我的 BRCA2

去年8月，小妹被遺傳科的醫生告知我的DNA中，第13條染色體上BRCA2的基因突變。

即是小妹的乳癌成因是遺傳。

小妹在40歲以前便發病，因此日後復發機會也較高。

在可見的日子，將有很大的機會患上卵巢癌(比一般人高50倍)，或可能再次患上乳癌，也很大機會患上淋巴癌、黑色素瘤、胰臟癌、膽囊癌、膽管癌和胃癌。

結論是，我是高危病人。

醫生提出幾個建議........

A餐：切去雙乳，保命，但影響外觀

B餐：切去卵巢，保命，但馬上進入更年期，比別人快十倍老去(卵巢的作用，除了製造女性荷爾蒙，保青春外，還可以保護心臟)

C餐：觀察，每半年照一次造影或磁力共振，每次食一百五十張肺片的輻射，即大約每日照肺一次=='，直到四十五歲，到時仍要再食A餐或B餐

又是人生交叉點，很難選擇呢！

選錯了，會死人啊！

當時，用了3秒鐘決定食C餐。

然後被抽十幾筒血。

然後當天立即約朋友到黃金海岸吃高茶。

美女廚房，食咗至講

然後又是密集的覆診。

然後發現卵巢真的有異常。

然後要提早4年入院吃B餐(好鳥！不用煩惱選A餐或B餐鳥！)。

然後到了今天......

仍然健在......

仍然受到死亡威脅......

仍然密集地覆診抽血食輻射......

仍然吃喝......

仍然玩樂......

仍然Heatilization......

Cheers^^

滿清十大酷刑

12月尾到廣華覆診時，醫生話我左面個'鬆'好似或者有機會希望吾係有問題，所以安排左我早ｄ做乳房造影．．．

 

今日，死期到．．．

 

同事：你今日覆診呀？見吾見到靚仔醫生架？

我：今日只得姑娘，仲要係滿清十大酷刑覆診法！

同事：吓？

我：首先，將個'鬆'放上枱（Ｘ光枱），然後，用兩塊透明膠板夾'實'，要'實'到就蒞爆但又未爆之間（嘩！好玄呀！），跟住同你影相（照死光）．．．如果我痛到暈左，姑娘會水潑醒我，或者摑醒我囉！

同事：痴線！

我：真係好鬼死痛架！呀！吾想去覆診呀！

 

咁，當然，時辰到，我都係死死地氣準時到醫院報到啦！

 

見到張姑娘．．．

我：張姑娘！

張姑娘：Hi!

親愛的：（剛剛行入蒞）張姑娘！

張姑娘：呀！又係你呀！（即係認得親愛的）

我：而家都仲係，遲ｄ睇下有無得換啦！

張姑娘：（你隻衰野ar！）

 

等左好耐，姑娘做低左四五個之後，到我啦！

 

先係右面，然後左面；跟住右側面，左側面；再蒞多個上面．．．我張張都交足貨架，我有對鏡頭笑架！

影完著好衫到外面等．．．

等左一陣．．．

姑娘：小黃菊，你要加照呀！入蒞除衫啦！

我：吓？咁大鑊？點解呀？

姑娘：ｍ．．．照到你有鈣化點呀，不過好多人都有囉．．．

 

即時諗：鈣化點．．．即係有異常，有腫瘤，好似仲要係惡性先會出現鈣化點．．．定係個'鬆'生左隻牙呀？咁，今年無去荷蘭睇花展，出年會吾會無機會呀？咁係咪要辭工呀？玩下先再落場得吾得呀？係咪又要化療呀？有無第二ｄ揀呀？又跨欄？咩原來有千五米欄架？

 

除衫，再照幾張，著番衫後，姑娘話要再照多幾張，又要除衫．．．

 

總共照左十九幾張．．．

 

出到去．．．

姑娘：（打開門）你吾走得住喎，醫生send左野蒞叫你去照埋超聲波喎！

我：吓，我十二月尾先照完喎，又照（咁抵？）？

姑娘：係呀，你坐低等一陣啦！

 

一回頭，親愛的已經喊緊．．．

我：（嘩！會吾會開心得早左小小呀？咁快想換老婆？）ｍ．．．都未有事．．．照埋睇下點先啦！（er.......到底係邊個有事呀？仲要我安慰佢，以後吾帶佢蒞啦！）

 

