2009年11月11日 星期三

等電話

現在,除了每天在家休養外(真係吾係好夠精神出街...),就是在家等電話...


 


正確地說,是等電話不要響起來...很矛盾!


 


事緣手術後兩星期(即是這星期)會有病理報告,昨天剛好兩星期;如果報告無大礙,醫院不會打電話來;如果報告有問題,便要召我回去...


 


今次,要過兩關:


第一關子宮病變情況;


第二關卵巢水瘤是良性抑或惡性


 


因此,現在每天都在等電話不要響起...


 


  看見入院的相片,好像已經是很遙遠的事(我真是一個善忘的人),真的不知道自己是怎樣走過來的;走得過,忘記得快,也是好事!


 


  親愛的取笑我,差一點就要拖旅行筴入院了!


  


 


  主診醫生成日問,呢隻咩野蒞架?嗰隻又叫咩名?每次,都有姑娘代答...



 


  藍豆種在手上足足十日,差點兒就真的可以生根發芽!由於抗生素破損性很強,打入血管時很痛,多打幾次會令血管蔽塞,令手臂肌肉又紅又腫又痛,要另找地方再種豆;結果,十日內種了三次; 


 


  兩種抗生素,鹽水,葡萄糖水,無晒位! 


  


 


  呢支最勁,要用鹽水溝淡先打,但都打到好痛


  


 


  這一個是最後一個藍豆;醫生找來找去也找不到位置種豆,於是,我介紹這個熱門之選給她,結果可以一擊即中!


  


我:醫生,你好叻呀!一次就搞掂!


靚女醫生:嘩!你介紹架喎!


我:我介紹都要你手勢好先可以一擊即中喎!


靚女醫生:你成日種吾到架咩?


我:都吾係既,最高紀錄都係連種四次啫,我都未


  叫,我d同房見到已經代我'雪雪'聲勒!


靚女醫生:咁就祝你好運,吾洗再種啦!


 


 


  一日要抽幾次血,有時要在打抗生素前抽一支,打完後再抽一支...抽血抽到隻手無晒位,成手都係窿,有時要在腳上抽,抽完右腳,抽左腳,要抽右腳...所以我一見抽血姑娘入來時...


我:姑娘,你認錯人啦!


姑娘:(打個突)無認錯,係你啦!我認得你!


我:(弊!比人點左相添!)


 


     可以上下網,都無咁悶!


  


 


  團餐都算係咁啦!有中餐西餐揀,仲有甜品食,我真係好需要苦中一點甜!


  

 


  

 


  


 


         仲有下午茶


  


 


 


       日望...


  


 


       夜望...


  


 


        都係望返歸... 


  


 


  可能我的命數是不適合太富貴,看過幾次私家醫生都被誤診為良性腫瘤,真是差一點就要了我的命;


  在確診癌症,至現在子宮病變,我都是在公立醫院接受治療;我慶幸自己遇到的都是有經驗又盡責的好醫生,就是未有豐富經驗的年輕醫生,也會多次徵詢顧問醫生的意見才定奪;今次的主診醫生更是一個和善有禮的顧問醫生,談笑之間,就已經救了我一命,令我非常感激!


 


  希望醫生們護士們都可以得到病人的信任,工作開開心心,順順利利...最好忘記我,吾好打電話比我...


 


2009年11月6日 星期五

十日精華遊

這一年來,多次留院,但覺得今次最為凶險...


 


Day 1 早:好人好姐咁入院


   午:開始發燒


   晚:開始禁食,成晚瞓吾到


 


Day 2 早:越來越燒,晨早醫生來看我,決定比我做


     手術,十點半入手術室,麻醉科醫生又攪


     一輪,最後都決定比我做手術,真係個個


     都咁藝高膽大!


   午:四點鐘推出手術室(通常呢d手術都只係


     做個零兩個鐘,今次做左五個幾


     鐘...),都係成身都係喉啦!


   晚:外科醫生見我,告知手術情況:


     好在你有做到手術,因為開左肚先知你卵


     巢有水瘤,仲穿左,d水滲左落個肚度


    (即係遲左會有奪命腹膜炎啦!)所以你先


     會發燒(咁好彩?),已經幫你割左d


     瘤,同洗左肚(洗肚?有無落洗潔精  


     呀?);水瘤通常都係良性既(良性..


     .呢句咁熟既?好似比人呃左幾次


     啦...)


