昨日，見了牙科醫生．．．
去年的牙科覆診日本來是６月４日，但當天被急召往見乳腺科醫生，結果牙科覆診日變成了癌症確診日．．．
本來見牙醫的時間推遲到９月，但化療期間白血球低，不適宜進行任何口腔治療，所以安排了在６月１２日．．．
今年的覆診日，剛巧又是６月１２日，真是不無感慨．．．
去年見醫生的心情，可想而知，尤其是安排來年覆診日期時，真怕自己等不到．．．
今年有幸尚餘狗命再見牙醫，真有說不出的興奮．．．
到最後，也是安排來年覆診的環節時，我也同樣地希望我可以平平安安地等到這一天．．．
2009年6月13日 星期六
2009年6月1日 星期一
飛越瘋人院
呢幾日，除左豬流感，最熱門既話題都應該係癲佬斬死四歲童．．．
呢ｄ話題，好自然就胆拖社區精神健康，政府政策，資源分配．．．嗰ｄ都無咩可能解決到既問題．．．
做緊化療時，有三四個月瞓吾到又瞓吾好，而且打左針既第三四日會有異常焦慮，行吾安坐吾落既情況出現，所以，腫瘤科醫生轉介左我睇精神科－－－－我知我知，好多識我既人都認為我應該早廿年就睇啦－－－－因為我又真係癲癲地既！
其實我覺得自己單就患病呢件事上，都算係處理得幾好，接受得幾好，因為我從來都無諗過自己有幾不幸，只係覺得自己成日都好好彩－－－－好彩及早發現；好彩被私家醫生誤診左，拖左兩個月都仲救得番；好彩有咁多親朋好友支持；好彩識到班ｂｌｏｇ友；好彩吾洗死住．．．
生老病死，隨時都會發生喺每一個人身上，發現自己患上癌症，有咩奇呢？
只係恐怕自己抑壓左ｄ負面情緒而不自覺，好似吹波咁，頂吾住既時候爆左出黎．．．
加上化療時無聊，咪去睇下囉．．．
去到九龍醫院既大堂，首先係見到一個女人係度同個汽水機傾緊計．．．
上到二樓排隊交錢，係一條好長既龍，有個電車男由龍頭開始向龍尾方向，逐個問人：你係咪１０Ｅ架？
我見佢就黎行到埋黎，就好似好不經意咁擰轉左個身，點知．．．
親愛的：１０咩野Ｅ呀？你以為自己好出名呀？
你估個個都識你呀？
個男人一路行開一路喺度吱吱噚噚．．．
我忍吾住笑，親愛的問我笑咩．．．
我：嘩！最吾正常嗰個好似係你喎！你胆敢咁樣同
佢講，你吾驚佢係你後面伏你呀？
跟住，親愛的全程要望實電車男行左去邊．．．
交完錢，係大堂等緊既時候．．．
有個斯文蠟頭男係度講緊電話，全程係用hand free黎講既－－－－係無線，無藍牙，同無電話．．．
內容係：
1. 開解下自己
2. 講下人是非
3. 都有ｄ係講時事架
4. 同工作有關
講得都好大聲架，成個hall靜晒，得佢把聲．．．
你又吾好以為佢傻得晒呀，叫名時，佢又有反應噃！又識得比票尾姑娘check......
其他，都係嗰ｄ啦，一方面覺得好淒涼，一方面又要忍住吾比自己笑嗰ｄ啦－－－－我都真係好魔鬼下，但有時又真係．．．
第一次見醫生時，醫生問完一大輪之後．．．．．．
醫生：其實你情況都好好架啦！始終經歷左一個咁大既轉變，你都接受都幾好呀！
我：咁．．．吾食藥得吾得呀？
醫生：得！你都可以吾洗食藥既！咁．．．你想點呀？
我：可吾可以見下心理治療呀？
醫生：可以幫你安排，你一陣要抽左血先走得喎！
我：吓？呢度都要抽？（個排真係抽血都抽乾！）
抽血時，姑娘叫我加油．．．．．．好感動呀！
結果，心理醫生就覺得我既焦慮不安同長期失眠係由於化療藥既影響
好似去運吉咁，但其實，都幾有得著架！
見到咁多人咁轉牛角尖，咁睇吾開，真係幾發人心省架，有咩緊要得過條命仔呢？仲有咩睇吾開呢？
心理醫生問我既問題，真係好到，我有時都會問下自己：你有咩係最擔心架？
我諗我從來都只係擔心吾知幾時先中六合彩．．．．．最好係金多寶嗰期啦！
2009年5月29日 星期五
忍無可忍，吾洗再忍
今日做左件衰野．．．．．．
今早去左女皇醫院照超聲波．．．
醫生指示係要照前早一個小時飲兩杯水，照之前有"殊殊"既感覺先可以照－－－－－－所以成個房十幾人，大部分人都係度練緊忍功．．．
我排第９．．．我忍忍忍忍，忍者上身．．．
