2008年6月30日 星期一

小英1 號

今日天氣好返d,人又精神d,所以決定去修理下自己,同修理下小英2號


呢個咪我囉----成個屋村c9咁,無晒d氣質啦!


 


      容我介紹----小英1號 


    


 


另一位新寵,今日至剛剛扮完靚既----小英2號


   


 


 


你地吾好手多多呀!好貴架----我收$50摸一次架,要試帶就另議啦!


 


2008年6月29日 星期日

人生的3個27年

在人生規劃既層面來說,人生,分為3個27年


第一個27年,係比我地成長,學習,結婚,生仔,打基礎既;


第二個27年,係比我地創業創富,實踐理想既;


第三個27年,係比我地享受成果既


即係話,如果第一個27年既基礎打得吾好,第二個27年就難以創富,第三個27年就難有好既回報;返之,亦然


我有幸係第一個27年完成基礎既學習,結左婚,找到理想既職業


但我卻相信政府提倡既的終身學習,讀下一個學位,讀讀下又第二個學位,又進修下呢樣,又因為教育政策無時無刻咁改變,成日都要為d新政策去進修(就係未確診有癌症時,仲要抽好多個鐘頭去做小班教學共同備課圈既工作;其實係好學到野架,但係代價太大啦!如果我仲係教院學生既話,我會好多謝教育局囉!);結果,忘記左生仔女


 


 


而家咁,我一方面慶幸自己少一重掛慮;另一方面,又有d可惜


 


 


本來都諗住切除左良性腫瘤之後,趕緊追一個;點知,突然又同我講係惡性既


 


 


睇黎,我第二同第三個27年計劃都要合併啦!而內容,就係----玩,玩,玩,同埋玩


 


唐寅既第一個27年都吾錯架,29歲中選解元,可惜因為人禍,令佢往後既日子都潦倒不堪,死時只有54歲,剛好係第二個27年既完結


有時好多野,真係計吾到,難得既係,佢仲可以如此豁達 


 


桃花庵歌                  唐寅


桃花塢裏桃花庵,桃花庵裏桃花仙;


桃花仙人種桃樹,又摘桃花換酒錢。


酒醒只在花前坐,酒醉還來花下眠;


半醒半醉日復日,花落花開年復年。


但願老死花酒間,不願鞠躬車馬前;


車塵馬足貴者趣,酒盞花枝貧者緣。


若將富貴比貧賤,一在平地一在天;


若將貧賤比車馬,他得驅馳我得閑。


別人笑我忒瘋癲,我笑他人看不穿;


不見五陵豪傑墓,無花無酒鋤作田。


2008年6月28日 星期六

與死神既距離

初初發現腫瘤時


我<-------->死神


 


私家醫生話係良性時


我<------------------>死神


 


政府醫生話應該係良性,但都要做手術時


我<-------------->死神


 


政府醫生突然通知我,報告話係惡性時


我<->死神


 


照正電子描素後,等報告時


我<>死神 


 


見腫瘤科醫生後,話應該可能有得醫


我<--->死神


 


化療前,與朋友共聚時


我<---->死神 


 


化療中


我<->死神


 


呢d..............係咪叫徘徊呢?


 


2008年6月27日 星期五

病簿六----化療針後既任務

打左第一枝化療針之後,我既主要任務係----食同瞓


呢兩個任務,原來係好難好難去完成架----我真係吾係晒命架


 


化療後第一日


食到半碗飯,半碗粉;瞓到6-7個鐘


 


第二日----開始出事


食左小半個蘋果,3-4粒草莓,2個橙


自早上6點起身之後完成瞓吾到


瀉加嘔,成日去小解,眼花手震...........


 


第三日----自救日


食左幾粒草莓,打電話比QE求救,姑娘叫我要食營養補充品;眼光光,36個鐘無瞓過,比死更難受


馬上試用營養品,馬上訂左一箱貨


捱到下午3點幾,相熟醫生開診,出去急求瞓覺靈藥


食左藥,由6點瞓到8點


再食(其實犯左規),由10點瞓到2點


無法,吾食就死梗,再食另一隻,由4點瞓到早上8點


 


第四日


好辛苦咁食左3分1個蛋白,分開2次食左半包通粉,小半個紙包蛋糕;營養品送到,全日飲左2包營養品


瀉得好緊要下;但精神就好好多


都要食幾次藥至可以斷斷續續瞓大半晚


 


第五日 


全日食左小半碗飯,又係營養品兩包,小小水果


仲係瀉


都係要食藥至瞓到,但就食少左


 


第六日 


上午可以駕車出診所,點知上午吾開..........


