顯示具有 走過化療的日子 標籤的文章。 顯示所有文章
顯示具有 走過化療的日子 標籤的文章。 顯示所有文章

2008年11月29日 星期六

走過化療的日子...入睡的秘密

你地係點樣瞓覺架呢?


 


細個時,好難先可以入睡,早早上床,但就搌轉反側,想東想西,看看書,聽聽音樂都未能入睡


 


近呢十幾年,我有一個秘方,百試百靈,完全無失眠


 


呢個秘方就係----金田一一少年事件簿


 


無論本漫畫睇過幾多次,只要睇幾頁,即刻瞓得着,快過d安眠藥


 


但係,童話都有幻滅既一日


 


第一針既第二日,我想瞓下啦,於是攞出金田一一,睇完成本,都瞓吾到,仲愈睇愈驚,開始有精神緊張既情況出現


 


之後,36個小時未能入睡,童話幻滅


 


而家,要夜晚可以睡得著(都吾敢諗瞓得好呢個問題),無所不用其極:


1. 家庭醫生教,日間撐住吾好瞓,小小都吾好


2. 吾可以飲茶或咖啡,但有d花草茶就可以幫助入


 睡,可以試下啱吾啱自己


3. 日間要消耗多d,因為平日返工時,無論係體力或


 腦力都好大消耗;做多d運動,最好係游水,最少


 都要散下步


4. 打機或睇書,令自己傷神d


5. 浸浴,化療時醫生提議既,加入可以令自己放鬆既


 入浴劑


6. 親愛的會好輕柔咁幫我按摩下


7. 噴灑或抹上有香味既噴劑或潤膚露,據聞薰衣草味


 可以令人放鬆d,瞓得好d


8. 食d安神既野,好似圓肉,蓮子百合咁


9. 聽音樂,我會聽住Kenny G令自己容易d瞓著


10.無辦法之下都會食安眠藥,但最多都係打完針食


 三日,之後就努力戒左佢,吾想依賴左


11.護士小姐教:躺在床上,全身收緊,然後慢慢放


 鬆,做幾次,可以幫助入睡


12. 自我催眠http://pda.cellinnet.com/free/hk_apple/sub_main.php?iss_id=20081020&art_id=11739658


 


由於長期瞓吾到又瞓吾好,令我吾敢去海洋公園,因為驚d人誤會左安安佳佳走左出黎...


 


 


2008年11月27日 星期四

再世為人

今日晚飯時,突然有一種再世為人既感覺


化療初期,胃口差,身體弱,咩野都食吾到,邊度都吾去得,只可以在家待好;


而家,最後一針化療針,雖然身體上仍然有好多好多既不適,但今日食到大半碗飯,食到鮮香味美既餸菜時,已經非常非常感恩,同時,亦都有無限感慨----我係點樣走過黎架?真係走完化療?真有點難以至信!


只要捱多幾日,以後都無咁辛苦既日子啦!


 


 


    昨日妹妹送的打氣花



 


 


2008年11月22日 星期六

第八針

第八針,種藍豆時...


姑娘:你仲有無打白血球針呀?


我:無啦!醫生話可以試下吾打


姑娘:記得你好掂呀,第二日就話可以自己返屋企


   自己打


我:我都係頂硬上架咋!(啊!原來係教我打白血


  球針既姑娘,我吾認得佢添,因為好耐無見過


  佢啦!佢好好人架,教我打針時又好細心)


 


 


吊藥吊左5分鐘左右,心跳加速,呼吸困難,心口受壓,仲見頭暈添,即刻叫救命...


 


又係call醫生


又係要轉床,可以睇清楚個天花板


又係要照心電圖


又係抖一陣可以繼續毒死我


 


 


照心電時,係一個成日同我抽血既姑娘出手... 


姑娘:唉!呢部野仲老過我呀!


我:咁都係廿幾年姐!


姑娘:咁我又吾止廿幾歲


 


跟住就左縛右縛,要插好多制同好多電線,仲要係我雙手雙腳縛上連鐵片既膠手帶,仲要箍到好實好實,好鬼痛


最後,醫生都忍吾住要幫手


醫生:嘩!部野上個世紀個噃!


姑娘:新個d去左studies個度,鎖住左吾


   比人用呀!


醫生:唉!醫管局成日都cut資源,cut左又


   吾見會用左係我度噃!


姑娘:都吾見用係我度噃!


我:我都無份,吾知去左邊!


