一般人聽到化療，即刻想起
1. 無頭髮
2. 嘔
比較起其他痛苦，無頭髮，其實真係好小好小好小事
小事還小事，開始丟頭髮時，真係不無感慨
打完第一針無耐，洗頭時，頭髮一大撮一大撮咁丟落，成個浴缸都係，沖晒去去水口度，最後，要麻煩親愛的幫我執手尾－－－－因為都真係幾吾開心，仲要自己親手掉落垃圾桶．．．．．．
其他毛髮，都要好小心－－－－好似眉毛咁
洗面時，要輕輕力，生怕眼眉毛眼捷毛會掉下來
但係幾小心都好，都已經掉下不小
一向都吾會畫眉，因為條眉都吾可以好嫵媚，但都叫做有野睇下啦！
而家，似有還無咁，吾畫，吾係好得......
其實畫左都吾係好得，因為我吾係好識畫，所以會出現邊高邊低，邊濃邊稀，邊粗邊幼既情況......
有時，仲要似黃小虎添......
要努力d先得啦！
今次吾係包戲院既場，係包游泳池既場
打完針既第三四日，就算勁打ｗｉｉ ｆｉｔ之後，都瞓吾到，前兩日仲要食安眠藥添（但食左都無瞓得吾好呀！），因此，昨日去左妹妹家既會所游水
可能因為Ｄ人要返工啦！天氣又轉涼左，所以得我一個人游－－－－吾洗擔心，有兩個救生員陪我架！真係醫生多過病人勒！
自少喜歡游水，小學時在體院跟陳耀海教練；一夠十四歲，就馬上考拯溺章；無甚目標大志，只因為喜歡游水
好奇怪，昨日游左４５分鐘，一Ｄ都吾覺得累，亦無感覺體力下降，反而愈游愈精神
好怕到左夜晚又瞓吾到，又要食安眠藥
結果，兩點零鐘開始眼瞓啦！睇多一陣書就瞓到今朝９點，吾洗食安眠藥，幾叻！
今晚．．．都係靠Ｗｉｉ啦！
另外Co Co介紹我飲夏枯草，但我又驚自己咳未好，吾敢飲
結果，買左ｄ蔗汁飲，效果都幾好，無好似第一支Ｔ針時咁燥熱－－－－係無 ' 咁 ' 燥熱咋！都仲好燥熱架！
打完化療第六針已經五日啦！大致上都無咩野，只係有小小消化困難，食左野之後吾係好消化到，有小小頂住咁姐......
昨日開始，又要打白血球針啦！因為上次打完４支就已經發燒入院，白血球仲升上19.9既高位，因此，同醫生商量過之後，醫生話可以打少３支，即係打４支就可以勒－－－－但係我都仲係好擔心會再發燒，發燒真係令我又驚又辛苦，仲要親愛的擔心.......
因此，打完第三支白血球針之後，我會偷雞－－－－隔一日至再打，希望個反應無咁大啦！
白血球針真係令我又愛又恨......
一方面可以提升我既抵抗力，無咁易受感染，順利升班完成化療；
但係另一方面，佢既副作用都吾細架，盜汗骨痛嘔吐不特止，仲令我牙關合吾埋，成條金魚咁－－－－都幾搞笑架！
仲有兩支化療針，就可以排期做手術，同癌小姐一刀兩斷啦！
癌小姐，吾好掛住我，我吾係你杯茶黎架！
我個頭好大，以前打政府工時要著制服，要戴帽，頂帽要成７號半－－－－其他人都係６號呀，６號半呀，６又４分３呀，又或者７號呀咁...
而家，無左頭髮，好似ＥＴ外星人咁......
我成日都叫自己做羅茲威爾
老公就叫我做禿英，大頭怪英
頭大有個好處，就係戴帽時，無咁容易丟－－－－因為個大頭會kick住頂帽．．．．．．一般人有頭髮至啱戴既帽，我就會啱啱好
呢幾日個大頭，竟然生出好多好多好短好短既頭髮－－－－喂！我仲未打完針個噃，會吾會有ｄ誤會呀！
打完第六針時，會吾會又丟返晒呢？
咁短，丟起上黎都幾麻煩！
昨日見醫生．．．
我：我個頭生番ｄ頭髮出黎呀！打完針會吾會又丟
返晒架？
醫生：吾會生好長既姐
我：吓！如果打完針又丟返晒，咁短，咪好麻煩囉？
醫生：打完晒ｄ針再生既先係真頭髮，你仲有三
針姐，好快架啦！
我：（咁．．．呢ｄ咪即係假髮？）
今早打／吊第六針，有佢陪我
吊左五分鐘，突然覺得個心跳得好快－－－－無理由架，成房都係女性同阿伯，無理由心動既！
即刻問姑娘攞個嘔吐袋...
都係吾妥，好似有野壓心口咁，即刻擧手叫姑娘
姑娘馬上同我停藥check血壓心跳call醫生
等醫生時諗：
1. 如果吾洗打埋個幾支就筍啦！可以快ｄ畢業做手
術同電療
2. 如果要我打多幾支紅魔鬼咪弊？
3. 如果要我做完手術再打化療咪弊弊弊？
諗諗下，又好番ｄ；諗諗下，醫生又到左啦！原來係幫我打紅魔鬼打到嘔嗰個醫生
醫生同我檢查左一輪，跟住就可以繼續吊針啦！
之後只係有小小吾舒服，但都算好順利，希望下次更順利啦！
昨天是重陽節，你們有沒有去掃墓或登山呢？
我因為有病在身，不能太粗勞，所以沒有去掃墓...
但今年的清明節時，我們一家也有去探訪獨住的親友呢！
中國人的家族聚會可分為
1. 週期性的 : 新年, 清明, 端午, 盂蘭, 中秋,
長輩生辰......
2. 突發性的 : 結婚, 生小孩, 喪禮......
香港雖然小, 但香港人的生活節奏急速, 平日大家都很忙碌 縱然我的家族成員不多, 但也不是經常見面 
好像很疏離, 但實際上大家都很關心對方
清明節是我家其中一個聚會的日子
我家族成員之一----太公...和他的燒烤爐
說來話長......
1. 我的太公是天主教徒, 所以墓碑上有切合
身份的mosaic(馬賽克)十字架
2. 我的祖父母(大概)是道教的, 所以太公
死後, 都有為他上香化寶
3. 年前去掃墓, 被游說了建一個化寶爐, 結
果, 建了一個燒烤爐形狀的化寶爐
As the result, 天主教徙旁邊, 有一個專用的化寶爐
太公也別要太介懷了, 這是我們表達愛的方式啊
黃家三兄弟----大哥(我老爸), 七弟, 四弟
