2008年12月19日 星期五

羅茲威爾外星人成功返回星球

侵略日誌


 


12月18日 


外星人成功入侵廣華醫院十一樓十二號單人房


臨時基地設備齊全,有梳化,電視,雪櫃,獨立厠所,浴室等...D花係吾包既,係Pink Ribbon探我時送既,多謝晒!



 


地球人同我做檢查,仲係右頸下用水筆劃左個箭咀,然後鋪上透明膠紙...


 


無幾耐,麻醉師又到左,問我問題,仲要簽名...


 


5點幾,到外科醫生,又要簽名...


 


太空餐----應該得過神七D餐既!



 



 


妹妹同男朋友黎左開大食會...


KWH既保安非常嚴密,每次只可以有兩個探病親友,出入要登記,人多左又會有專人請返你出去...


大哥大嫂打電話比我,仲叫親愛的帶左份禮物比我...


12點鐘開始禁飲食...


 


12月19日


晨咁早就有人執床...


晨咁早就叫我換定衫等解剖...


8點鐘就比人推左落五樓解剖室...


比好多人問左好多次:叫咩名,做咩手術...


9點鐘開始解剖...


12點鐘左右就醒啦!不過一醒就嘔,嘔左又迷一陣;醒返又嘔...點架!都無食野,嘔咩呀?真係黃膽水都出晒黎!


1點幾,終於清醒返D,想問地球人:係仔定女呀?但都無問到,因為驚佢地會送我入青山...


可以推返上基地啦!親愛的已經係解剖室門口等緊


我問佢:依?我無事推返出黎喎!你仲吾喊?


 


成個下午都仲係有D攰;


到左夜晚,飲左親愛的帶黎既米水,但就全部嘔返出黎...


三哥三嫂黎睇我,買左孖寶蛋糕同紙包蛋糕,仲有芒果;因為芒果可以止嘔,雖然濕熱,但都食左小小,真係無咁想嘔!


再夜D,無咁嘔又無咁暈,開始食到小小野,食左橙同小小大蛋糕...


仲可以落到床去洗手間...


瞓左成日,一路睇住電視都吾眼瞓;到十二點幾時就迫自己瞓...


 


12月20日


又係晨咁早執床


跟手食早餐



 


9點鐘左右,地球人巡房,睇傷口,然後話我可以返回原來星球啦!


地球人走左無耐,二姐同三姐黎左睇我...


10點幾,去左乳病中心學做復康運動...


返到基地,收拾細軟,坐二哥既太空船安全抵達星球!


 


報告完畢!


 


 


2008年12月17日 星期三

中左毒+追魂call到左

電腦中左毒,今日攞出黃金整返,老細仲吾收錢添!


中午時,終於收到廣華電話,叫我聽日入院,後日做手術


本來聽日要去QE覆診,而家吾洗去啦!改左出年先去...


最後20小時,要玩盡D!今晚,要食餐勁既,因為有排要戒口啦!


之後,吾食得魚,牛,雞,羊...仲有咩野吾食得呢?咁大個女都係第一次入手術室,真係吾知吾食得D咩,要準備D咩,要注意D咩...


希望係第一次,亦係最後一次啦!


 


 


 


 


2008年12月13日 星期六

若有若無

呢幾日,電腦又壞鬼左


而家,電腦又好返啦


好似我心情咁,壞左,又好返


壞左,係因為廣華既醫生開完會之後,都係提議我要做全乳切手術


好返,係因為最後都決定可以試下做局部切除手術,但就要承擔更大既風險,有機會要做多過一次既手術


但我都願意試一下


 


因為


1. 無左好吾方便----要帶義乳有D麻煩,做整形


 就要做多次手術(不過可能可以做大佢!)


2. 全乳切都吾保證到D咩,不如博一博


3. 無晒會好吾開心,不如博一博,博吾到先甘心


 


而家,定緊安排入院既電話,電話一响起,就要擰走佬袋入院受死啦!


 


 


 


 


 


2008年12月8日 星期一

我悲觀,所以我快樂

一直有個感覺,我係吾會老架!


正確黎講,我覺得自己無機會老...


癌症,我好早之前,已經預感好大機會會有!


醫生話我中左時,吾開心一定有,但就無好似其他病友/網友咁晴天霹靂,咁難接受,只係覺得:哦!中左拿!終於都到我囉!


