今天收到一份意想不到的禮物......
是一份坐飛機黎既郵包......
打開之後......
仲有一盒曲奇餅......
事緣早兩年去左澳洲進修兩個月，有幸住進親切友善既Daniel家庭
自從小學開始，已經要分擔家務；
長大成家，更加要打理家務事（當然，親愛的都有分擔，而家仲要係做大份架！）；
但係在澳洲期間，最粗重既家務只係擰下刀叉，set table咁，真係．．．．．．咁大個女都未試過吾使洗衫洗碗煮飯掃地拖地倒垃圾
Daniel一家對我照顧週到，因此我返香港之後，都仲有同佢地保持聯絡
我病癒後，希望可以同親愛的到澳洲一遊，一方面可以探望Daniel一家；另一方面，當我係澳洲時，成日都覺得 "如果而家親愛的同我一齊就好啦！"，所以真係想同佢去下個ｄ地方
其實，暑假時都收到兩隻可愛既小狗．．．
佢地係同我一齊响澳洲進修既同學仔送既，因為佢地知我既仔仔女女都蒙主寵召左，所以就送佢地兩個比我，等佢地可以陪我打嬴呢埸仗！
因此，佢地都係因為澳洲而黎架！
我又渡完假返黎啦！
今次係一個三日兩夜既行情
留醫既原因有兩個：
1. 發左兩日燒
2. 白血球太高，有19.9（差ｄ就同血癌患者有得
揮啦！）
因為以上兩個原因，加上我又有咳，醫生驚我有感染，所以咪入院觀察下囉！
好奇怪既係，打完第五針化療針之後，日日都勁流虛汗（無論冷氣開到有幾大），一入院，ｄ汗馬上止左，一滴都無－－－－吾通醫院既氣勢真係咁強，咁止到咳？
其實入左院都好忙架，有好多野做．．．
首先，日間既：
1. 量血壓－－－－每日幾次
2. 度體溫－－－－都係每日幾次
3. 打抗生素－－－－日間兩次，半夜一次
4. 一日五餐
早：粥＋包
早點：蛋
午：飯＋菜＋肉＋湯＋橙
晚：飯＋菜＋肉
宵夜：麵包＋牛奶（但係因為三聚氰安既關係，
牛奶暫停供應）
5. 午間探訪
6. 晚間探訪
7. 睇電視
8. 睇書
9. 睇住ｄ姑娘同姊姊出出入入咁照顧我地
10.同ｄ同房傾下計
11. 咳
12.
13. 
而夜晚呢，就比較少ｄ勒：
1. 量血壓
2. 度體溫
3. 打抗生素
但係分開三段時間做囉！
所以瞓瞓下就要伸隻手出黎，又或者要張開個口
我就淨係呢三樣姐，同房既仲有其他野要做，例如換片片啦，吉手指驗血啦，打針啦．．．．．．
所以，差吾多每個一鐘頭就有姑娘或者姊姊入黎做野，成晚個房都好繁忙架！
因此，三日兩夜既行情都吾算太悶太難捱．．．
好囉，出左院，可以靜下啦！
昨晚退燒後，今日成日都燒下又退下咁，結果 ，過左四點鐘都仲燒緊，所以決定入ＱＥ睇下
因為過左五點先到ＱＥ，醫生都走晒，所以唯有轉去睇急症
而家等緊驗血報告，要等三個鐘呀！所以而家係大哥家攤抖下，等神洲七號升空時，就係我睇報告之時啦！
吾知洗吾洗入院呢？
今日起身時感覺比昨日好，但又係到傍晚時開始發燒啦！
次次都係門診關門時至黎燒，又要入急症！
見到ｄ同行病友在化療中都可以抽空外出渡假，好羨慕，亦都希望自己情況穩定ｄ時，可以出外走走－－－－澳門珠海都好啦！最好就緊係台北曼谷首爾啦－－－－而家吾洗諗啦！
我諗我既渡假地點就係得ＱＥ咋！
食左兩粒必利痛（醫生之前開既），如果吾退燒，又要執包袱啦！
最憎留醫吊抗生素！
而家9點鐘啦！
食左藥兩個鐘，本來燒到38.4度，而家回落返去37.6度，所以今晚都可以吾入院住，聽朝瞓醒睇下洗吾洗去門診度覆診啦！
有癌病又真係幾麻煩，又吾可以求其找個醫生睇，下下要睇返腫瘤科．．．．．．
等我大步Ｄ，攬過佢先！
比起ＡＣ針，Ｔ針真係已經好好
首先，無以前咁嘔－－－－以前起碼嘔７日
又無咁暈，可以活動下，出下街－－－－以前起碼足不出戶７日，Ｃ左係屋企