照超聲波時，個女醫生照左好耐，跟住仲要加多個年紀大好多，好似好有經驗既醫生．．．總之又照左好耐啦！

 

著衫時．．．

我：咁，係咪跟返覆診時間呀？

姑娘：係呀！

我：有問題既話會收到電話？

姑娘：係呀！

我：兩個星期左右？

姑娘：係呀！

 

又等電話，又等個電話吾好響起．．．

 

等電話

現在，除了每天在家休養外（真係吾係好夠精神出街．．．），就是在家等電話．．．

 

正確地說，是等電話不要響起來．．．很矛盾！

 

事緣手術後兩星期（即是這星期）會有病理報告，昨天剛好兩星期；如果報告無大礙，醫院不會打電話來；如果報告有問題，便要召我回去．．．

 

今次，要過兩關：

第一關子宮病變情況；

第二關卵巢水瘤是良性抑或惡性

 

因此，現在每天都在等電話不要響起．．．

 

　　看見入院的相片，好像已經是很遙遠的事（我真是一個善忘的人），真的不知道自己是怎樣走過來的；走得過，忘記得快，也是好事！

 

　　親愛的取笑我，差一點就要拖旅行筴入院了！

　　

 

　　主診醫生成日問，呢隻咩野蒞架？嗰隻又叫咩名？每次，都有姑娘代答．．．

 

　　藍豆種在手上足足十日，差點兒就真的可以生根發芽！由於抗生素破損性很強，打入血管時很痛，多打幾次會令血管蔽塞，令手臂肌肉又紅又腫又痛，要另找地方再種豆；結果，十日內種了三次；　

 

　　兩種抗生素，鹽水，葡萄糖水，無晒位！　

　　

 

　　呢支最勁，要用鹽水溝淡先打，但都打到好痛

　　

 

　　這一個是最後一個藍豆；醫生找來找去也找不到位置種豆，於是，我介紹這個熱門之選給她，結果可以一擊即中！

　　

我：醫生，你好叻呀！一次就搞掂！

靚女醫生：嘩！你介紹架喎！

我：我介紹都要你手勢好先可以一擊即中喎！

靚女醫生：你成日種吾到架咩？

我：都吾係既，最高紀錄都係連種四次啫，我都未

　　叫，我ｄ同房見到已經代我'雪雪'聲勒！

靚女醫生：咁就祝你好運，吾洗再種啦！

 

 

　　一日要抽幾次血，有時要在打抗生素前抽一支，打完後再抽一支．．．抽血抽到隻手無晒位，成手都係窿，有時要在腳上抽，抽完右腳，抽左腳，要抽右腳．．．所以我一見抽血姑娘入來時．．．

我：姑娘，你認錯人啦！

姑娘：（打個突）無認錯，係你啦！我認得你！

我：（弊！比人點左相添！）

 

　　　　　可以上下網，都無咁悶！

　　

 

　　團餐都算係咁啦！有中餐西餐揀，仲有甜品食，我真係好需要苦中一點甜！

　　

　

　　

　

　　

 

　　　　　　　　　仲有下午茶

　　

 

 

　　　　　　　日望．．．

　　

 

　　　　　　　夜望．．．

　　

 

　　　　　　　　都係望返歸．．．　

　　

 

　　可能我的命數是不適合太富貴，看過幾次私家醫生都被誤診為良性腫瘤，真是差一點就要了我的命；

　　在確診癌症，至現在子宮病變，我都是在公立醫院接受治療；我慶幸自己遇到的都是有經驗又盡責的好醫生，就是未有豐富經驗的年輕醫生，也會多次徵詢顧問醫生的意見才定奪；今次的主診醫生更是一個和善有禮的顧問醫生，談笑之間，就已經救了我一命，令我非常感激！

 

　　希望醫生們護士們都可以得到病人的信任，工作開開心心，順順利利．．．最好忘記我，吾好打電話比我．．．

 

十日精華遊

這一年來，多次留院，但覺得今次最為凶險．．．

 

Day 1 早：好人好姐咁入院

　　　午：開始發燒

　　　晚：開始禁食，成晚瞓吾到

 