唯有晚上請妹妹放工來陪我睇醫生----因為老公要返工啦!


可以食到半碗飯,又係兩包吊命既補充品,食左d朱古力,一d車厘子,半個蘋果


今日有精神做左好多學校既野


 


今日 


醫生開左新藥比我試,食左一劑就差吾多瞓到5點

;再瞓,咁就7點,但好迷糊,好沉重,好辛苦,一路迷糊到12點,忍吾住,瞓左兩個鐘;做吾到野,又返吾到學校hold meeting


今日好叻,食左一件海綿蛋糕,一件草莓蛋糕,半碗飯,一盒朱古力奶,一盒補充品,半磅車厘子,所以今日重返1大磅


今日,仲出外散步一個鐘添,但就有d後勁不繼,有d辛苦


一個星期落黎,計計數,無左16磅


 


2008年6月24日 星期二

門前流水尚能西,休將白髮唱黃雞

我老公以為佢會中安慰獎----死老婆


我都以為我會捱吾住


姑娘都話:你咁吾得喎,好潺喎


Today is another day......


浣溪沙        蘇軾
山下蘭芽短浸溪,
松間沙路淨無泥,
蕭蕭暮雨子規啼.
誰道人生無再少,
門前流水尚能西,
休將白髮唱黃雞


東坡兄,共勉之


2008年6月22日 星期日

快要升仙...

三日之間,消耗左10磅(好在我仲有幾個十磅多左姐),眼花腳震,36個小時無覺瞓......原來我得個殼好睇d咋,就黎升仙啦......


都係要買返d營養補充品啦...


亦要見見醫生,攞返d瞓覺藥啦...


2008年6月21日 星期六

見多一面啦

又係响行得走得之時,最後既大魚大肉!


與好同事共事多年,甚少同枱吃飯(印象中,僅只有在普通話鉛筆的婚宴上,才有如此齊齊整整的陣容),如本着有今生,無來世的豪情,共謀一醉啦!


     以茶代酒,大家飲杯!勝既!


   


         個死佬竟然縮......


   


   甚少一齊食飯既好同事,亦係默默地幫我執手   尾既一群


  


    以後有機會要多d一齊大魚大肉啦


   


  成日都同枱既一班,亦係成日幫我啃既老死


  


 


       會同床既一個......   


  


 


另一個場面,同d仔仔一齊


   吾止六呎高,又有高妹既籃球高手



  


        港大IT材俊


  


        未來公僕同新抱仔


  


       黎到既同既吾到既都乖啦有心啦!


2008年6月20日 星期五

病簿五......化療第一針

Today is another day......


今日都真係幾好天氣,係洗衫晒被既吉日


可惜,今日吾得閒做d咁幸福既野,因為......今日要受死啦!


 


去到醫院,首先,係有個小講座,教病人打化療後既護理...


跟住,要見醫生...


然後,又撞到熟人.....

.


姑娘預備好d藥之後,就會叫你個名:大藥煲,入打針房洗手...


咁......原來洗手,只不過係暗號,正確既意思係:到你受死啦!


 


Step One


真係要洗乾淨隻手


 


Step Two


醫生同我種黃豆(有關種黃豆事宜,詳見病簿三...正電子素描記)


.............姑娘d手勢應該會好d囉..............


 


Step Three

醫生攞出一 ' 揸 ' 針筒,有大有細


大既大約好似一隻大蕉咁,有兩紅一透明;細既好似一支marker筆咁,都係透明既,大約有四五支


 


Step Four


開始打第一支,係止嘔既


感覺到有一道道既冷鋒沿住手肯向身體各部份伸展


然後,我見佢好用力咁逐支打入我身體度


 


Step Five      


打到第三支時,覺得丹田有一陣剌痛感,我咁驚死,梗係問醫生啦!


醫生話:係止嘔藥既副作用,正常既


.............止嘔藥係為左防止副作用,但就有另外一d既副作用..................都係正常既.............


 


Step Six


打到第四支,開始想嘔,又有d頭暈,總之就周身吾妥啦


捱完晒d針,又無咩野喎,只係有d吾舒服囉


 


Step Seven 


護士同第一次打針既病人大約講解一下要注意既地方,然後就走得勒


 


Step Eight


帶上口罩,走出醫院,正式成為一個長期病患者


................以後要填報職業既時候,係咪要考慮填 ' 病人 ' 呢?定係 ' 癌症病人 ' 呢?個名好似勁d咁..............


