2009年3月24日 星期二

我今日畢業啦!

我今日畢業啦!


自去年六月開始,各項療程一項緊接一項,歷時十個月的艱苦旅程,今日,終於到總站了!


當然,尚有各項檢查,物理治療,口服抗荷爾蒙藥...就當作是西鐵的免費接駁車吧!


足足十個月,回頭一望,真的不知道自己是怎樣走過來的;


但我知道,途中,有你,你,你,還有你,伴我走過,扶着我,支撐着我,守護着我!


謝謝!


 


 


 


 


 


2009年3月17日 星期二

電療加時劃位...仲有...同場加映

今日開始加電啦!


首先,到三樓等醫生幫我劃位,負責劃位既係靚女醫生,而搞鬼醫生就提供意見同協助(即係教佢點劃,因為搞鬼醫生係顧問醫生)


靚女醫生:(用把尺度黎度去)咁咁咁係8.5cm,但


     睇片又咁咁咁


搞鬼醫生:呢個(即係我啦!)係廣華過黎,打到


     無晒嗰個(咁好打?),因為攞左好多


     tissue出黎,所以吾睇片架啦!睇返個scar


     啦!(又用另一把尺度)


靚女醫生又度,然後攞左個圓形厚膠片出黎度位...


搞鬼醫生:咁吾一定要用圓形既,可以用長方形架!


靚女醫生:咁咁咁喎!(度吾掂...)


搞鬼醫生:都無辦法架啦!要辣到d個nipple架啦!


   (慘啦!)最低消費(吓?)都要8乘6啦!


 


就係咁,我個 "鬆" 度,又多左個8乘6既長方形,仲好吾客氣咁寫埋個"8"字同"6"字响度...


 


同場加映----打尖事件簿


我好少會見到d人就覺得佢好討厭----我對人既接受度都好高架!


但今日就比我遇到啦!


其實,上個星期五見醫生時已經遇到----即係黑色星期五嗰日呢!


話說當日一班病友排緊隊見醫生,有一班打扮整齊既人(大約五六七個咁啦,有男有女,都係個d西裝呀,suit呀,斗令踭呀,藍色eye shadow呀,而家吾興但又繑實晒d頭髮懶係elegant個隻,好似好中產嗰d呢!)推住個坐輪椅既女人入黎(好似太后出巡咁),然後同d姑娘講識得阿邊個邊個,要求見醫生先...


姑娘又真係比佢地見醫生先...


有個病友就忍吾住話佢打尖呀,又盛呀咁...


我安慰大家:佢嚴重d,咪比佢睇先囉,算啦!


實情係佢既情況又真係比我地無咁樂觀既,算啦!我地仲等得,仲有時間等...


實情係如果因應佢既情況而比佢睇先,大家都真係一d都吾介意,早一個遲一個姐;但如果係因為識邊個既,就好令人反感囉...


 


今日,等左成個鐘都未到我見醫生,但佢地一到就又有得見...


 


見完出黎,有個醫護人員行埋黎...


醫護人員:而家會安排病人去電療,但就吾知今日


     有無位,無就要聽日...


討厭鬼:阿林生話可以安排到架喎,或者你問下佢啦!


 


我仲以為QE係政府出錢架添,原來係林生開架!


 


令人好討厭!如果有一日我忍吾住,真係會問下佢入左幾多accumulator!刺激下佢!呵呵!


 


我咁衰,緊係豎起隻耳仔聽下咩野料啦!


 


討厭鬼:而家d醫療都幾好喎!(好似好意外咁,


    好似成世未睇過公立醫院咁!其實,以前


    都吾差架啦!)


都係討厭鬼:係呀,反而加拿大嗰邊就吾得啦,無


      錢呀馬!(反而?......全世


      界都無幾多個地方有香港咁好啦!想


      比多d又得,比少d又得,吾比都仲


      得!)


討厭鬼:......(聽吾到佢講咩)


都係討厭鬼:之前住養和時,d姑娘見到我地去探


      都會叫我地落去找數架(緊係要找數


      架啦!私家醫生都要開飯架,政府又


      吾比,病人又吾比,食西北風咩!而


      且,吾同你講金,吾通同你睇心咩?


      你吾係幾廿歲人都咁天真呀?),


      個個禮拜數架!(如果個病人叫李嘉誠


      或李兆基,應該吾洗個個禮拜比人請你


      去找數既)


 


我呢d係咪叫憎人富貴厭人窮呢.........


