2008年6月16日 星期一

給親愛的

給親愛的:


你說你若有得再揀,我仍是你唯一的選擇


你問我若可以再揀,我會否再次選擇你


我不知道


我只知道,我從選擇了你的一刻開始,我就決心好好地跟你走過往後的日子


患病了,你說你才發現你對我的愛比你想像的多,你從不知道原來你這樣愛我


患病了,我才發現你對我的愛,比我想像的,多了很多


明天,是最重要的一天,我可以與你再走多遠,就看明天了


大局已定,也別太擔心了,我們有一天就好好走一天吧


              幸運遇上你的人


2008年6月15日 星期日

想見多你幾面呀

  仲有幾日行得走得玩得見得人,馬上聯絡各方好友見一面


 


  首先係教院既同學仔!


     仲可以扮美少女既馬鞍山師奶


   


馬鞍山師奶軼事一


一年級時同一班,第一次見到佢時感覺:我同佢都吾係同一類人,大家距離好遠,最多都只係做同學,吾會做到朋友既......所以連

都想慳返


後來(係吾夠一個月)先發現......原來,我同佢,都係癲架......所以咪做左好朋友囉!咁又十幾年啦......當年我地梗係得幾歲啦!


 


馬鞍山師奶軼事二


一年級既時候,我地呢d豬朋狗友教佢打牌


佢份人好聰明架,知一想十,好快就明點玩勒


我:西呀


佢:上


我地:點上呀


佢:東南咪上西囉


我地:...........(梗係笑到收吾到聲啦)


我:只有1234個d至上得,番子吾上得架,再黎過啦


(繼續打,打打下)


佢:又上(自己打開3隻花)


我地:你上咩呀?


佢:呢d有1234呀馬


我地:..................(笑到返左枱)


 


         上世紀可愛電車男


  


電車男軼事一


一年級既聖誕假,成班同學一齊去camp,開左學2個月,本來同d同學都吾係好好,去完camp,老死左好多!(可能因為大家都係癲架啦!)


camp既第2日晚,電車男自爆:其實,我有帶齊所有野黎,但只係攞左對拖鞋同牙刷出黎用


..........我地梗係即時四散啦.............


電車男軼事二


吾記得2年級定3年級既學院田徑賽,電車男同長毛聯手掟左我入垃圾桶......大油桶個款呢......


 


電車男軼事三


食完飯當晚,各自搭車走,電車男搭地鐵,半順路咁送我去小巴站


去到小巴站,我要上車勒,叫佢走啦,佢話得啦,然後攞個電話出黎扮講電話,直至我坐個架小巴開左......


呢d朋友,係我咁叻至找得到!


 


      最怕玩揭帽子遊戲既長毛


  


 


長毛軼事一


當我見到手機上既雷電顯示係長毛既時候,通常我會回答:咩野事呀,賤人(咬牙切齒個隻)


長毛軼事二


佢結婚擺酒時,大家都以為去錯地方,事緣大堂門口放有大大張婚紗照,相中人,係有頭髮既......


長毛軼事三


呢一晚,我想為大家解開心中既謎團,但係,失左手----隻左手同隻右手都比佢格開左


如果佢學校有四川籌款義演,我諗佢肯表演除帽既話,一定全校響應


 


 


另一晚,係屋企人


     以前似胡楓,而家似曾江既老爸


  


揸機嗰個:阿爸,望下呢面;老婆,正經d啦


我:正經d,我老豆邊有咁開心


 


 


      半個外人同甜美既妹妹


  


 


  齊齊整整一家人----呢一張,老爸又有d似曾突手


   


           佢個小老婆對佢好好架


 


  friends,幾時輪到我地食返餐呢?吓?驚比我係個blog度出賣?就住左架啦!


  仲有............你地請喎,留返d$我執藥呀, baby!


2008年6月14日 星期六

找緊時間

  照完正電子之後,就只有耐心等報告出


  如果未有擴散,屬前期的話,醫得返既機會有80%

;如果擴散左,又或者係多發性癌症,醫得返既機會係低過30%


  而且,化療時,血既白血球數量會降到好低,吾小心感染到細菌,隨時因併發症而行先一步


 


  因此,尚有幾日就化療,我仲有好多野要預備:


1. 家居清潔


2. 預備走佬袋


3. 訂假髪,買帽


4. 見家人,朋友


5. 改卷,登分


6. 安排試後活動


7. 安排畢業典禮舞蹈表演


8. 安排下年度舞蹈訓練


9. 化療前檢查牙齒


10.想去邊就盡量盡快去埋佢


11.盡量吸收營養


12.盡量食一D鍾意食但係以後可能吾可以食既野


2008年6月13日 星期五

我常常忘記我有癌病

  以前,早上醒來,第一件想到既係:幾點鐘?遲吾遲?可吾可以瞓多陣?