我諗我算接受得好好


知道自己中左,第一時間安排工作善後,安排各項治療,安排同親朋戚友見面...


之後,再好好傷心一下...


再之後,忙於進行治療,忙於辛苦...


 


 


去年未發病時的生日很開心,因為去左台灣睇金馬獎;返到香港,老公又幫我搞左個surprise party


 


這是我去年的網誌


3/12 (星期一) 好端端的星期一, 竟然感冒了
                  
真的嗎? 真的拿到金馬獎的門票嗎?


     


4/12 (星期二) 訂到機票了!感冒好了一點


5/12 (星期三)感冒又嚴重了, 開不了口----聲音沙啞了


7/12 (星期五) 下班後要出發到台北了, 但聲音卻更沙啞了


8/12 (星期六) 早上起來時好了一點, 
                   
但擠完星光大道後, 很累

                    但看到了準基, 很高興

                   
進入會場等了很久, 才到準基出埸

                   
準基很可愛啊 
        
                  

9/12 (星期日)早上 : 去買東西了
 
                下午 : 要回家了
                  晚上 : 親愛的到機場接我, 說已經買了壽司, 吃了後便可以休息
怎料...................................................................
回到家, 發現大門沒有鎖....................................
一打開門, 漆黑中有十數人撲出..........................
還捧著蛋糕.........................................................

對啊! 是我的生日啊

謝謝各位到訪的朋友, 也謝謝不克前來的好朋友, 要大家多費心了

更謝謝大家都沒有問我今年貴庚

也謝謝的我的代理人----何敏華和我的妹妹, 為我聯絡我的好友與舊生


謝謝我的老公, 為我聯絡各方好友, 給我一個surprise party


當時,真係好開心,因為無諗過會有surprise party,個種感覺好吾真實


之後,我諗起一套老舊電影,人鬼情未了中既一幕


 


 



 


吾係呢一幕,係繾綣之前,男女主角在床上...傾計個一幕


男主角話:怕好夢成泡影,每次遇到好事,都會怕失去!


 


當年係戲院睇到呢一幕時,我已經無限感慨----當時我都係得十幾歲咋!


 


好開心既surprise party之後,又諗返起呢一幕,好有呢種感覺----我邊有咁筍架,覺得自己吾係咁幸福既人,好怕一切成空...


 


之後,確診左有cancer,反而吾係咁難接受,仲會覺得:嗱!都話左有野跟尾架啦!


 


有時個人悲觀d,有壞事發生時,都好似預左咁,到真係死吾去時,咪當蝕頭賺尾囉!


 


千禧年阿Q都應該係我啦!


 


今年過生日,更加無限感慨,因為:


1. 驚覺要過一個生日吾係咁易架


2. 今年既生日,受左好多苦,好艱難先過到


3. 年年都有今日,但我就未必年年都過得到


4. 吾知出年過吾過到,吾知過得辛吾辛苦


5. 吾知仲可以過多幾多次


 


今年過到,已經好好啦!剛剛親愛的打電話比我,同我講生日快樂,忍吾住,喊左出黎!


 


今年生日,我很快樂!


 


 


 


2008年12月7日 星期日

有無咁暗呀...三陰性乳癌(可吾可以開開燈呀,吾該)


呢幾日既心情好差


前幾日,醫生話我知,我係屬於三陰性乳癌


仲有,我可能要食多半年口服化療藥...


首先,要解釋下,乳癌,係有好多種既,主要引發原因有三種:



1. ER----女性荷爾蒙受體含雌激素受體


      (康復後服食抑制荷爾蒙藥5年)


2. PR----黃體激素受體


      (都係食藥防復發)      


3. HER2----上皮生長因子受體的突變基因


        (康復後進行標靶治療)


乳癌種類可以係單1,2,3,可以係1+2,1+3,2+3......


 


但我咩野都吾係----三樣受體都呈陰性


 


即係醫生都吾知因咩事會有乳癌


 


大部份醫學都係建基於統計,但醫學界就未夠數據去估計三陰性乳癌既成因,更加無藥可治啦!


 


即係話,無得防,無藥食,要復發都無法子...