 


 


 


 


 


 


 


 


2009年3月13日 星期五

今日,好忙

今日,好忙!


首先,晨咁早去到QE照死光;


跟手要見醫生;


見完醫生已經成一點鐘,所以去左食飯;


食完飯,又返QE既中醫部學郭林氣功,直至下午五點...


 


其實吾只今日忙,呢排,都幾忙...


1. 每日要照死光,仲早過返工


2. 星期一,四學麵粉花,仲要做家課


3. 星期二,五學氣功,每日要練功


4. 一星期最少睇一次中醫,日日都要煲中藥----名副其實既大藥煲...


 


今日等緊見醫生時,有個病友係要加電既,佢話...


1. 要轉電療機,吾會用返之前個部


2. 部新機比舊機大好多


3. 部新機會好貼近要電既部份


4. 只係集中電一個位,所以部機吾會郁黎郁去


 


綜合左佢所講既,我即時既印象係----


一個大熨斗燙落個"鬆"度,直至出煙同聞到香為止...


 


2009年3月3日 星期二

電療記趣

不經不覺,已經完成十幾次電療,呢個星期就會見醫生啦!


朝朝都要晨咁早就出去照死光,有時七點九,有時七點半,有時七點三...真係早過返工!


其他,一切都算順利,只係...


由於每日都係差吾多時間照死光,所以日日都係見住個班病友,因此大家都會傾下計...


有一日,有個話自己五十幾歲既婆仔問我...


婆仔:今日無人同你黎呀?


我:係呀,佢要返工呀!


婆仔:嗰個你個仔黎架?


我:......係我老公...


婆仔:吓?你老公?我仲以為係你個仔...(下


   刪30字,都係好hurt嗰d啦!)


我:咁...你覺得我老公幾多歲呀?


婆仔:四五十歲啦!


 


咁...................................................................................................................................我咪成八十歲?你吾係以為我同我老公既年紀會大得過你呀?


 


 


2009年2月24日 星期二

先生vs哥哥vs弟弟

最近,成日比人叫做"先生"......


 


事緣以往既荒地(光頭)已經鋪了一片草皮,奈何仍然好短好短...


 


事件一 


時間:今日


地點:油站


事發經過----


  我:普通無鉛300蚊ar吾該(遞左張卡比


    佢)


 阿嬋:鵝!同你入埋尾數ar?


  我:好呀!


 阿嬋:(入完油後)先生簽名ar吾該...吾


    好意思,請簽名ar...


吾感想:攪左一輪開埋聲都不能辨我是雌雄,吾好


    認錯有鬚嗰個係老豆呀,阿嬋!


 


 


事件二 


時間:前一排


地點:醉街電器店


事發經過----


  揀左一輪,決定左要買邊樣,


  個阿嬋同我講:先生呢便比錢ar!


吾感想:我已經c9咁既身材,都仲可以叫我做


    先生,即係正眼都無望過我,呢d售貨


    員真係掂晒啦!劉德華都真係無眼睇呀!


 


事件三  


時間:都係前一排


地點:電梯


事發經過:按住部電梯比個c9兩母子入,跟住個


     c9叫個仔:吾該哥哥啦!


吾感想:想踢返佢地出去...


 


 


好多人都以為短髮一定係男人,當年係學堂時被迫剪短左d頭髮... 



 


當時,成日都比人認錯,叫我哥哥,弟弟,先生...好在無人叫過我做阿叔...



 


其中有一單最經典...


 


時間:當年既一個悠閒下午


地點:一間百幾尺既舖頭仔


事發經過----


有位下嫁到香港既北方佳麗帶住個仔(又係兩母子...),想攞某樣放在高處既貨品,咁我就好自然咁幫佢攞,咁佢又好自然咁叫個仔:吾該哥哥啦!


OK! Fine!又吾係第一次,我都慣架啦!


點知...


北方佳麗:弟弟呀,呢樣野點用架?


我:係咁咁咁,又咁咁咁囉!


北方佳麗:哦~~(我想走之際,佢仲拉住我吾放)


     咁呢樣呢?


我:咪係咁咁咁囉!


跟住,個北方佳麗開始察覺到有d吾妥;


跟住,佢既視線開始落係我個"鬆"度;


跟住,露出左驚訝既神色(我有無咁得人驚呀?);


跟住,佢打橫行過兩步,同佢個friend開始一路偷望下我,一路細細聲陰d陰d咁----大家留意,嗰間係舖頭仔黎架,佢地仲以為自己講得好細聲...


 


吾感想:......都係時候留番長d頭髮...