  最初知道患病後,每一日醒來,第一個念頭係:呀!好似有d野好緊要架,係咩呢?係喎!我有cancer喎!


  其實,我真係一個幾善忘既人


  當我同朋友一齊,同家人一齊,同同事一齊,同愛侶一一齊,同學生一齊既時候,我好多時都吾記得我身患重病----除非你提醒我啦!


  不過,而家慢慢意識到,又或者開始接受自己要同死神單挑既事實


 


  就快吾使人提,我都吾會吾記得啦!

因為化療後,身體狀況會時時刻刻對我作警告,分分秒秒對我作提示


  如果一個患有老人痴呆症既人患上癌症......係咪算係不幸中的小幸呢?


2008年6月12日 星期四

病簿三......正電子素描記

今天一大早就去左...............QE照正電子素描,其實即係磁力共浸個d啦


Step one


漂亮可人既護士小姐同我種左粒黃豆係我手背----即係响手背度開個窿,然後攞個塞塞住佢,等d血吾好流出黎,仲可以無限量咁打d藥入去


咁大個女都未試過,睇黎,以後隻手都會有排花啦!


Step two


要去隔離房隔離1小時----因為藥物既輻射性好強,所以吾可以有其他人在場......


D朋友仔話:輻射,咪用錫紙包住囉...........係喎,咪可以由入面開始熟囉


Step three


然後就梗係玩捐山窿啦!


瞓低,雙手擺頭,技術人員用條粗條將我綁住......係固定至真,然後就捐山窿囉


我有d幽閉恐懼,所以全程都吾敢掙開眼


但要玩成半個鐘,又吾開得眼,因此就更想掙開眼,但又好驚,又吾敢,又驚,又想..........吾好折磨我啦!


 


Step four


要等醫生叫左名至可以走得


因為要確定d片無問題


 


 


臨走時,竟然撞到熟人,大家既反應都係:哎呀!

响呢度撞到你........


Friends, 吾好比我响個度撞到你呀,反面架!


2008年6月11日 星期三

病簿二......廣華醫院尋真記

  4月19日   SAT


都仲係有d吾放心,所以同相熟既醫生商量下


醫生話:縱然結果係良性,都要多找一兩個專科醫生睇下d片,聽多d意見,先


    再決定做吾做手術啦


於是,佢幫我寫左封轉介信去廣華既專科


 


4 月22   MON


馬上到廣華排期,見醫生既日期係6月25日


 


4月30   WED


收到廣華既電話,叫我提早至5月28日到診


 


5月28日  WED


到診廣華醫院


先見姑娘,等佢地大概了解一下情況,姑娘既反應係:良性既話,多數都係觀察住先


然後見醫生,醫生覺得有d吾妥,馬上同我照超聲波,然後再抽針;今次係抽粗針;跟手安排我6月17日入院做手術,切除良性腫瘤


當護士小姐攞支針出黎時,真係好有喜劇效果----因為支針有成尺幾咁長

,個針頭.........我吾敢望,所以吾知有幾粗,但就好驚抽完之後,如果飲水既話,d水可能會好似噴泉咁噴出黎囉


醫生話:我睇片同照聲波,都應該係良性既;支針個報告出左,如果係良性既就吾會通知你,你6月16日直接入院就得啦;如果結果有異常既時候,先會打電話通知


6月2日   MON


收到廣華既電話,話手術取消左,叫我6月4日見醫生


打電話個位小姐都可以做特務架----把口好密架


6月4日   WED


去到醫院,證實左係惡性既


跟住要安排各項事宜----照正電子啦,訂假髮啦,見藥劑師啦,初選ABC餐啦.............


然後,自己就要安排往後既工作啦,通知要通知既人啦,安排見要見既人啦,做一d資料搜集,睇下有d咩野要注意啦(好似食得咩吾食得咩咁)


 


 


後記


當然,心情就吾會好啦,但當遇到有心既同事殷殷既問候時,又或者係詢問我有關病情事宜既時候,我就要將自己既悲劇,一次又一次咁重複,好似比人一刀又一刀咁插入個傷口度咁

雖然知道同事都係好有心,但係,真係好難受


 


但係另一方面,收到同事既慰問支持同鼓勵時,又好似大家都將d功力傳緊比我,令我可能輕易咁煉成蓋世武功


 


因此,大家都係留言比我啦!我好鐘意睇你地既留言,因為帶比我無比既力量


以後,我既口頭禪就會變左:有咩查詢或疑問,請你refer返呢個網址 http://hk.myblog.yahoo.com/daisywong1209


 


 


要多謝    


1. 總舵主既體諒尊重,比時間我平伏心情,處理身前事(我好快就會比工作套餐ABC餐佢揀,有排煩啦);


2. 學校既第二把交椅,幫我解決左好多迫切既問題;


3. 阿爹既:有咩野都放埋一邊先啦!吾好理佢住啦----筍呀!


