之,民建聯的區議員陳文華,親身到來了解事件,與青松觀方面交涉,為我們登記資料,去信有關部門----雖然最終未能有顯見的成果,但我已認為他已交足功課!