呢兩日,
嘔;
食吾落;
瞓吾着;
企吾長;
坐吾低;
比死更難受!
我又死完返黎啦!
又一次殺死自己......
以為自己要留班----白血球吾夠,打吾到第二針...
點知,又得喎;人生,真係好似坐過山車咁...
又想早d打,早d好;又怕打左,好辛苦;又吾想留班,但又想快d畢業......真係貪心!
今次,又係個搞鬼醫生......
醫生:呢幾日有無咩野吾舒服呀!
我:(下刪50字,都係個d啦!大家都吾想知!)
醫生:咁......一係比個八五折你...
我:(吓?咁筍?)
醫生:一係就打多支造血針啦!(又係响左面個袋
度攞左部計數機出黎襟)一支900蚊左右
啦!第四日開始打,連打七支,每次6000
零蚊啦!
我:係咪每一次都係咁打呀?
醫生:係呀!
老公:嘩!加埋咪四萬幾?
醫生:係架!差吾多貴過化療架!咁你打吾打呀?
我:打!(有政府比$,吾打就笨啦!愈係貴就愈
係抵呀!老公,我愛你......公務員既身份!)

打針房,我,靚仔醫生(QE既質素真係得呀!又後生,又靚仔,仲要吾係一個,而係個個都得呀!),仲有靚女姑娘
靚仔醫生:上次打,有無吾舒服?
我:打到第三支針時想嘔囉!
靚仔醫生:你放鬆D就得架啦!
我:你地咁樣幫人打完針,D手指咪好累囉?
靚仔醫生:如果日日係咁打,真係老鼠仔都打埋出
黎呀!不過應該係關節炎出左先囉!
打到第四支針,我開始忍吾住,嘩啦啦咁嘔晒5個鐘頭前食左既粥出黎
我:吾好意思!
姑娘:你都吾想既!(好窩心的一句)
靚仔醫生:你打完針要坐多一陣喎,好返D至走啦!
跟住,都無咩野,咪返歸等個巨浪湧埋黎囉!
不過,今次我早有準備啦!問醫生攞定好多回魂丹,到時,就吾洗驚D副作用啦!

我捱得過既!
7月5日 願望成真啦
又係9a.m.,又係 Handsome佳
Handsome佳:咦?睇緊咩野咁開心呀?
我:無,d牛仔骨,cowboy legs個d囉
Handsome佳:啊!北京個d英文菜名
我:係囉
Handsome佳:.........................
我:........................
Handsome佳:都仲係低低地,同你吊多支抗生素啦!
我:鵝!
我希望可以吊兩支抗生素

願望成真添

吾緊要啦!有Teddy Daisy陪我吊

呢一日,真係無咁on and off----即係無再高到39度咁,全日都只係有小小低燒
第二日,仲無燒添,到左7月8日,醫生就比我返歸啦!終於都望到啦!
真係要多謝我死鬼阿媽顯靈,吾係佢,我可能死左都吾知咩野事
亦都要多謝May姐,同我打點打點
仲有就梗係d好穩陣既醫生們啦!如果吾係Handsome佳要我留多一兩日,我都吾知自己原來咁嚴重
當然仲要多謝姑娘同姐姐對我既照顧
多謝所有朋友既探望同關心
最緊要梗係要多謝妹妹同老公既衣不解帶既照顧
今日,本來要打第二針,而家,要去驗血,睇下打吾打到......
7月3日 萬中選一
又係9a.m.
Handsome佳:係咪呢!仲燒緊呀!住多兩三日觀察下先啦!
我:咁......點解會咁既?
Handsome佳:有d人係會有呢d反應既,一陣間抽多次血驗下,睇下d白血球有無高返d啦!
10:30a.m.,大巡,有大醫生----SMO(Smart Mature Officer)
SMO:住多五日啦!
我:吓......(咁豪?)咁...........點解...........
SMO:打左化療針既病人就個個既白血球都低架啦!但有3%既人係會完全造吾到血既,你係3%裏面嗰個囉
我:
SMO:你下一支7月11日打既時候,打多支造血針啦!800蚊1支,每個療程打......(下刪30字,因為吾係好明要點打同打幾多支)你係公務員家屬,一定有得clam既(嘩!望下個file就咩都知,快!狠!準!)
7月4日 天字一號房
又係9a.m.,又係Handsome佳
Handsome佳:驗血報告出左,仲係有d低!
我:鵝!..........咁..........食多d同瞓多d,係咪會高返d架?
Handsome佳:m......都無咩野影響......
我:
早上十一點幾,當我好衰相咁橫躺床上(上半身係床,下半身係櫈度),用手機影緊窗外既風景時...