Day 2 早：越來越燒，晨早醫生來看我，決定比我做

　　　　　手術，十點半入手術室，麻醉科醫生又攪

　　　　　一輪，最後都決定比我做手術，真係個個

　　　　　都咁藝高膽大！

　　　午：四點鐘推出手術室（通常呢ｄ手術都只係

　　　　　做個零兩個鐘，今次做左五個幾

　　　　　鐘．．．），都係成身都係喉啦！

　　　晚：外科醫生見我，告知手術情況：

　　　　　好在你有做到手術，因為開左肚先知你卵

　　　　　巢有水瘤，仲穿左，ｄ水滲左落個肚度

　　　　（即係遲左會有奪命腹膜炎啦！）所以你先

　　　　　會發燒（咁好彩？），已經幫你割左ｄ

　　　　　瘤，同洗左肚（洗肚？有無落洗潔精　　

　　　　　呀？）；水瘤通常都係良性既（良性．．

　　　　　．呢句咁熟既？好似比人呃左幾次

　　　　　啦．．．）

　　　　　成晚都發燒，瞓吾到

 

Day 3 早午：開始可以飲水同飲米水；

　　　　　　開始越燒越高，過左三十九度，全日有

　　　　　　四五六個吾同科既醫生來看我，聽肺按

　　　　　　肚看傷口抽血，都話無大問題；

　　　　　　開始打抗生素；

　　　　　　可以落床坐，但未行到

　　　晚：都係瞓吾到，眼光光到天光；

 

Day 4 開始可以行到幾步．．．去廁所，兩人一房，

　　　房內有廁所，好近；

　　　燒過左四十度，　　　

　　　又係一日有四五六個醫生蒞睇；

　　　可以開始食粥，但成日都食吾到半碗粥，本來

　　　已經拔走左ｄ鹽水同葡萄糖水，又要吊返；

　　　開始肚瀉，醫生有兩個懷疑，一，對抗生素敏

　　　感；二，個肚有菌；因此，無比藥我食，要睇

　　　下瀉成點；結果，係一日十幾次，一晚又係十

　　　幾次；

　　　半夜姑娘ｃａｌｌ左醫生蒞睇我；

　　　成晚成個火爐咁，再一次發覺自己條命原來從

　　　來都不在我手，好無助，無野可以做，安慰

　　　自己吾擔心得咁多，但食左安眠藥都瞓吾到；

　　　開始審視自己情況，有幾個可能性：

　　　1. 吊完抗生素，退燒，出院

　　　2. 要轉隻勁ｄ既抗生素

　　　3. 高燒昏迷，神志不清

　　　4. 染上流感，來不及吃特敏福

　　　5. 最差情況，都無行先一步，後事一早交代晒

 

Day 5 全日燒，徘徊四十度左右，食左退燒藥都退吾

　　　到小小燒；

　　　醫生同我轉左隻勁ｄ既抗生素；

　　　一日抽幾次血，驗肝功能腎指數鉀含量；

　　　照左超聲波，無腎炎，個肚無積血，都算係好

　　　消息；

　　　食左止瀉藥已經無瀉咁多，但都仲係瞓吾到

 

Day 6 開始退燒，即係全日都係三十九度左右

　　　主診醫生話：無咩大問題既，轉左抗生素都

　　　幾好，叫你先生買多幾本八卦雜誌，住多幾

　　　日，打多幾針就好架啦！

　　　下午，情緒有ｄ失控，血壓又升心跳又標，好

　　　似有大石壓住心口咁，又比ｄ醫生護士問多兩

　　　問，喊左出蒞，結果ｄ護士群起圍住蒞安慰

　　　我；轉左更，ｄ新一更既姑娘又輪流入蒞安慰

　　　我，叫我吾洗擔心

　　　開始食到半碗粥．．．全日加埋．．．

 

Day 7 燒下退下，開始食飯，全日加埋都食到半碗飯

 

Day 8 主診放完週末返蒞：等我睇下邊個悶到喊先！

　　　都係燒下退下咁．．．

 

Day 9 退左好多，燒下退下，徘徊三十七度五左右

 

Day 10 主診醫生：再吾放你走你就偏晒嘴，下午打多

　　　　　　　　支抗生素啦！已經偷雞打少左一支

　　　　　　　　啦！今日黃昏時無燒就比你走啦！

 

歸家磅一磅，又吾見十幾磅．．．又一次入院減肥法，成功！

 

以前入院，覺得自己會捱得過既，捱得過，就會好；都曾經試過連續五日高燒不退，白血球跌至0.6(正常介乎4至11)，又是吊了幾天抗生素都退吾到燒，仲要入隔離病房，當時，都徬徨，也無助，但心底裏隱然覺得，我會好得返；今次，覺得要捱得過，吾係咁易；但終歸，都捱過左了！

 

現在，等待報告中．．．等醫生告訴我，我還有多久．．．希望可以過幾年安穩日子啦！真係病到好厭啦！

 

亦都希望出左事既朋友都可以好似我咁，大大步，攬過去，捱得過，就會有好日子等我地架啦！

放虎歸山......