而家，只係有Ｄ手痺脚痺，肌肉有小小痛－－－－有朋友既反應係骨痛，我慶幸尚未有呢Ｄ感覺，所以覺得非常非常咁感恩
只係呢隻藥比較燥熱，令我喉嚨痛，出汗，昨晚仲成晚都半夢半醒之間，瞓左同無瞓過差吾多
今日要想個好Ｄ既方法－－－－勤力Ｄ做運動，同食多Ｄ西瓜和水梨，希望可以消緊Ｄ燥熱啦！
每次打完針後，最辛苦是第三第四日，可能係因為ｄ藥剛剛走均全身，加上開始打提升白血球針啦！
天氣太熱，而且身體虛弱，不斷咁流虛汗，成日係咁流，都好辛苦下
加上小小既過度活躍，又有小小既金魚咀，所以昨晚都要食安眠藥
食左安眠藥，要成晚起身飲水；而且，成晚都半夢半醒之間，瞓得吾好
親愛的為左想我瞓好ｄ，成日同我按摩，又吾敢返入房瞓，驚嘈醒我
佢咁樣，令我瞓得更加吾安落
下次吾好啦！
昨日打完第５針，今日既精神都吾算太差，只係有Ｄ口啖啖，有小小見嘔，但一切都大致可以，暫時無ＡＣ針咁辛苦
但據聞大概到第３至７日會有嚴重既骨痛，到時可能出吾到街啦
足不出戶，仍然收到禮物
首先係保媽同保媽既媽，仲有新加坡女孩郵寄黎我家既保健書同長頸鹿，多謝晒，兩個都好合用呀
仲未同新寵改名添！
上星期返學時，日日都收到禮物
首先有全體同工寫比我既慰問卡啦！句句都係金句黎架！
又收到學生既卡，不過佢地吾知我病緊架，所以Ｄ內容都係say thank you呀， missing you之類囉！
又收到同事既愛心健康零食，好啱而家既我食架，因此，更能夠感受到同事對我既細心關懷
酸梅啱晒我作嘔時食架，你估吾估到邊個咁細心呀？
車厘子好補血架，啱晒我呢ｄ血球低既人食，你又估吾估到係邊個咁細心呢？
多謝晒啦各位！
今朝一早，食得好飽咁去到ＱＥ打針，仲驚太飽會嘔添；
結果，都係好順利咁滴完隻新藥
後來，返歸又怕悶，結果都係去屯門市中心睇多套戲
今日有多幾個人一齊睇啦，但係都係十隻手指數得晒
今日睇左Mama Mia
故事簡單，但一把年紀的梅麗史翠普在片中載歌載舞，令人形象難忘，好鬼正呀！
尤其係一大班女人唱Dancing Queen個幕，令我好感動
令我諗起Yesterday Once More呢隻歌啦！
今朝一早到左ＱＥ，準備打第五針，點知．．．
姑娘：有無準時食藥？
我：有呀，晚八朝八，每次食一粒
姑娘：吓？食左幾多粒話？
我：一粒囉！我比你睇勒！（將藥包遞比姑娘）
姑娘：．．．你係出面等一陣啦！
姑娘跟手call左醫生落黎，搞左一輪
姑娘：你應該每次食兩粒架，醫生跟住你上次既份
量開，所以開得一粒（即係開錯左啦！）； 
但係你第一次打，驚你會有危險，為安全起
見，所以今日吾打住啦！你今晚開始食兩粒，
聽日再黎啦！
我：哦！
因此，可以放多一日假啦！
放多一日假，梗係吾好嘥啦！
結果，老公去左打機，我去左睇戲－－－－仲包場添，幾豪呀！
套戲叫咩都吾重要，最重要既係，全個戲院得我一丁友，一個人睇晒，咁大個女都未試過！
自從中五那一年，我每年都咳嗽，而且久病不癒，看遍了中西醫，也難以根治
很多時發生在十二月，亦即是我生日前後．．．真苦！
很多時發生在傷風感冒後．．．
去年亦然，還持續了兩個多月．．．
今年，提早了！
不是我的生日提早了，是咳嗽提早了！最奇怪的，是在毫無病痛而自行咳起來了－－－－沒有傷風，也沒有感冒，只是咳嗽前幾天發燒了
查看中國的二十四節氣，發現我的咳嗽一般出現在大雪前後；今年，提早在白露前
二十四節氣是古人將觀察天氣得來的經驗，總結成廿四節氣，看成是風候轉變的指標，藉以安排每年耕作的時間表！
二十四節氣每一個分別，相應於太陽在黃道上每運動15°所到達的一定位置；所以，二十四節氣也可以說是以陽歷（即西歷）計算