姑娘:你吾洗驚,部機係老爺d,但都係一樣準確架!


我:哦!


 


 


 


拜拜啦!又愛又恨既化療藥!



 


藍豆與我,訣別啦!



 


 


 


 


 


 


 


 


 


2008年11月18日 星期二

走過化療的日子...藥物篇

打化療針有副作用,所以醫生會用藥物去減輕這些副作用;但服用這些藥物又會有不同的副作用...


 


Filgrastim 0.5ML~~提升白血球針


吾係個個化療病人都要打既


化療針會令骨髓功能降低,因此白血球會減少,針藥效力過左,白血球就會升返;但有3%既病人既會完全造吾到血,因此要靠提升白血球針去刺激骨髓,幫助提升白血球


醫生會根據病人既體重計算用藥份量,一般由打完化療針第四日開始打,連打七日,約為六千蚊左右;最新既就一劑過打一支,但現時只限私家醫院,政府醫院暫時未有提供


打完之後會有骨痛,嘔吐,發熱,發燒,尿酸増高等副作用


因為係注射形既針藥,所以可以自行在家中注射(姑娘會教你打,教到你好好打為止!);或到附近賽馬會診所要求姑娘注射,每次收費17蚊



 


如果自行在家中注射,記緊於完成後要把針筒放入有蓋的水樽內,以免針鋒傷害自己或他人



 


Metoclopramide HCL~~一般既止嘔藥


對我個人黎講就吾算係好得,食左都會嘔幾次,會有d眼瞓,仲會勁出汗 


 


Lorazepam 1MG~~鎮定劑加止嘔 


止嘔藥既加強版,食左個人會攰d,日間都會有睡意,幾好架,但就吾可以食咁多日,一般醫生只會開三至四日 


 


自費止嘔藥 


政府醫生話仲有一隻自費既止嘔藥,靚d既,但因為我食Lorazepam都OK,所以無食過;好似都吾係好貴,幾百蚊左右啦!


 


Dexamethasone 4MG~~類固醇


又叫肥仔丸,可以防敏感,可以止嘔,仲有鎮靜作用;食左個人會好攰下,仲會水腫,皮膚乾燥,痕癢,所以都係吾可以食咁多日,醫生一般都係會開三至四日左右


 


Lomotil~~止瀉藥 


如果打左化療針後,一個鐘要去一次既,就隨佢啦!但如果一個鐘要去幾次既,就要食啦!當然係去左好多次之後先食啦!因為去得多,表示幫你排左d吾好既野去,但去太多,好辛苦架!


 


Endopain~~必理痛 


止痛退燒,吾好亂咁食,除非好似我咁,知道自己因咩事痛或因咩事發燒


例如發燒,可能係因為白血球太低,但又可能係因為白血球太高,又或者係受到細菌感染,因此最好係睇醫生


 


Zopiclone Tablet 7.5MG~~安眠藥


初級版,一般醫生都會開呢隻


 


Nitrazepam 5MG~~安眠藥 


醫生話呢隻最勁架啦!但對我就作用不大,食左之後成半個鐘都未有睡意,食左個人好暈,成晚起身去洗手間,仲要中下中下咁去


我通常會係打完針第二至四日食,之後既日子盡量吾食,免得依賴左d安眠藥


 


Folic Acid 5MG~~葉酸  


刺激骨髓,幫助提升白血球,所以食左兩三日會開始骨痛


 


Alprazolam 0.25MG~~鎮靜劑  


因為我打針後有焦慮不安既反應,所以醫生開鎮靜劑比我;


食左個人攰d,日間都會有睡意,個人會慢左,遲鈍左


 


Famotidine 20MG~~胃藥


跟類固醇或止痛藥一齊食,保護個胃;試過胃痛時食----吾得既,止吾到痛


 


 


初級安眠藥 葉酸  大路止嘔藥 止瀉藥


 


 


凡係藥都會加重個肝既負擔,所以當d副作用開始無咁嚴重時,我就會盡快停左有關既藥物


 


以上只係個人既小經驗,有問題最好問清楚醫生,因為每個人既反應都吾同架!


2008年11月6日 星期四

走過化療的日子...第一針的事前準備

經過四個月既化療,終於都到尾聲啦!