終於都退燒出院啦! 剛剛回到家, 謝謝大家關心!

手術後,高燒不退中...

星期一是重陽節，也是我入院的日子

早上入院時都算無甚大礙，豈料，下午開始發起燒來

未做手術就發燒，第一件事就想，點會咁架？邊度惹返蒞架？會吾會做吾到手術架？

到左星期二，都仲係燒，但醫生都決定比我做手術

去到手術室，又要過麻醉師嗰一關，擾攘一輪，都係可以繼續．．．

十點半入手術室，四點鐘至倒返出蒞．．．

外科醫生同我講，好在你有開刀，因為開左刀先發現兩面卵巢都有水瘤，有一個仲穿埋添，所以未開刀就發燒；已經為我切除子宮同水瘤，而Ｄ水瘤多數都係良性既，又同我輸左兩包血，仲洗埋肚．．．

手術後既ＤＡＹ１，成日都迷迷糊糊；ＤＡＹ２，因為發高燒（燒到４０．５度！），個人無氣無力無精神；今日ＤＡＹ３，仲有燒，但感覺就好好多

晏Ｄ醫生安排我去照下個肚仔，睇下係咪其他原因而高燒不退．．．

待宰的生活多姿彩

本來，今天是入屠房的日子，但醫院內有太多待屠的小羔羊，所以安排了我下星期一才入院，星期二才進屠房，因此，我又可以多玩幾天．．．

 

昨天校長見到我出現在校園時．．．

校長：你仲喺度既？

我：（嘩！咁大吉利是呀？我梗係仲喺度啦！）我

　　要下星期才入院

校長：加油呀！對你有信心！

我：（算你啦！）一定會！

 

入院前一星期，往往是很忙碌的，因為，要喪食喪玩喪ｈｅａ．．．

 

當然，仲要交低ｄ身後事啦．．．即係ｄ工作．．．

 

我一天的行程如下：

0530　起床（農夫梗係要早ｄ起身），玩網上遊戲，

　　　準備午餐，吃早餐

0700　出門上班去

0800　開始工作

　　　每天都飲狗場主人的茶，因為自己懶得動手泡

　　

 

　　每堂都利用它指生晒！

　　

 

1230　和學生共進午餐　　

差不多每天都吃沙律，有時加欖油和黑醋，有時加凱撒沙律汁．．．日日食，都好悶下．．．

　　

 

1600　放學，留堂改簿備課，直至頂吾順要返歸．．．

一面改簿，一面巡視業務．．．將來，我可能係飲食界巨子．．．

　　

 

1800　一般已經離開學校，可能去吃飯，買餸，

　　　濕平．．．

 

1900　吃飯－－－－可能在家，可能在街

　　　這些天，都外出大吃大喝．．．　　

　　

　　

　　

 

2000　用電腦，看電視，改簿．．．

2130　上床覺覺豬

 

復課後的生活，大概都是如此．．．

當然，有時要趕功夫，有時吾乖（用電腦，看電視），會晚一點才豬豬

　

還有幾天的太平日子，之後，日子應該更加太平．．．

日間診所半日遊

昨日到女皇醫院作手術前檢查，包括見醫生，見麻醉科，照肺，抽血，磅重，量血壓．．．．．．

 

首先，是見醫生．．．一位很友善很有經驗的醫生，是一位consultant

可能我的情況有點複雜，所以見醫生的時間頗長－－－－個多小時，我從未試過可以見那麼久－－－－無論是私家醫生或政府醫生．．．

入到醫生房，醫生在'摷'我的紀錄，因為頗多所以頗亂，因而花了一點時間．．．終於，我忍吾住．．．

我：醫生，我仲救吾救得返呀？

醫生：吓．．．（停左手）哎呀，你吾好咁講啦！

　　　（然後繼續'摷'野）

 

然後，醫生解釋有關和腫瘤科開會後的決定．．．決定比返我決定．．．

其實，是有ＡＢＣ餐任我選，各有利弊，因此令我頗為猶疑

最後，我決定到最後才決定－－－－即是手術前才決定，好讓我多問一兩位醫生的意見

 