處暑－－－－立秋半個月後，會出現一陣秋後的暑熱，令人有替「秋老虎」逼人的悶熱感，即為「處暑」。每到這時候，天氣悶熱時，我媽常說這是爭秋奪暑－－－－即秋天和夏天爭持不下
白露－－－－是農曆八月的節氣，白露以後，陰氣漸漸地重了，清晨的露水一天比一天的厚，凝結成一團團的白白的水滴，所以叫「白露」。身體弱了，陰氣漸重時，已經抵受不了，提早了咳嗽的時候
大雪－－－－小雪之後十五日，是「大雪」，兩者雖相距不過短短半個月，氣溫的差落卻很大，由大雪紛飛，天地皆白，謂之「大雪」。我就是這個時候出生的，也是每年咳嗽的日子
小暑－－－－是農歷六月的節氣，暑是熱的意思，小暑氣溫雖高，但未達炎熱的極點，所以叫「小暑」。這是我媽離世的日子
朋友們，其實二十四節氣每天都在靜靜地影響着我們，看看以下的日子，你會有什麼新發現嗎？
春
立春 2月4或5日
雨水 2月19或20日
驚蟄 3月5或6日
春分 3月20或21日
清明 4月4或5日
穀雨 4月20或21日
夏
立夏 5月5或6日
小滿 5月21日
芒種 6月6日
夏至 6月21或22日
小暑 7月7日
大暑 7月22或23日
秋
立秋 8月7或8日
處暑 8月23日
白露 9月7或8日
秋分 9月23或24日
寒露 10月8或9日
霜降 10月23或24日
冬
立冬 11月7日
小雪 11月22或23日
大雪 12月7日
冬至 12月21或22日
小寒 1月5或6日
大寒 1月20或21日
我今年的新發現，是醫生開了一隻特效藥給我，名為Singulair，只要服食三日便會見效；我已經服用了兩天－－－－咳嗽果然減少了，希望可以快些痊癒吧！
第五針開始由ＡＣ針，轉打Ｔ針
ＡＣ針係直接打入血管，所以可以見完醫生後排隊打針
Ｔ針係一滴一滴咁吊入血管，要多ｄ時間；而且會過敏，因此見完醫生後，要第二個工作天打
因此，今日見完醫生後，星期二先至打針
又可以過一個比較快樂既中秋節啦！吾洗死下死下咁過！
祝大家中秋節快樂！
鳳凰，是傳說中的生物，中國人喜歡將鳳凰跟龍配成一對
傳說中的鳳凰，永生不死－－－－因為他能在火中重生
昨天晚上，跟患癌的blog友共聚，突然，覺得我們是一群漂亮的鳳凰－－－－治療中，就似被火燒一樣痛苦；治療後，重生了：
1. 毛髮重新長出來了
2. 電療後，被燙傷變黑的肌膚會長出像新生嬰兒的
皮膚來
3. 生活方式不一樣了，更著重健康
4. 人，不再像以前般執著
5. 看事物的方法不同了
6. 常想方法令自己和身邊的人更開心
7. 多了更多新朋友／病友
8. 對生老病死有更深入的體會
重生了，讓我們展翅高飛吧！
只可惜，鳳凰，相傳是男的．．．．．．
返埋今日學，要正式放病假啦！又要麻煩ｄ同事幫我執手尾，真係吾好意思！
今日，我地一大班人食Hot Pot Lunch，地點係．．．
學校．．．．．．
好開心呀！可以同大家爭食，仲食左好多添！
呢兩日有幾聲咳，所以用熱水沖檸檬飲－－－－呢個方法對我都幾有效架！
因為酸，所以加左小小蜜糖
蜜糖係錦田狗場主人暑假遊泰國時買既
其實，我好清楚，以佢既性格，佢係吾會花幾百蚊買呢ｄ蜜糖既－－－－因為我同佢都去過幾次泰國，佢會買蜂皇漿，但就吾會買蜜糖
今次佢之所以買蜜糖，係因為我－－－－雖然佢無講，但我知道佢聽人講，話食左呢隻蜜糖對我個病會點好點好，所以，佢咪買囉！
初初識佢，覺得佢係一個好自信既人－－－－我從來都無咁自信既朋友，感覺好特別；後來，仲成為好朋友添！
識耐左，原來，佢係一個口硬心軟既人，就算佢有幾吾鍾意，佢都吾會睇住任何人死－－－－仲要係幫左人都吾聲吾聲咁，有人真係比佢幫左都吾知架－－－－有時都替佢好吾抵，好多人以為佢好串，其實佢就得個殼，心地鬼死咁好！