2009年2月16日 星期一

動植物公園雜憶

我很喜歡到動植物公園,除了因為我喜歡動物,又不用花錢買票入場之外,這個公園,有我很多很多的回憶


 


很小很小的時候----大概妹妹剛會走路,弟弟剛上幼稚園,我尚未升小學,尚是一舊飯時,我們一家常到這兒


小朋友見到動物都很開心,很興奮;我們最愛看馬騮,爸媽就會趁機教育我們...


 


見到馬騮...


我們:點解佢地個pat pat紅色既?


爸媽:因為佢地吾聽話,比人打pat pat囉;所以d


   人話人地化妝化到馬騮屎忽咁,即係話d人


   化到好紅囉!(嘩!好詳盡呀!Daddy Mummy


    好叻呀!細佬要小心d個pat pat啦!)


 


行前兩步,見到人猿...


我們:點解d馬騮無尾既?(見到靈掌動物都以為


   係馬騮既天真小朋友)


爸媽:因為佢地吾乖,所以比人切左d尾,一次吾


   乖就切一d,切下切下咪無晒囉!(咁...


   我地以後仲敢吾乖?)


 


 


 


爸媽很少吵架,印象中,看見爸媽第一次吵架,就是在這裡...


就是在這個噴水池旁邊...



當天很熱,我們都很口渴,爸爸走開了,媽媽趁機買了一兩罐汽水(不記得是兩罐七喜還是有可樂,但一定最少有一罐七罐)


爸爸:(回來看見後很不高興)已經叫左你吾好買


   啦!係都要買,飲汽水無益!(大概係咁上


   下啦,long long time ago啦!)


媽媽:咁佢地口渴呀!


跟著媽媽想打開汽水給我們喝,偏偏那罐七喜的拉環一拉就斷...


爸爸:係咪呢!都叫左你吾好買架啦!


媽媽:咁吾買都買左啦!


接著,爸爸就獨自回家了...


我在感覺清涼的水池旁,一邊看著爸爸遠去的背影,一邊忍受住難耐的口渴,一邊想起當時七喜既電視廣告:呢個世界無晒口渴----又話呢個世界無晒口渴既?點解我仲咁口渴架?


我就係咁,帶住呢個謎,跟着媽媽歸家去了...


 


 


幾年前,祖母尚在時,曾與她遊公園...


這一次,我們走在動植物公園的小路上時...


祖母:我細個時黎過呢度!


我:你細個吾係喺佛山架咩?


祖母:有一年,仲讀緊師範,阿媽帶我黎探親戚,


   住左幾個禮拜;當時親戚仲帶我地黎呢度玩添


 


當時,祖母與媽媽遊公園是她美好的回憶;現在,與祖母遊公會成為了我珍貴的回憶...


 


 


 


2009年2月13日 星期五

動植物公園雜思

昨日,去左動植物公園


 


死都吾肯落地,係都要上網既猩女..



 


條蕉...係用黎餵我自己既!



 


除左我,仲有好幾間小學既學生都黎參觀...



 


大家都知道小朋友係天真活潑可愛好奇搗蛋搞鬼架啦!


黑心腸既我,有以下既內心對白...




 


學生:老師,d長臂猿fling黎 fling去,周圍走既?


我:(咪同你地上堂時差吾多!)


學生:點解佢地吾攰既?


我:(你地夠玩極都吾攰啦!你睇下你地老師幾攰?)


學生:佢地叫得咁大聲既?


我:(都吾夠你地大聲啦!)


 


 


吾同既學校,有吾同既Pattern...


 


















名校學生...


 


 


一般學校學生...


一堆一堆咁行


 


排住隊行


老師一開口就係:boys, ......


 


老師:殊...,小朋友要安靜!


學生一開口就係:Jean,


come faster. 


 


學生:老師...


除左紙筆,好多都用相機


或手機影相 


 


多數都係用紙筆,相就由老師影


 


共同之處...

...論論盡盡,一路行一路漏野跌野


...見到d動物都好興奮


 


大部份老師都會睇下個介紹板,然後話比d學生聽個種動物叫咩名;但有個吾太專業既老師,見到靈掌類動物就同d學生講話呢d係猴子...


 


小姐呀,猴子係有尾巴架,無尾巴既係猿呀!吾識就望下個牌啦!老年咁大隻字寫住個猿字架!


 


所以,佢地有野要同大家講...


                 






 


 


得啦得啦!知你吾係馬騮啦!吾使咁激動,吾洗走埋黎啦!