化療係最辛苦架,因此,化療前,最好做小小準備


我第一至四針打AC針,是出名辛苦的紅魔鬼針,以下是我個人小經驗


 


1. 清潔家居


因為打完化療針,個人既抵抗力會差左,尤其係白血球會跌到好低,若然生活環境吾夠乾淨,便容易受細菌感染,易病難好


2. 準備一d可以食既野

~打第一針時,因為身體未能適應,所以會好辛苦,


 最常見既係嘔吐


~因此,我會預備水果,因為比較容易入口同消化


 ---西瓜(排毒),車厘子,提子,士多啤利


 (補血),蘋果(正氣d),檸檬,橙,奇怪果


 (酸酸地易入口)


~食麵包都係一個好選擇,無流質食物咁容易嘔


~另外,要預備啱口味既營養補充品,因為食吾到野


 會無營養,個人會好弱,更加吾舒服,幫吾到打仗


 我就選擇左果汁味既


 


3. 安排照顧者


打完針,個人會好無精神,我就連睇電視都睇吾到,因此,最好有人可以係頭四日照顧到你


 


 


4. 剪頭髮


打完第一針之後兩三個星期,d頭髮就會丟,因此宜先剪短,甚至剃光佢


 


5. 配假髮同帽


無左頭髮就緊係要帶假髮或帽啦!


假髮有平有貴,可以自行選擇


夏季宜選一些軟熟疏氣既帽


 


6. 睇牙


因為化療會令白血球同血小板降低,有傷口會好難好,所以如果化療中要整牙會好麻煩,因此最好先檢查牙齒


 


7. 安排化療其間的節目


~提升鬥志,排遣寂寥


~做下手工藝


~學一門語言


~準備幾本有興趣既書


 


仲有...未諗到,有無人可以分享下?


 


 


 


 


 


 


2008年8月31日 星期日

吾識節制既後果

由於昨日吾識節制,一用電腦就用左六個鐘,又玩MSN,又巡BLOG,又上家族,又寫BLOG;結果,搞到夜晚精神緊張


 


 


 


加上打左幾日白血球針,所以骨骼開始有反應,尤其牙關有D合吾埋----都幾搞笑架,成晚都好似金魚咁!


 


 


而且,一日嘔幾暈,真係肺都甩呀!


 


 


結果,未夠八點,就係間屋度行黎行去


 


 


 


親愛的見到就梗係好心痛啦!所以我未夠九點,就破戒食左粒安眠藥瞓啦!


 


 


 


安眠藥呢家野,我已經熟知佢既個性啦!食左,個人好暈

,好沉重!而且,早食,早瞓,早醒!


 


 


 


有幾早醒呢?半夜兩點幾!


 


 


 


都吾錯架啦!有得瞓成六個鐘----雖然中間醒過一次去洗手間


 


 


瞓醒左,精神好左,金魚游走左,又吾見作嘔作悶,亦都吾洗行黎行去,個人鎮定左好多,但就有d肚仔餓;不過,都係吾敢再食野啦!


 


然後,咪HEA下囉,好在保媽借左溫馨既 '我們這一家' 比我,等我可以消磨下,輕鬆下!


 


又結果,四點幾,有D累,再食半粒安眠藥,咁又瞓到八點幾勒!真係好!


 


所以,今日決定吾打白血球針住----因為打到六至七針時,白血球過多,會骨痛同發燒----今日都有小小痛啦!


 


 


 


遲一日先打----即係九月一日放左學至打,否則,要頂住骨痛返學,好慘架!


 


 


 


希望好D啦!亦都希望可以捱多幾日,返多幾日學,開心下啦!


 


 


今日,雖然都有作嘔,但就無真係嘔啦!下午仲同親愛的行左一陣街街


 


 


今晚要早d瞓,聽日要早起返學


 


但係而家仲好精神喎----一陣間打一陣wii,再浸返個泡泡浴,再吾得既,咪唯有再破戒囉----希望吾洗啦!


 


 


 


 


 


2008年8月26日 星期二

好大陣病人除

 


打左針後,成日都嗅到自己身上的病人除


 


所以,呢幾日會:


1. 盡量打開晒屋企的窗


2. 噴下香水


3. 用濃味入浴用品浸泡,又可以令自己瞓得好d


4. 四周噴下d香香噴霧


5. 插下d香花


6. 開少D冷氣


 


 


八鄉狗場主人由泰國帶返黎既香氛,係我喜愛既西柚味,可以加水後噴灑於屋內



 


 


自己係優之良品買既西柚味浴鹽,好清香,又吾太貴,只係$40,比卓悅既浴鹽清好多,香好多



 


 


天水圍師奶提供的泡泡浴露,勁多泡,泡沫細密纏綿


 


 


又係天水圍師奶提供既,不過未開 


 


 


而家,日日都可以有好心情啦!


