2009年5月29日 星期五

忍無可忍,吾洗再忍

今日做左件衰野......


 


今早去左女皇醫院照超聲波...


醫生指示係要照前早一個小時飲兩杯水,照之前有"殊殊"既感覺先可以照------所以成個房十幾人,大部分人都係度練緊忍功...


 


我排第9...我忍忍忍忍,忍者上身...


 


點知,叫到6號籌時,有個攞住15號籌既新人走入黎,一入到黎就已經叫生叫死,又話急又話盛,要姑娘比佢睇先...


 


姑娘就叫左7號入去,佢又鬼殺咁嘈,姑娘唯有問大家可吾可以比佢睇先...


 


其他人都無出聲...


我:姑娘,我都好急喎,我吾可以比佢睇先


 


到7號出黎,佢又鬼殺咁嘈,姑娘又問...


8號仔:我無所謂,比佢睇先啦!


佢想衝入去...


我:咁即係到我啦!


 


我入左去之後,親愛的話佢衝左去厠所...


 


之後,佢就緊係照吾成啦!


 


跟住佢就喺登記處大吵大鬧,話人地吾就佢...


內容大至如下:


1.應該邊個急就邊個照先


 (咁吾洗派籌啦!有邊個吾急架?)


2.佢個女喺另一座照時,都係邊個急就邊個照先


 (嗰個unit既姑娘就真係應該比人投訴啦!)


3.姑娘吾安排佢打尖


 (吓?到時又真係到我投訴啦!)


4.其他病人吾就佢(鬼叫佢乞我憎!)


5.醫院安排失當,吾係即到即睇,要等


(鬼叫政府派比醫院既資源有限咩,你估d醫生護士想你等架?又想平,又想靚(比較起全世界,已經算係又平又靚啦),但又吾想比咁多稅,香港人真係好貪心!)


6.單打下我咁啦!


(要一個打完八針化療,肝同腎都傷晒既癌症病人讓比你先?我肯讓,你都吾好意思啦----不過我諗佢都無咩廉恥架啦!)


 


好心涼----我知我知,我係好黑心,好魔鬼,但佢又真係好乞我憎,淨係識得投訴投訴同投訴!仲要用d咁不合理既理由去投訴!比我做多次,我都吾會比佢先囉!


我諗佢吾係見有男人陪我黎,出聲話左我啦!算佢好彩啦!同本小姐鬧交,咪即係撩鬼攞命!


 


 


 


 


 


2009年5月19日 星期二

今日研究院畢業

今日又畢業......


 


今日係物理治療畢業......


 


物理治療師:吓?!你得啦!可以著返衫走啦!


我:吓?!(啱啱除左衫瞓低咋喎!)


物理治療師:個刀疤都仲有d緊,要大力d按下佢


     ,按多一年左右啦!


我:咁...係咪吾可以浸溫泉架?


物理治療師:都得既,浸既時候遞高隻手,吾好浸


      到咪得囉!(大家想像下個情況...


      都幾搞笑...)


我:咁係咪吾可以按摩呀咁架?


物理治療師:等我睇下你個報告先...你切左五


      粒淋巴,好小事姐,人地切左十幾粒


      就緊係吾得啦!但你記住要按多d個


      傷口,否則個疤好容易會痴埋一齊,


      妨礙排水;另外,排水運動都要每日


      做啦!得啦!攞返張畢業證書(遞左


      張覆診卡比我)走得啦!


 


就係咁,又有一科畢業啦!又覆少一科診啦!


 


長期請病假既歲月裏,尤其是打化療時,吾出得街,成日在家種草菇,覆診,也成為一個大節目----真係笑中有淚;而家復工啦!過返以往忙碌既生活,覆診,仍然是生活的點綴----監察住身體各方面既機能,又可以提醒自己小心注意健康,所以,我仍然樂意見見醫生護士...


 


 


 


 


 


 


 


2009年5月10日 星期日

回不去

今天是母親節


 


今天是我第十五個沒有母親在身邊的母親節


 


我媽本是廣東新會城內的富戶千金,但在大陸變色後,只有跟隨父親來港生活;生活迫人,被送往親戚家作養女----當時名義上的養女,其實跟賣身婢女差不多;可幸的,是養母給予我媽接受教育的機會


 


小學畢業的媽媽,跟當時眾多年輕女性一樣,在工廠工作,工餘進修,偶像是陳寶珠蕭芳芳,還結識了一班一生的好姊妹



 


然後,結婚,生了三個激心的細路


 


細路們一日一日長大






 


媽媽的年華年復年地逝去


然後,後來,結果,最終,媽媽停留在十五年前的仲夏----永不會變成老人,也沒有見到孩子們成家,不曾過渡九七,不知道什麼是九一一,可能以為沙示是一種汽水,更沒有在電視上目睹南亞海嘯,四川地震的慘況......


這些,我都在沒有母親的日子走過了...


媽媽,永遠懷念你!


 


2009年4月15日 星期三

畢業旅行

悠長假期到尾聲啦!聽日就要開工啦!


畢業旅行去左墨爾本......


適逢當地舉行花展,所以去湊湊熱鬧!


 


地點喺Royal Exhibition Building and Carlton Gardens


  

  


  


 


       花,都係嗰d啦!


  


  

 


  



  


  


   


 


       仲可以餵農場動物


   


   


 


       有幾日住左喺朋友屋企



 


    朋友帶左我地去mornington既酒莊同海灘 


  

 


  


  


 


       又去左d農場


  


  


 


       又去左great ocean road


  


而家,好似年初四咁----假又放完,錢又洗晒,工又要返......但我都好開心,都幾期待開工大吉架!吾知聽日收吾收到開工利是呢?


2009年4月13日 星期一

電療後...