然後，是檢查肚仔，醫生放一隻手在我的肚皮上，另一隻手在上面敲，敲得'洞洞'聲，好似揀西瓜咁．．．真係想問下佢有無起沙．．．

醫生：ｄ位都好鬆，你剛剛開過肚，ｄ野（即係ｄ

　　　大腸小腸子宮卵巢同膀胱．．．）都吾係黏

　　　得好實，手術吾難做既！

 

然後，要簽幾份幾頁紙的生死狀，是有關手術風險，包括胸肺感染，中風，心臟病發，在麻醉期間或之後死亡，神經受損，癱瘓，失明，皮膚潰瘍．．．睇完，真係想走．．．

醫生：呢份你上次簽過架啦？（一年開三刀，有咩未簽過ａｒ？）另外呢份就同上次嗰份吾同既．．．

我：哦！

 

交還姑娘時．．．

我：姑娘，呢份簽左係咪比返你就得架啦？

姑娘：睇左嗱？簽左比返我啦，要吾要我印返份

　　　比你呀？

我：吾洗啦，呢ｄ野，越睇越驚，仲印一份比我？

　　我驚我瞓吾着喎！我正話都係恰埋眼簽左佢咋！

姑娘：咁（你隻衰野ａｒ！）．．．你都要知既！

我：知架啦！（知吾知都係咁架啦！）

 

然後，到另一樓層見麻醉科醫生．．．

姑娘：同你量一量血壓先．．．下壓幾高噃，你平

　　　時係咪咁架？

我：剛剛見完醫生，見到好激呀！血壓高，都係正

　　常既！

姑娘：咁．．．一陣間同你再量過啦！

 

然後，仲要抽血照肺．．．點解吾洗照心電圖既？吾係漏左呀？

 

結果，日間診所樓高六層，我們到了二三四五六樓，尚欠一樓，下次啦．．．．．．應該無下次架啦！

 

原來，可能可以仲差

上回說到．．．．．．

 

醫生：子宮瘤九成九都係良性，幾年都無一個惡性

　　　既，你吾洗擔心啦！

我：（吾會咁好彩呀？幾年一個都比我中？

　　但．．．我又真係超級黑仔王喎！）

 

姑娘：其實，個報告都吾係咁差啫！

 

究竟，有幾吾差呢？原來，可能可以仲差．．．

 

今早見醫生，係後生靚女醫生蒞．．．

我：醫生，要吾要攞定紙巾出蒞先呀？

醫生：吓．．．（吾識答）

 

然後，講左一輪個手術好順利之類（因為好難開口），入正題嘞．．．又有一個老成ｄ既男醫生入埋蒞，係內科既．．．

 

醫生：同你檢驗過ｄ細胞，好擲界，因為ｄ細胞好

　　　活躍，個瘤大得好快，我地都介定吾到算吾

　　　算係惡性腫瘤，我都噚過晒ｄ外國文獻架啦

　　　（吓？咁嚴重？），但係因為好少見，有好

　　　多未知數，而家都係傾向係良性既．．．

我：咁香港多吾多病例呀？

醫生：香港好少，有幾單囉（吾怪之得之前醫生話

　　　幾年都無一個啦！），其實外國都好少架，

　　　由於患者都超過四十歲，所以全部都係連子

　　　宮切除後至化驗到，而你就保留子宮，所以

　　　會吾會病變，會點變，幾時變，變成點，快

　　　吾快，都吾知架！

我：因為未有數據作研究？

醫生：係！（即係，我係史上第一人？）

 

又經過一輪討論之後，結論係．．．

1. 其實醫生都吾知咩野事，所以吾識醫

2. 選擇一：由得佢，做白老鼠，可能有事，可能無

3. 選擇二：馬上把子宮切除，免除後患

4. 我諗左三秒，決定把子宮切除

5. 醫生安排我１０月２２日再開一刀

6. 婦科內科要同腫瘤科開會，才決定個手術點做

7. 切除子宮後再化驗，若發現有惡性細胞，可能要

　進行其他治療，即係化療電療之類啦！（所以我

　話可能可以仲差，就係咁解嘞！）

8. ９月尾覆診腫瘤科時，再同醫生商量下

 

 