我病左，佢吾會日日留言，日日打電話比我，但我知佢好吾開心，知佢好關心我；去到佢屋企，又一家大細一齊招呼我
我地會係一輩子既朋友！
我希望佢永遠幸福！
下次隻手伸出ｄ呀吾該！
下次要影靚ｄ，一齊去個大ｄ既迪記！
昨晚食左安眠藥，竟然可以一覺瞓到今朝－－－－近呢三個月，都係第一次！
今朝，又退左燒啦，所以，又可以返學啦！不過因為有ｄ累，所以就早ｄ走
今朝一早打左電話比腫瘤科既姑娘，姑娘叫我吾洗擔心，應該係白血球針既反應，情況吾係咁嚴重，如果我真係再有其他吾舒服，或者再發燒，先至返去見醫生
聽見姑娘咁講，當常安樂晒，而家，只要多ｄ休息就得啦！
我會無事既！
而家要瞓啦！因為只可以返埋聽日學，跟住就開始正式請病假啦！以後吾可以明正言順咁返學啦！
今朝一早，行得走得，仲食得添，所以食完早餐就返學勒
結果．．．
今晚食完晚飯，探下熱，又燒
仲有幾聲咳
今次吾敢再食退燒藥啦！如果晏ｄ再吾退，或者又要入急症室啦！
希望吾洗啦！
今早雖然有ｄ骨痛，但都如常起床上學（當然有食止痛藥啦！），然後跟同事食午飯，然後返歸
返到歸，個胃有小小頂，牙關又有小小緊，好似金魚咁；所以飲左ｄ檸檬飲品，又舒服返ｄ
但到左夜晚，完全無胃口，又見有ｄ慶，探下熱，真係有ｄ燒－－－－每次發燒都食吾到野，所以咪輕左咁多囉！
我知我應該係骨燒！今次只係打左六針白血球針，仲有一針未打，都已經有反應啦！第七針，都係吾打住啦！我諗我都係受吾住！
上一次入院，就係因為打完晒白血球針，白血球勁標，所以半夜骨痛痛醒，第二日又嘔又燒，為安全起見，先至去ＱＥ睇特別籌，醫生都係為安全起見，叫我入院留醫睇睇－－－－結果第二日就放我走啦！
有左上一次經驗，今次，只要休息一下，聽日，又係一條好漢啦！
不過，今日要破戒食安眠藥休息下啦！
你地睇我都寫到咁多，就知我無事啦！
如果聽日都吾掂既，先至打電話去ＱＥ問問啦！或者去睇睇啦！
瞓醒先至算啦！而家去泡泡浴，然後交交豬啦！乖呢？
今年既七月一日，寫左以下既計劃，睇下我完成左幾多？
1. 去英國．．．女皇醫院渡假，仲要一渡大半年
（真係成日出出入入，又留院，又覆診，又特別診咁，果然係不負所望呀！）
2. 响屋企做下學校工作，想編一套全面ｄ既教材比新移民學生
（問同學仔借左ＥＳＬ既教材參考，但就只限於參考囉．．．）
3. 學普通話（未開始過！）
4. 學麵粉花（都未！因為Miss暑假好忙架！）
5. 非繁忙時間去街街（呢個就有勒！仲好勤力添！）
6. 吾做家務既家庭主婦（不嬲都係架啦！）
7. ｈｅａ－－－－努力咁食同瞓－－－－我會比心
機架啦！（盡力啦！但效果就吾係太好！仍然係
無左３０磅左右）
8. 等老公收工（簡直係望穿秋水呀！）
9. 寫煲（雖然無咩文采，但都好勤力咁寫！）
10. 煲電話粥（我都吾知原來我咁煲得架！）
11. 散步（天氣太熱啦！入夜又多蚊！）
12. 打wii（過左頭七都有落力打wii fit！代替散
步囉！）
13. MSN （成日纏住人！）
今日九月一日開學日，我都有開學架！
返到學校好開心，見到ｄ同事，個個都精神左又靚左，又個個都好關心我！
放學時忍吾住响梯間睇ｄ學生放學，佢地見到我都好開心，有ｄ觀察力好強，問我點解瘦左咁多，有ｄ低班ｄ既就問我點解轉左髮型－－－－佢地都吾知我病架，因為我吾想佢地吾開心！
呢幾日都會返學，雖然吾可以入課室（危險呀！）但就可以預備下ｄ教材，等代課既老師可以輕鬆ｄ；又可以寫下進度，或者一ｄ paper work
唯一吾太好既，係戴住個假髮好鬼熱，結果都忍吾住要除一陣抖抖！
各位同事，吾好意思，嚇親你地添，下次，我會叫：屬豬屬狗屬牛屬羊既擰轉面！
