今天是母親節
今天是我第十五個沒有母親在身邊的母親節
我媽本是廣東新會城內的富戶千金，但在大陸變色後，只有跟隨父親來港生活；生活迫人，被送往親戚家作養女－－－－當時名義上的養女，其實跟賣身婢女差不多；可幸的，是養母給予我媽接受教育的機會
小學畢業的媽媽，跟當時眾多年輕女性一樣，在工廠工作，工餘進修，偶像是陳寶珠蕭芳芳，還結識了一班一生的好姊妹
然後，結婚，生了三個激心的細路
細路們一日一日長大
媽媽的年華年復年地逝去
然後，後來，結果，最終，媽媽停留在十五年前的仲夏－－－－永不會變成老人，也沒有見到孩子們成家，不曾過渡九七，不知道什麼是九一一，可能以為沙示是一種汽水，更沒有在電視上目睹南亞海嘯，四川地震的慘況．．．．．．
這些，我都在沒有母親的日子走過了．．．
媽媽，永遠懷念你！
喺ＱＥ做完電療，要返廣華醫院覆診，因為廣華有姑娘教我護理傷口，又有物理治療師跟進我既情況
姑娘介紹左隻藥膏比我搽，仲要搽到好似cream cake咁．．．
搽左兩個禮拜，又真係舒服好多，皮膚無咁慶，又好滋潤，而家紅印都退左好多啦！
姑娘話我係好少數好好彩既人，原來好多先打化療，再做手術既病人，多數都仲係要全乳切，原因係，就算打左化療先，個腫瘤都吾會細好多；而我既情況就係個瘤比Ｄ藥打到差吾多無晒，所以先有機會做局部切除手術
有時聽到其他人講化療都吾係幾辛苦時，就會覺得點解自己對化療藥既反應會咁大既，點解咁吾好彩呀！
原來，塞翁失馬，焉知非福呢！
今日見物理治療師，佢話我情況都幾好，只係刀疤位既肌肉因為纖維化左，變得好緊，所以而家開始，又要搓my breast啦！
另外，又叫我做多ｄ深呼吸，因為電療時除左電燶左個一尺乘一尺既表面之外，仲會電到個肺，所以會吾夠氣，而深呼吸就可以幫助擴張返ｄ肺氣胞
無以前咁長氣．．．睇怕最開心既都應該係親愛的．．．同埋我ｄ學生．．．
今日開始加電啦！
首先，到三樓等醫生幫我劃位，負責劃位既係靚女醫生，而搞鬼醫生就提供意見同協助（即係教佢點劃，因為搞鬼醫生係顧問醫生）
靚女醫生：（用把尺度黎度去）咁咁咁係8.5cm，但
睇片又咁咁咁
搞鬼醫生：呢個（即係我啦！）係廣華過黎，打到
無晒嗰個（咁好打？），因為攞左好多
tissue出黎，所以吾睇片架啦！睇返個scar
啦！（又用另一把尺度）
靚女醫生又度，然後攞左個圓形厚膠片出黎度位．．．
搞鬼醫生：咁吾一定要用圓形既，可以用長方形架！
靚女醫生：咁咁咁喎！（度吾掂．．．）
搞鬼醫生：都無辦法架啦！要辣到ｄ個nipple架啦！
（慘啦！）最低消費（吓？）都要８乘６啦！
就係咁，我個 "鬆" 度，又多左個８乘６既長方形，仲好吾客氣咁寫埋個"８"字同"６"字响度．．．
同場加映－－－－打尖事件簿
我好少會見到ｄ人就覺得佢好討厭－－－－我對人既接受度都好高架！
但今日就比我遇到啦！
其實，上個星期五見醫生時已經遇到－－－－即係黑色星期五嗰日呢！
話說當日一班病友排緊隊見醫生，有一班打扮整齊既人（大約五六七個咁啦，有男有女，都係個ｄ西裝呀，suit呀，斗令踭呀，藍色eye shadow呀，而家吾興但又繑實晒ｄ頭髮懶係elegant個隻，好似好中產嗰ｄ呢！）推住個坐輪椅既女人入黎（好似太后出巡咁），然後同ｄ姑娘講識得阿邊個邊個，要求見醫生先．．．