吾感想一

又開一刀，又要過一關，又要跨多個欄．．．喂，我以為我係跑百一米欄喎，點知，係四百米欄，早ｄ講ａｒ，真係，劉翔都要抖抖啦！

 

吾感想二

原來，我係咁獨特，睇蒞，可以申請入住海洋公園熊貓館，因為，我都好罕有架！

案件重演？

去年在廣華醫院做完檢查後．．．

醫生：睇片同各項報告，加埋剛才既檢查，你個

　　　瘤，應該係良性既，吾洗擔心啦！如果無

　　　接到電話，你下個星期攞住張入院紙入院，

　　　幫你割左佢啦！

即係話，接到電話，就大鑊啦！

點知，過左兩日，真係接到電話．．．

當日放學後，開小差去看中醫，然後搭的士回校時，電話響起．．．

姑娘：你吾洗入院啦，聽日返蒞見醫生，聽報告啦！

我：咁．．．即係點呀？

姑娘：ｍ．．．見醫生時，醫生會講啦！到時見啦！

當時情境，依然瀝瀝在目．．．

結果，醫生話，個瘤係惡性既，即係癌症！

 

上兩星期，入院切除子宮瘤後．．．

醫生：子宮瘤九成九都係良性，幾年都無一個惡性

　　　既，你吾洗擔心啦！病理報告大約兩個星期

　　　左右會出，無特別既都吾會打比你架啦！你

　　　跟返十月二十日覆診就得啦！

我：（吾係咁好彩呀？幾年一個都比我中？

　　但．．．我又真係超級黑仔王喎！）

ｄ台詞，係咪好相似呢？

故事發展，都好相似噃！

因為，我今早，又收到電話．．．

又係姑娘：你聽日早上九時半左右返蒞病房見醫生啦！

我：吓！咁大鑊？（ｄ台詞，又係咁熟口熟面既？）

都係姑娘：其實，個報告都吾係咁差啫！

我：（咁．．．即係仲有幾耐呀？）哦！

 

欲知後事如何，要睇下我千日有無心情同大家報告．．．

英國女皇醫院之旅．．．進行曲

由於子宮瘤又多又大，所以未能做微創，要開大刀．．．

大概，開大刀手術的過程，都是相類似的吧！

 

日期	做了什麼	身體狀況	吃苦度	感想
17/8 MON	手術前驗身: 照心電圖 照肺 抽血 驗小便 放大便 開始注射第一劑抗生素 午夜後禁食	行得走得食得瞓得玩得		待宰
18/8 TUE	早上十時,開肚手術 晚上可以飲少許水	下午一時甦醒; 成身喉管,似科學怪人;   手背上有兩粒藍豆; 手指上夾有生命監測儀; 鼻孔連有呼吸器, 加上止痛氣 其後要多插一條尿喉; 成日都昏昏欲睡		躺在手術床上想：幸好暑假是去了玩, 這些苦頭, 我吃得起, 吃得甘心；每每感到辛苦時，安慰自己：暑假去了英國法國台灣，吃喝玩樂也真夠了，要甘心了！
19/8 WED	拆去呼吸器和生命監測儀; 學習坐立 下午可以開始喝米水	在姑娘的幫忙下，坐在椅子上好幾個小時；晚上家人來到，扶我走了幾步
20/8 THUR	下午可以開始吃粥 拆去尿喉 學習走路	小心地走路
21/8 FRI	下午可以開始吃飯 學習起床和走路
22/8 SAT	學習起床 可以出院			出院回家的路上，很辛苦，頭昏腦脹，呼吸不暢順，終於知道什麼是元氣大傷
23/8 SUN	守家待好			在家多走幾步也是頭昏昏的
24/8 MON	妹妹開車來接我去外面吃午餐			多走了幾步路，很辛苦，頭昏腦脹，呼吸不暢順，但可以外出，仍然很高興
25/8 TUE	守家待好			一天比一天好
今天 WED	早上自行開車和親愛的去了吃荼			希望可以盡快好起來

 

 

　　出院時，換回一手的針孔，又黑又紫的，像被虐打一樣 　　

　　

 

原本藍豆是種在手背的，共有兩個，一個吊鹽水，另一個吊抗生素，但因為兩位豆都走位了，不得不另種豆豆．．．．．

　　

 

 

結果種到上手臂，由於一天要量好幾次血壓，而我的右手又不能量血壓，因此每次量血壓時，都怕豆豆因壓迫而 像暗器一樣飛射而出．．．