以前,我係填 ' 家庭主婦 ' 架...............


 


2008年6月19日 星期四

After Tomorrow

有套鬼佬恐怖片叫After Tomorrow,大約講世界天氣特變個d末日片


我鍾意睇恐怖片,但我係鍾意睇 ' 嘩! ' ' 嘩! ' 聲或者 ' 呀 ' '呀 ' 聲既恐怖片,而呢d ' 吓? ' ' 唉 !' 既恐怖片,戒左好多年啦!


而家,呢個片名卻令我感觸良多,因為明日之後,我要開始殺死自己,正式成為一個長期病患者,更筍既係........開始提早放暑假啦!


After Tomorrow


人生要走另一條路


After Tomorrow


頭上再也長不出一條毛


After Tomorrow


痊癒既機會會更高


After Tomorrow


我要小心別動怒


After Tomorrow


我要與天比高


After Tomorrow 


我要以自己為傲


After Tomorrow


我要守家待好


After Tomorrow


吾知仲約吾約到你去蒲


 


.................好無聊..........................


2008年6月17日 星期二

病簿四......QE初診記

QE既護士好好人,醫生好搞笑


 


Episode 1


醫生睇左一輪d報告,又問左一輪問題,終於入正題啦


醫生:你係咪想做左化療先做手術?


我:係...


醫生:遞左張一頁雙面印既紙我面前,上面有d藥 


    名,我叫佢做A餐)如果打針就會有以下既


    反應;(再遞兩張雙面印既紙,又有另一d


    藥名,我叫佢做B餐)呢d係比較新既藥,


    但就要自費......(跟住又具體而搞


    鬼地解釋左一輪)


我:咁...即係有無擴散到?(都未講過我知我仲


  有幾耐)


醫生:係d骨同d血度噚吾到,肝呀,肺呀,胃呀都


   噚吾到(都係無正面答有定無)

老公:咁...而家即係第幾期?


醫生:而家好難講第幾期,因為...(又要下刪300


   字)要切左d林巴check左先知第幾期,


   而家,起碼第二期左右啦!即係吾係最早期個


   隻囉!


 


Episode 2


老公:如果係你,你會點揀


醫生:我而家都無病,到我有病時先再揀啦;我個人


   就係咁架啦,無事就吾好去諗,有事先算啦


   (我好似係有事都吾係好想去諗,我咪強過


   佢?)


老公:..........


我:佢既意思係你會recommend我做邊個treatment最


  適


醫生:好多地方都有吾同既政策,有d地方就吾洗錢


   既(個d地方關我鬼事咩);好似美國咁,就


   一定得一隻藥,無得揀...(遊花園,下刪


   300字,最後都係叫我自己決定)


我:(......點解新一輪既政治助理無佢份


   既?)


 


 Episode 3


妹妹:D新藥用左幾耐,會吾會有D studies去支持佢


醫生:咁...你肯定吾係全地球第一個囉,都用左


   幾年架啦,個個人既反應吾同,十個有八


   個...(又係下刪300字,遊左一輪花園)個


   個人吾同囉(...新一輪既政治助理真係無


   佢份?)


 


Episode 4


老公:如果打頭個四針都一樣,咪可以打完四針至決


   定?


醫生:吾係架,你要訂定架啦,如果你打打下針要轉


   既話,可能就真係全地球第一個架啦(搞到我


   心思思想試下添),你最遲星期五決定啦!因


   為你要星期五開始打針


我:我而家可以決定啦,B餐...呀!吾係,係兩


  頁紙自費嗰個呀!


 


 Episode 5


我:咁...自費藥物既收費係幾多?


醫生:响醫生袍既左上衣袋攞左部計數機出黎計,


   我開始忍吾住笑)大約9千幾蚊一針啦(爭d


   聽錯左9千幾蚊一尺)


 


 


總結係:


1. 星期五,我要開始殺死自己


2. 仲有兩日可以返學校做埋d手尾,要求分(數)既同


 事吾洗擔心,我做得切既


3. 要先打8針

仲要一針比一針凌厲,再做其


 他野


4. 中年男人3大願望----升官(我老公,算吧


 啦!)發達(今期金多寶又吾中勒)死老婆(睇


 黎,我都仲可以擺多陣)我老公一個都無得


 中...