姑娘又真係比佢地見醫生先．．．
有個病友就忍吾住話佢打尖呀，又盛呀咁．．．
我安慰大家：佢嚴重ｄ，咪比佢睇先囉，算啦！
實情係佢既情況又真係比我地無咁樂觀既，算啦！我地仲等得，仲有時間等．．．
實情係如果因應佢既情況而比佢睇先，大家都真係一ｄ都吾介意，早一個遲一個姐；但如果係因為識邊個既，就好令人反感囉．．．
今日，等左成個鐘都未到我見醫生，但佢地一到就又有得見．．．
見完出黎，有個醫護人員行埋黎．．．
醫護人員：而家會安排病人去電療，但就吾知今日
有無位，無就要聽日．．．
討厭鬼：阿林生話可以安排到架喎，或者你問下佢啦！
我仲以為ＱＥ係政府出錢架添，原來係林生開架！
令人好討厭！如果有一日我忍吾住，真係會問下佢入左幾多accumulator！刺激下佢！呵呵！
我咁衰，緊係豎起隻耳仔聽下咩野料啦！
討厭鬼：而家ｄ醫療都幾好喎！（好似好意外咁，
好似成世未睇過公立醫院咁！其實，以前
都吾差架啦！）
都係討厭鬼：係呀，反而加拿大嗰邊就吾得啦，無
錢呀馬！（反而？．．．．．．全世
界都無幾多個地方有香港咁好啦！想
比多ｄ又得，比少ｄ又得，吾比都仲
得！）
討厭鬼：．．．．．．（聽吾到佢講咩）
都係討厭鬼：之前住養和時，ｄ姑娘見到我地去探
都會叫我地落去找數架（緊係要找數
架啦！私家醫生都要開飯架，政府又
吾比，病人又吾比，食西北風咩！而
且，吾同你講金，吾通同你睇心咩？
你吾係幾廿歲人都咁天真呀？），
個個禮拜數架！（如果個病人叫李嘉誠
或李兆基，應該吾洗個個禮拜比人請你
去找數既）
我呢ｄ係咪叫憎人富貴厭人窮呢．．．．．．．．．
今日，好忙！
首先，晨咁早去到ＱＥ照死光；
跟手要見醫生；
見完醫生已經成一點鐘，所以去左食飯；
食完飯，又返ＱＥ既中醫部學郭林氣功，直至下午五點．．．
其實吾只今日忙，呢排，都幾忙．．．
1. 每日要照死光，仲早過返工
2. 星期一，四學麵粉花，仲要做家課
3. 星期二，五學氣功，每日要練功
4. 一星期最少睇一次中醫，日日都要煲中藥－－－－名副其實既大藥煲．．．
今日等緊見醫生時，有個病友係要加電既，佢話．．．
1. 要轉電療機，吾會用返之前個部
2. 部新機比舊機大好多
3. 部新機會好貼近要電既部份
4. 只係集中電一個位，所以部機吾會郁黎郁去
綜合左佢所講既，我即時既印象係－－－－
一個大熨斗燙落個"鬆"度，直至出煙同聞到香為止．．．
不經不覺，已經完成十幾次電療，呢個星期就會見醫生啦！
朝朝都要晨咁早就出去照死光，有時七點九，有時七點半，有時七點三．．．真係早過返工！
其他，一切都算順利，只係．．．
由於每日都係差吾多時間照死光，所以日日都係見住個班病友，因此大家都會傾下計．．．
有一日，有個話自己五十幾歲既婆仔問我．．．
婆仔：今日無人同你黎呀？
我：係呀，佢要返工呀！
婆仔：嗰個你個仔黎架？
我：．．．．．．係我老公．．．
婆仔：吓？你老公？我仲以為係你個仔．．．（下
刪３０字，都係好hurt嗰ｄ啦！）
我：咁．．．你覺得我老公幾多歲呀？
婆仔：四五十歲啦！
咁．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．我咪成八十歲？你吾係以為我同我老公既年紀會大得過你呀？