 


三陰性乳癌係醫學界一大挑戰,開始緊好多吾同既研究,其中得出一d結果:


1. 三陰性乳癌的組織與正常乳腺組織在影像上較難分辨(所以私家醫生都誤診我為良性瘤)


2. 癌細胞分裂增生得較快


(我個瘤兩個月內大左1cm)  


3. 因為上面1同2,發病時腫瘤體積較大,平均


 為3.0cm,其他為2.1cm


4. 因為上面1,2,3,發病時已經進入第三期比率


 較高(66%),其他(28%)


5. 淋巴結轉移比率較高(54.6%),其他(45.6%)


6. 患者通常小於40歲(我都未夠...夠都吾認啦!) 


7. 五年存活率較低1.8倍(吓?咁易死?)


8. 八年內死亡率較高(42.2%),其他(28%)


9. 八年內平均存活時間較低(4.2年),其他(6年)


10.轉移復發機會較高(33.9%),其他(20.4%)


11.好多時會轉移至肝,肺,骨,腦


12.復發高峰期為三年內,即係話醫好一陣就好可能又


 黎過 


13.復發時,好難醫,因為癌細胞增生得快...


 


資料來源:台大醫院


 


 


醫生講解時,我第一時間諗:


1. 吓?咪即係可能好快又黎過?


2. 咁...而家咪好可能係我收尾兩年?


3. 係咪應該辭左份工佢,留多d時間比自己?


4. 但係,吾做野咪好悶?要咁多時間做咩呀?


5. 而且,我好鍾意份工喎!


6. 都係去多d旅行,玩多d啦!吾係咪好蝕!


 


以我悲觀既性格,當時簡直覺得好似已經復發左...


 


過多兩日,自己開解自己,無咁吾開心啦!因為:


1. 都未復發就諗咁多,蝕晒啦!


2. 諗得多,吾開心,仲容易復發啦!


3. 要復發都無法子,都吾到我諗啦!


 


都係個句,活在當下,玩左至算!


 


至於口服化療藥...後話啦!


2008年12月5日 星期五

尖沙咀自由行...尖東海旁

     去完藝術館,已經係黃昏啦!


  


 


尖東海旁已經淪陷為一比九十九:一個不(說)普通(話)人比九十九個普通(話)人


  


 


仔細d觀察自由人:女既,個個個頭都係啱啱電完,簡直比人覺得係上午電完,下午黎旅行;男既,吾洗講,一定係晨咁早起身,花幾個鐘頭時間吹靚個頭...


 


佢地都好重視呢次既旅行:著最好既鞋,最好既套裝,化最好既妝,帶最好既手袋


 


諗返起我同親愛的去旅行,過份到踢對拖鞋就過海關,波鞋都無對;d衫有咁爛得咁爛,去到著完可以丟;一概物品都係用淨小小至帶去,最好可以用完留低,吾洗帶返香港;化妝?吾好玩啦!求其個貓樣嚇吾死人咪算囉!


 


見到佢地開心,我都好開心;又搞到我心思思想去旅行


 


 


之後,入左星星咖啡店坐一陣,抖一抖


 


   Iced Chocolate Paradise,咖啡以外另一選擇


   


 


           聖誕燈飾出籠啦! 


   


   


 


 


之後,Shopping Queen比妹妹急call左去血拼...苦戰至晚上九點幾,死傷慘重...


 


 


 


2008年12月3日 星期三

尖沙咀自由行...香港藝術館

前兩日去街市買豬骨煲湯...


豬肉佬:依?你好似好耐無煲湯喎?


我:係呀,掛住玩咪無煲湯囉!


 


去邊度玩?


昨日星期三,個心十五十六,度度都想去,出得門口已經下午三點幾


結果去左尖沙咀既香港藝術館,因為星期三免費入場,可以慳返小小


推薦一樓既歷代金飾展,d金飾好靚好細緻,有時間要去睇下


 


上左樓,有陶瓷器


 


     真係吾敢相信,咁就幾千年啦! 


  


 


 


       呢個碗焗福字麵啱晒! 


   


 


 


無錯!佢係一個尿壺!真係難為晒隻不知名既四腳小動物啦!不過...個口洗吾洗咁大呀... 


   


 


    我比較好色...彩豐富既瓷器  


  


 


 


      d石榴好多汁呀!隻雀就飽啦! 


        


 


       好想一啖咬落d桃度!


   


 


To be continues...