侵略日誌
12月18日
外星人成功入侵廣華醫院十一樓十二號單人房
臨時基地設備齊全，有梳化，電視，雪櫃，獨立厠所，浴室等．．．Ｄ花係吾包既，係Pink Ribbon探我時送既，多謝晒！
地球人同我做檢查，仲係右頸下用水筆劃左個箭咀，然後鋪上透明膠紙．．．
無幾耐，麻醉師又到左，問我問題，仲要簽名．．．
５點幾，到外科醫生，又要簽名．．．
太空餐－－－－應該得過神七Ｄ餐既！
妹妹同男朋友黎左開大食會．．．
ＫＷＨ既保安非常嚴密，每次只可以有兩個探病親友，出入要登記，人多左又會有專人請返你出去．．．
大哥大嫂打電話比我，仲叫親愛的帶左份禮物比我．．．
１２點鐘開始禁飲食．．．
12月19日
晨咁早就有人執床．．．
晨咁早就叫我換定衫等解剖．．．
８點鐘就比人推左落五樓解剖室．．．
比好多人問左好多次：叫咩名，做咩手術．．．
９點鐘開始解剖．．．
１２點鐘左右就醒啦！不過一醒就嘔，嘔左又迷一陣；醒返又嘔．．．點架！都無食野，嘔咩呀？真係黃膽水都出晒黎！
１點幾，終於清醒返Ｄ，想問地球人：係仔定女呀？但都無問到，因為驚佢地會送我入青山．．．
可以推返上基地啦！親愛的已經係解剖室門口等緊
我問佢：依？我無事推返出黎喎！你仲吾喊？
成個下午都仲係有Ｄ攰；
到左夜晚，飲左親愛的帶黎既米水，但就全部嘔返出黎．．．
三哥三嫂黎睇我，買左孖寶蛋糕同紙包蛋糕，仲有芒果；因為芒果可以止嘔，雖然濕熱，但都食左小小，真係無咁想嘔！
再夜Ｄ，無咁嘔又無咁暈，開始食到小小野，食左橙同小小大蛋糕．．．
仲可以落到床去洗手間．．．
瞓左成日，一路睇住電視都吾眼瞓；到十二點幾時就迫自己瞓．．．
12月20日
又係晨咁早執床
跟手食早餐
９點鐘左右，地球人巡房，睇傷口，然後話我可以返回原來星球啦！
地球人走左無耐，二姐同三姐黎左睇我．．．
１０點幾，去左乳病中心學做復康運動．．．
返到基地，收拾細軟，坐二哥既太空船安全抵達星球！
報告完畢！
沒有留言:
張貼留言