豪爽既姐姐:33號既靚姐行吾行得幾步?
我:得.....................(行返屋企都得呀!)
姐:咁就行幾步轉房啦!
靚姑娘:你白血球低,所以要轉房
我:鵝......(好自然咁執野啦!)
佢地:你吾洗執啦!我地會幫你執!你行就得架啦!
然後,吾知有幾多個人,幫我連床帶櫃轉左入一間細房度,全房有2B1P1W1TV(2 Bed, 1 Patient...即係我啦, 1 Washroom, 1TV)
優雅姑娘:你白血球低,所以要住呢度,有人黎探就叫佢地洗手著外套帶口罩啦!無野既,困幾日啦!
我:吓...............鵝...........
就係咁,我由33改左名叫1仔
D姑娘成日都會隔住個房既玻璃窗望下我 ,都好有安安佳佳feel!吾知我打個肋斗,會吾會有窩窩頭或者竹葉食呢?

呢一日,籃球高手洗左佢女朋友買左個豬扖飯我食...
新抱仔係長沙灣做野,Lunch Time飯都吾食,冒雨買盒飯黎QE比我,然後又拿拿淋仆返去開工............

To be continue.......
7月2日 零晨兩點幾
急症室醫生:你既白血球低左d,不過打呢d針就個個都係咁架啦!但係你有D發燒,所以都要入院睇睇點
我:吓...................(講到咁峰迴路轉既?)
結果,上到腫瘤科病房,個D.O.睇左個file...
D.O.:打呢D針就個個既白血球都低架啦!可能係急症室既醫生吾係好了解架姐,一般黎講都係比d口服既抗生素你返屋企
我:咁...即係聽日出得院?
D.O.:聽日等主診醫生決定啦!
結果,主診醫生係一個Handsome佳...
Handsome佳:m......白血球有d低,仲有d發燒喎,住多一兩日觀察下先啦!
我:即係最樂觀聽日出得院啦?
Handsome:都係既......
結果,成日都燒
結果,成日都無胃口
結果,老公同妹妹同我搬左半間屋黎
結果,我係全房最行得走得既一個
結果,我係同死神最接近嗰個....................
成日都話我既白血球低,到底,有幾低呢?
第一日,係0.8
過左兩日,抽血再驗,係0.6,所以要即刻轉房
0.8同0.6代表咩野呢?
我係五月時做身體檢查,係8.8
正常既,應該介乎4.0-11.3之間
所以,d醫生都好客氣架啦,只係用低低地黎形容......
我出院時,係有2點幾架,叻呢?
To be continue.............
咁多日無見,係咪好掛住我呢?
7月1日回歸日開始,去左渡假,地點係英國......女皇醫院......即係QE啦!
入院,係因為發燒;留院,係因為醫生驚我會死......
入院時,住大房;留院期間,被轉入單人房,原因,都係醫生驚我會死......
而家,大步檻過啦!無死啦!

1.7.08 星期二 阿媽發功日
呢一日精神好好,所以同妹妹到粉嶺拜祭媽媽

返到屋企剛好6點,自覺有D吾舒服,攤左係沙發襟左被瞓到8點
半夢半醒間,知道自己發燒啦!起身探熱,果然無令我失望............39度...........阿媽咁大整蠱呀,問你攞幾個六合彩號碼姐,吾比咪算囉,使吾使咁呀?
敷下冰hea下,到10點鐘又真係退左少少........38.8度......
馬上收拾已經執左一半既走佬袋,落樓截的士去QE
剛好鄰居們在地下有BBQ party,我一出現,大家靜晒........然後目送我離去........咁客氣呀..........其實我係吾介意佢地可以送我一程囉..........等我吾洗搭的士......
去到QE,出示我張VIP,姑娘即刻請我入左6號房等
等緊既時候有佢陪住我
跟住,都係個D啦;最後,上得病房黎,已經早上4點幾啦!
To be continue......
每年到左呢個大雨時節,就會計劃一下暑假有d咩野要完成
今年暑假特別長,有咩搞?
1. 去英國...女皇醫院渡假,仲要一渡大半年
2. 响屋企做下學校工作,想編一套全面d既教材比新移民學生
3. 學普通話
4. 學麵粉花
5. 非繁忙時間去街街
6. 吾做家務既家庭主婦
7. hea----努力咁食同瞓----我會比心機架啦!
8. 等老公收工
9. 寫煲
10. 煲電話粥
11. 散步
12. 打wii
13. MSN
仲有d咩可以做呢?