4. 天水圍師奶,八鄉狗場主人,豆媽,屯門色魔頭號目標,元朗美少女既幫忙- ---縱然所知不多,都幫我擋左好多既查詢,亦都留返好多空間比我處理迫切既問題


5. 感激葵涌新貴,雖然無親口問過一句,但係出賣左伯母既行為,令我感受到你既關懷愛護


6. 同校病友既功力傳送,收到晒啦;


7. 健力仕既病假諮詢服務;


8. 四級鉛筆既 hug;


9. 太陽花既每日一joke


10. 同事們關懷既眼神......


11.屋企人既支持,電郵,意見同陪伴


要感謝既人太多啦,如有遺漏,真係吾好意思啦!總之,大家心照不宣啦!


排名係不分先後既!


 


2008年6月10日 星期二

病簿一......私家醫院歷險記

   3月22日   FRI 

  右胸上方摸到一個硬塊

。25日要去旅行,返黎至睇醫生啦,中就中梗架啦,睇下開大定開細姐,都吾爭個幾日啦,行程就定左啦,無謂影響心情,玩左至算
。



 


   3月31日   MON


  今日開學啦,所以吾得閒去睇醫生


 


   4月1日    TUE


  今日結婚10年啦,晚上去左睇百事發佈會


 


   4月2日    WED


  放學後開會,所以都仲未去


  收工後打電話去X安醫院掛號。
  其實我都吾知應該睇邊一科

 全科?婦科?定腫瘤科?我喺電話度問聽電話嗰個,佢提議我睇外科,然後又幫我駁入護士站,護士都叫我睇外科。


  晚上打定電話比校長報定案,因為3號放學後有典禮,我要幫手,所以要講聲佢知我要先外出,再返學校。校長好好呀

,叫我吾舒服就吾使返啦(可能係叫我以後都吾洗返啦,好彩我蠢,所以聽吾明佢意思姐)。


 


   4月3日   THUR


  3:30放學後即去港安。


1. 填表


2. 護士為我度高磅重量血壓,然後問D左問題


3. 見醫生,醫師幫我檢查,問問題,然後安排我馬上照X-ray同超


      聲波


4.  先照X-ray,照前有被問了問題;然後等照超聲波。


5. 再見醫生,真空抽針


6. 又要等,然後又有護士叫我填問卷,又問問題


7.  交錢,約覆診,下星期二────因為4月4日係清明,跟手就星期六、日,所以星期二先有結果


 


其實過程都係淚中有笑(其實係苦中作樂):


1. 洗左成四千蚊


2. 所有人問同一堆問題,我一個人答左成4、5次:發現左幾耐?有無分泌?幾時月經?痛吾痛呀?直系親屬有無人患癌?


3. 照X-ray時,有d似照肺,但焦點喺個胸度,所以要將個右胸放喺膠板上,然後將部機向下壓,壓到夾實個波為止。


嘩!實到呀!好痛呀!


照完右照左,然後又照右,跟住仲要黎多兩張側身。


照完後,個波差d爆,好鬼痛!

   


4. 照X-ray時諗,我就話有波可以放上去夾姐,如果無呢?點


      放呀?

 


5. 照超聲波時,好似照下個BB有手趾腳趾未  


6. 抽針時,好鬼痛----1野拮入去,要係裏面再拮幾野......吾 


     想做人啦

 


7. 醫生房裏面有醫生,護士,我同老公


 首先護士同我入左簾幕後準備抽針,老公同醫生仲係出面傾緊,跟住,護士行出去攞野......
老公:咁快抽完嗱?
護士:未......
醫生:我都未入去
護士:你吾使咁緊張
我 :(想)死蠢......


到醫生抽針時我都仲係忍吾住笑


   4月4日     FRI


  有時都會擔心中左點算,其實大約都諗到點算架啦

 但回心一想,未必有咁嚴重,到係真嘅時候,先至再傷心未遲


  未有心存僥倖,但也未至於太樂觀


 


   4月5日   SAT


  今日個胸都仲隱隱作痛。


 


   4月6日   SUN


  今日心情好d啦,但個胸有腫瘤嗰部分都仲好痛。



   4月8日   TUE
  好不容易咁捱到今日派彩.......結果係......吾係水瘤......都應該或者好大機會吾係惡性......係良性既

  醫生話可以切左個忽,又或者觀察住先
  但我都吾會掉以輕心,決定睇多個醫生,再決定點啦


 


點知......