     成晚都發燒,瞓吾到


 


Day 3 早午:開始可以飲水同飲米水;


      開始越燒越高,過左三十九度,全日有


      四五六個吾同科既醫生來看我,聽肺按


      肚看傷口抽血,都話無大問題;


      開始打抗生素;


      可以落床坐,但未行到


   晚:都係瞓吾到,眼光光到天光;


 


Day 4 開始可以行到幾步...去廁所,兩人一房,


   房內有廁所,好近;


   燒過左四十度,   


   又係一日有四五六個醫生蒞睇;


   可以開始食粥,但成日都食吾到半碗粥,本來


   已經拔走左d鹽水同葡萄糖水,又要吊返;


   開始肚瀉,醫生有兩個懷疑,一,對抗生素敏


   感;二,個肚有菌;因此,無比藥我食,要睇


   下瀉成點;結果,係一日十幾次,一晚又係十


   幾次;


   半夜姑娘call左醫生蒞睇我;


   成晚成個火爐咁,再一次發覺自己條命原來從


   來都不在我手,好無助,無野可以做,安慰


   自己吾擔心得咁多,但食左安眠藥都瞓吾到;


   開始審視自己情況,有幾個可能性:

   1. 吊完抗生素,退燒,出院


   2. 要轉隻勁d既抗生素


   3. 高燒昏迷,神志不清


   4. 染上流感,來不及吃特敏福


   5. 最差情況,都無行先一步,後事一早交代晒


 


Day 5 全日燒,徘徊四十度左右,食左退燒藥都退吾


   到小小燒;


   醫生同我轉左隻勁d既抗生素;


   一日抽幾次血,驗肝功能腎指數鉀含量;


   照左超聲波,無腎炎,個肚無積血,都算係好


   消息;


   食左止瀉藥已經無瀉咁多,但都仲係瞓吾到


 


Day 6 開始退燒,即係全日都係三十九度左右


   主診醫生話:無咩大問題既,轉左抗生素都


   幾好,叫你先生買多幾本八卦雜誌,住多幾


   日,打多幾針就好架啦!


   下午,情緒有d失控,血壓又升心跳又標,好


   似有大石壓住心口咁,又比d醫生護士問多兩


   問,喊左出蒞,結果d護士群起圍住蒞安慰


   我;轉左更,d新一更既姑娘又輪流入蒞安慰


   我,叫我吾洗擔心


   開始食到半碗粥...全日加埋...


 


Day 7 燒下退下,開始食飯,全日加埋都食到半碗飯


 


Day 8 主診放完週末返蒞:等我睇下邊個悶到喊先!


   都係燒下退下咁...


 


Day 9 退左好多,燒下退下,徘徊三十七度五左右


 


Day 10 主診醫生:再吾放你走你就偏晒嘴,下午打多


        支抗生素啦!已經偷雞打少左一支


        啦!今日黃昏時無燒就比你走啦!


 


歸家磅一磅,又吾見十幾磅...又一次入院減肥法,成功!


 


以前入院,覺得自己會捱得過既,捱得過,就會好;都曾經試過連續五日高燒不退,白血球跌至0.6(正常介乎4至11),又是吊了幾天抗生素都退吾到燒,仲要入隔離病房,當時,都徬徨,也無助,但心底裏隱然覺得,我會好得返;今次,覺得要捱得過,吾係咁易;但終歸,都捱過左了!


 


現在,等待報告中...等醫生告訴我,我還有多久...希望可以過幾年安穩日子啦!真係病到好厭啦!


 


亦都希望出左事既朋友都可以好似我咁,大大步,攬過去,捱得過,就會有好日子等我地架啦!


2009年11月4日 星期三

2009年10月29日 星期四

手術後,高燒不退中...

星期一是重陽節,也是我入院的日子


早上入院時都算無甚大礙,豈料,下午開始發起燒來


未做手術就發燒,第一件事就想,點會咁架?邊度惹返蒞架?會吾會做吾到手術架?


到左星期二,都仲係燒,但醫生都決定比我做手術


去到手術室,又要過麻醉師嗰一關,擾攘一輪,都係可以繼續...


十點半入手術室,四點鐘至倒返出蒞...


外科醫生同我講,好在你有開刀,因為開左刀先發現兩面卵巢都有水瘤,有一個仲穿埋添,所以未開刀就發燒;已經為我切除子宮同水瘤,而D水瘤多數都係良性既,又同我輸左兩包血,仲洗埋肚...


手術後既DAY1,成日都迷迷糊糊;DAY2,因為發高燒(燒到40.5度!),個人無氣無力無精神;今日DAY3,仲有燒,但感覺就好好多


晏D醫生安排我去照下個肚仔,睇下係咪其他原因而高燒不退...


2009年10月24日 星期六

小孩子長大了

這幾天,繼續我的喪食大行動,終於,可以多添幾磅;只是,因要趕緊交低身後事(即係我既工作...),所以無得hea...


昨天,是解剖前的最後一個工作天,忙碌中,不無感慨...


尤其在收拾桌面時,一面收拾,一面擔心會否有機會再回到工作崗位...都吾知有機會筍d,定係無機會筍d...


最後,匆匆衝出教員室...因為要趕往上麵粉花的課


 


上完了課,約了舊生吃飯


事緣有位學生將到海外工作,會有很長的一段日子見不到他了,所以趁住我同佢都仲喺度,大家見下面囉!


 


      有人快要飛到外地工作  


  


 



           有人快要入屠房 


  


 


 


     但今天,我們仍然相聚一起   


  


 


 


       這天晚上,我們跟某人慶生辰


  


 


 


        但他膽敢缺席......