喺QE做完電療,要返廣華醫院覆診,因為廣華有姑娘教我護理傷口,又有物理治療師跟進我既情況


 


姑娘介紹左隻藥膏比我搽,仲要搽到好似cream cake咁...


搽左兩個禮拜,又真係舒服好多,皮膚無咁慶,又好滋潤,而家紅印都退左好多啦!


 


姑娘話我係好少數好好彩既人,原來好多先打化療,再做手術既病人,多數都仲係要全乳切,原因係,就算打左化療先,個腫瘤都吾會細好多;而我既情況就係個瘤比D藥打到差吾多無晒,所以先有機會做局部切除手術


 


有時聽到其他人講化療都吾係幾辛苦時,就會覺得點解自己對化療藥既反應會咁大既,點解咁吾好彩呀!


 


原來,塞翁失馬,焉知非福呢!


 


今日見物理治療師,佢話我情況都幾好,只係刀疤位既肌肉因為纖維化左,變得好緊,所以而家開始,又要搓my breast啦!


另外,又叫我做多d深呼吸,因為電療時除左電燶左個一尺乘一尺既表面之外,仲會電到個肺,所以會吾夠氣,而深呼吸就可以幫助擴張返d肺氣胞


 


無以前咁長氣...睇怕最開心既都應該係親愛的...同埋我d學生...


 


 


 


 


 


 


 


2009年3月24日 星期二

我今日畢業啦!

我今日畢業啦!


自去年六月開始,各項療程一項緊接一項,歷時十個月的艱苦旅程,今日,終於到總站了!


當然,尚有各項檢查,物理治療,口服抗荷爾蒙藥...就當作是西鐵的免費接駁車吧!


足足十個月,回頭一望,真的不知道自己是怎樣走過來的;


但我知道,途中,有你,你,你,還有你,伴我走過,扶着我,支撐着我,守護着我!


謝謝!


 


 


 


 


 


2009年3月17日 星期二

電療加時劃位...仲有...同場加映

今日開始加電啦!


首先,到三樓等醫生幫我劃位,負責劃位既係靚女醫生,而搞鬼醫生就提供意見同協助(即係教佢點劃,因為搞鬼醫生係顧問醫生)


靚女醫生:(用把尺度黎度去)咁咁咁係8.5cm,但


     睇片又咁咁咁


搞鬼醫生:呢個(即係我啦!)係廣華過黎,打到


     無晒嗰個(咁好打?),因為攞左好多


     tissue出黎,所以吾睇片架啦!睇返個scar


     啦!(又用另一把尺度)


靚女醫生又度,然後攞左個圓形厚膠片出黎度位...


搞鬼醫生:咁吾一定要用圓形既,可以用長方形架!


靚女醫生:咁咁咁喎!(度吾掂...)


搞鬼醫生:都無辦法架啦!要辣到d個nipple架啦!


   (慘啦!)最低消費(吓?)都要8乘6啦!


 


就係咁,我個 "鬆" 度,又多左個8乘6既長方形,仲好吾客氣咁寫埋個"8"字同"6"字响度...


 


同場加映----打尖事件簿


我好少會見到d人就覺得佢好討厭----我對人既接受度都好高架!


但今日就比我遇到啦!


其實,上個星期五見醫生時已經遇到----即係黑色星期五嗰日呢!


話說當日一班病友排緊隊見醫生,有一班打扮整齊既人(大約五六七個咁啦,有男有女,都係個d西裝呀,suit呀,斗令踭呀,藍色eye shadow呀,而家吾興但又繑實晒d頭髮懶係elegant個隻,好似好中產嗰d呢!)推住個坐輪椅既女人入黎(好似太后出巡咁),然後同d姑娘講識得阿邊個邊個,要求見醫生先...


姑娘又真係比佢地見醫生先...


有個病友就忍吾住話佢打尖呀,又盛呀咁...


我安慰大家:佢嚴重d,咪比佢睇先囉,算啦!


實情係佢既情況又真係比我地無咁樂觀既,算啦!我地仲等得,仲有時間等...


實情係如果因應佢既情況而比佢睇先,大家都真係一d都吾介意,早一個遲一個姐;但如果係因為識邊個既,就好令人反感囉...


 


今日,等左成個鐘都未到我見醫生,但佢地一到就又有得見...


 


見完出黎,有個醫護人員行埋黎...


醫護人員:而家會安排病人去電療,但就吾知今日


     有無位,無就要聽日...


討厭鬼:阿林生話可以安排到架喎,或者你問下佢啦!


 


我仲以為QE係政府出錢架添,原來係林生開架!


 


令人好討厭!如果有一日我忍吾住,真係會問下佢入左幾多accumulator!刺激下佢!呵呵!


 


我咁衰,緊係豎起隻耳仔聽下咩野料啦!


 


討厭鬼:而家d醫療都幾好喎!(好似好意外咁,


    好似成世未睇過公立醫院咁!其實,以前


    都吾差架啦!)


都係討厭鬼:係呀,反而加拿大嗰邊就吾得啦,無


      錢呀馬!(反而?......全世


      界都無幾多個地方有香港咁好啦!想


      比多d又得,比少d又得,吾比都仲


      得!)


討厭鬼:......(聽吾到佢講咩)


都係討厭鬼:之前住養和時,d姑娘見到我地去探


      都會叫我地落去找數架(緊係要找數


      架啦!私家醫生都要開飯架,政府又


      吾比,病人又吾比,食西北風咩!而


      且,吾同你講金,吾通同你睇心咩?


      你吾係幾廿歲人都咁天真呀?),


      個個禮拜數架!(如果個病人叫李嘉誠


      或李兆基,應該吾洗個個禮拜比人請你


      去找數既)


 


我呢d係咪叫憎人富貴厭人窮呢.........