2008年8月22日 星期五

我的頭七和三七

頭七:打完針頭七日,所有副作用出晒黎,比死更難受


三七:打完針第三個禮拜,行得走得食得瞓吾得,但已經好開心


頭七就吾好提啦!


三七,日日出街會親朋好友,朝朝去街市買餸煲湯煮飯,晚晚打wii游水做運動,都好開心,好精彩


都係要多謝親朋好友撥出寶貴既時間同我killing time啦!


 


 月上柳稍頭,人約黃昏後----去奶奶家途中


  


 


 


      有閒情逸緻可以插下花 


      


 


     煮飯煮到悶,轉下口味包水餃


  


中間個幾隻創意水餃係親愛的既作品,我就悶d,包極都係咁既樣!


 


本來今日又係頭七既第一日----今次第四針啦!但因颱風既關係,昨日被QE召左去抽血,聽日早上先打針!


又可以輕鬆多一日啦!


聽日先再死過啦!


而家要死去煮飯啦!


2008年8月12日 星期二

有左......

其實,有左癌症,同有左,係差吾多架


1. 作嘔作悶


2. 都係要食葉酸,幫助骨骼生長,造血,所以都會


 有骨痛


3. 戒口,吾可以亂食野,尤其係d蝦蟹牛同加工食品


4. 要食多D,吸收多D營養


5. 口味改變----我個人對酸既食物要求大左


6. 吾好成日出街


7. 小心吾好比人撞倒


8. 等時間過去:個B瓜熟蒂落/化療完成/個瘤拜拜


9. 都係要做手術


10.完成個程序之後,要回復以往既工作


 


化療之路就快過左一半啦,而家,望返轉頭,我相信:


我最徬徨既時期已經過左----吾知醫吾醫得返;


我最辛苦既時間已經過左----第一二針,真係不堪回首;


我最危險既情況已經過左----連續發燒不退住院吊抗生素既8日,如果當日稍有感染,我今日都可能吾可以同你話呢番說話啦!


我最感恩既時間已經到左----感謝天主的帶領,感謝聖母的庇蔭,感謝天使的守護,感謝家人朋友的支持鼓勵照顧和關懷!


展望將來,仍有好長既路要行呢!


我會帶住所有人對我既情,勇敢向前走!


 


2008年8月9日 星期六

家中的Phyical----Wii Fit

因為成日都要留响屋企,所以運動量大減----想當日,學校有七層,日日上上落落,每日都可以健康一萬步;而家,雖然都係家住三樓無電梯,但係.......吾通光住個頭行上行落咩?真係怕嚇親d街坊呀!


幸好,我家有Wii!


 


每晚都會玩半個鐘頭Wii Fit,主要玩帶氧運動,好似踏板行樓梯,呼拉圈咁


雖然無一萬步,小小地,每日一千啦!



 


 



 


再玩多二千下呼拉圈----幫助消化呀!



 



 


而家都好有恆心咁日日做,打完針個頭7日就做吾到啦!中間個7日就做小小,尾7就做多d,吾係就真係驚自己發毛加生鏽!


但係,都係瞓得吾係幾好,要好夜先瞓到,又成晚醒


所以,而家個黑眼圈好大,真係同國寶有得比!


無法啦!留院時聽人講,有癌症既人係會瞓得吾好又吾多架啦!


睇黎,真係要試下去游下水先!


 


 


 


 


 


2008年6月19日 星期四

After Tomorrow

有套鬼佬恐怖片叫After Tomorrow,大約講世界天氣特變個d末日片


我鍾意睇恐怖片,但我係鍾意睇 ' 嘩! ' ' 嘩! ' 聲或者 ' 呀 ' '呀 ' 聲既恐怖片,而呢d ' 吓? ' ' 唉 !' 既恐怖片,戒左好多年啦!


而家,呢個片名卻令我感觸良多,因為明日之後,我要開始殺死自己,正式成為一個長期病患者,更筍既係........開始提早放暑假啦!


After Tomorrow


人生要走另一條路


After Tomorrow


頭上再也長不出一條毛


After Tomorrow


痊癒既機會會更高


After Tomorrow


我要小心別動怒


After Tomorrow


我要與天比高


After Tomorrow 


我要以自己為傲


After Tomorrow


我要守家待好


After Tomorrow


吾知仲約吾約到你去蒲


 


.................好無聊..........................