  


 


孩子真的長大了,有各自的生活,精彩的人生;但在忙碌的生活中,仍留有我這個小學教師的位置,令我感到很安慰!


雖然我的學生不一定是別人眼中的尖子學生社會棟樑,但在我眼中,都是善良生性上進顧家安份的好孩子!希望他們都開開心心,順順利利!


 


這份工作除了帶給我收入外,也為我帶來了朋友,滿足感...


我想,我是幸運的!我想,我大概還是適合當老師吧!


 

2009年10月21日 星期三

待宰的生活多姿彩

本來,今天是入屠房的日子,但醫院內有太多待屠的小羔羊,所以安排了我下星期一才入院,星期二才進屠房,因此,我又可以多玩幾天...


 


昨天校長見到我出現在校園時...


校長:你仲喺度既?


我:(嘩!咁大吉利是呀?我梗係仲喺度啦!)我


  要下星期才入院


校長:加油呀!對你有信心!


我:(算你啦!)一定會!


 


入院前一星期,往往是很忙碌的,因為,要喪食喪玩喪hea...


 


當然,仲要交低d身後事啦...即係d工作...


 


我一天的行程如下:


0530 起床(農夫梗係要早d起身),玩網上遊戲,


   準備午餐,吃早餐


0700 出門上班去


0800 開始工作


   每天都飲狗場主人的茶,因為自己懶得動手泡


  


 


  每堂都利用它指生晒!


  


 


1230 和學生共進午餐  


差不多每天都吃沙律,有時加欖油和黑醋,有時加凱撒沙律汁...日日食,都好悶下...


  


 


1600 放學,留堂改簿備課,直至頂吾順要返歸...


一面改簿,一面巡視業務...將來,我可能係飲食界巨子...


  


 


1800 一般已經離開學校,可能去吃飯,買餸,


   濕平...


 


1900 吃飯----可能在家,可能在街


   這些天,都外出大吃大喝...  


  

  


  


 


2000 用電腦,看電視,改簿...


2130 上床覺覺豬


 


復課後的生活,大概都是如此...


當然,有時要趕功夫,有時吾乖(用電腦,看電視),會晚一點才豬豬


 


還有幾天的太平日子,之後,日子應該更加太平...


2009年10月13日 星期二

日間診所半日遊

昨日到女皇醫院作手術前檢查,包括見醫生,見麻醉科,照肺,抽血,磅重,量血壓......


 


首先,是見醫生...一位很友善很有經驗的醫生,是一位consultant


可能我的情況有點複雜,所以見醫生的時間頗長----個多小時,我從未試過可以見那麼久----無論是私家醫生或政府醫生...


入到醫生房,醫生在'摷'我的紀錄,因為頗多所以頗亂,因而花了一點時間...終於,我忍吾住...


我:醫生,我仲救吾救得返呀?


醫生:吓...(停左手)哎呀,你吾好咁講啦!


   (然後繼續'摷'野)


 


然後,醫生解釋有關和腫瘤科開會後的決定...決定比返我決定...


其實,是有ABC餐任我選,各有利弊,因此令我頗為猶疑


最後,我決定到最後才決定----即是手術前才決定,好讓我多問一兩位醫生的意見


 


然後,是檢查肚仔,醫生放一隻手在我的肚皮上,另一隻手在上面敲,敲得'洞洞'聲,好似揀西瓜咁...真係想問下佢有無起沙...


醫生:d位都好鬆,你剛剛開過肚,d野(即係d


   大腸小腸子宮卵巢同膀胱...)都吾係黏


   得好實,手術吾難做既!


 


然後,要簽幾份幾頁紙的生死狀,是有關手術風險,包括胸肺感染,中風,心臟病發,在麻醉期間或之後死亡,神經受損,癱瘓,失明,皮膚潰瘍...睇完,真係想走...


醫生:呢份你上次簽過架啦?(一年開三刀,有咩未簽過ar?)另外呢份就同上次嗰份吾同既...


我:哦!


 


交還姑娘時...


我:姑娘,呢份簽左係咪比返你就得架啦?


姑娘:睇左嗱?簽左比返我啦,要吾要我印返份


   比你呀?


我:吾洗啦,呢d野,越睇越驚,仲印一份比我?


  我驚我瞓吾着喎!我正話都係恰埋眼簽左佢咋!


姑娘:咁(你隻衰野ar!)...你都要知既!


我:知架啦!(知吾知都係咁架啦!)


 


然後,到另一樓層見麻醉科醫生...


姑娘:同你量一量血壓先...下壓幾高噃,你平


   時係咪咁架?


我:剛剛見完醫生,見到好激呀!血壓高,都係正


  常既!


姑娘:咁...一陣間同你再量過啦!


 


然後,仲要抽血照肺...點解吾洗照心電圖既?吾係漏左呀?


 


結果,日間診所樓高六層,我們到了二三四五六樓,尚欠一樓,下次啦......應該無下次架啦!