點知，叫到６號籌時，有個攞住１５號籌既新人走入黎，一入到黎就已經叫生叫死，又話急又話盛，要姑娘比佢睇先．．．
姑娘就叫左７號入去，佢又鬼殺咁嘈，姑娘唯有問大家可吾可以比佢睇先．．．
其他人都無出聲．．．
我：姑娘，我都好急喎，我吾可以比佢睇先
到７號出黎，佢又鬼殺咁嘈，姑娘又問．．．
８號仔：我無所謂，比佢睇先啦！
佢想衝入去．．．
我：咁即係到我啦！
我入左去之後，親愛的話佢衝左去厠所．．．
之後，佢就緊係照吾成啦！
跟住佢就喺登記處大吵大鬧，話人地吾就佢．．．
內容大至如下：
１．應該邊個急就邊個照先
（咁吾洗派籌啦！有邊個吾急架？）
２．佢個女喺另一座照時，都係邊個急就邊個照先
（嗰個unit既姑娘就真係應該比人投訴啦！）
３．姑娘吾安排佢打尖
（吓？到時又真係到我投訴啦！）
４．其他病人吾就佢（鬼叫佢乞我憎！）
５．醫院安排失當，吾係即到即睇，要等
（鬼叫政府派比醫院既資源有限咩，你估ｄ醫生護士想你等架？又想平，又想靚（比較起全世界，已經算係又平又靚啦），但又吾想比咁多稅，香港人真係好貪心！）
６．單打下我咁啦！
（要一個打完八針化療，肝同腎都傷晒既癌症病人讓比你先？我肯讓，你都吾好意思啦－－－－不過我諗佢都無咩廉恥架啦！）
好心涼－－－－我知我知，我係好黑心，好魔鬼，但佢又真係好乞我憎，淨係識得投訴投訴同投訴！仲要用ｄ咁不合理既理由去投訴！比我做多次，我都吾會比佢先囉！
我諗佢吾係見有男人陪我黎，出聲話左我啦！算佢好彩啦！同本小姐鬧交，咪即係撩鬼攞命！
2009年5月19日 星期二
今日研究院畢業
今日又畢業......
今日係物理治療畢業......
物理治療師：吓？！你得啦！可以著返衫走啦！
我：吓？！（啱啱除左衫瞓低咋喎！）
物理治療師：個刀疤都仲有ｄ緊，要大力ｄ按下佢
，按多一年左右啦！
我：咁．．．係咪吾可以浸溫泉架？
物理治療師：都得既，浸既時候遞高隻手，吾好浸
到咪得囉！（大家想像下個情況．．．
都幾搞笑．．．）
我：咁係咪吾可以按摩呀咁架？
物理治療師：等我睇下你個報告先．．．你切左五
粒淋巴，好小事姐，人地切左十幾粒
就緊係吾得啦！但你記住要按多ｄ個
傷口，否則個疤好容易會痴埋一齊，
妨礙排水；另外，排水運動都要每日
做啦！得啦！攞返張畢業證書（遞左
張覆診卡比我）走得啦！
就係咁，又有一科畢業啦！又覆少一科診啦！
長期請病假既歲月裏，尤其是打化療時，吾出得街，成日在家種草菇，覆診，也成為一個大節目－－－－真係笑中有淚；而家復工啦！過返以往忙碌既生活，覆診，仍然是生活的點綴－－－－監察住身體各方面既機能，又可以提醒自己小心注意健康，所以，我仍然樂意見見醫生護士．．．
2009年5月10日 星期日
回不去
今天是母親節
今天是我第十五個沒有母親在身邊的母親節
我媽本是廣東新會城內的富戶千金，但在大陸變色後，只有跟隨父親來港生活；生活迫人，被送往親戚家作養女－－－－當時名義上的養女，其實跟賣身婢女差不多；可幸的，是養母給予我媽接受教育的機會
小學畢業的媽媽，跟當時眾多年輕女性一樣，在工廠工作，工餘進修，偶像是陳寶珠蕭芳芳，還結識了一班一生的好姊妹
然後，結婚，生了三個激心的細路
細路們一日一日長大
媽媽的年華年復年地逝去
然後，後來，結果，最終，媽媽停留在十五年前的仲夏－－－－永不會變成老人，也沒有見到孩子們成家，不曾過渡九七，不知道什麼是九一一，可能以為沙示是一種汽水，更沒有在電視上目睹南亞海嘯，四川地震的慘況．．．．．．
這些，我都在沒有母親的日子走過了．．．
媽媽，永遠懷念你！
2009年4月15日 星期三
2009年4月13日 星期一
電療後．．．
喺ＱＥ做完電療，要返廣華醫院覆診，因為廣華有姑娘教我護理傷口，又有物理治療師跟進我既情況
姑娘介紹左隻藥膏比我搽，仲要搽到好似cream cake咁．．．
搽左兩個禮拜，又真係舒服好多，皮膚無咁慶，又好滋潤，而家紅印都退左好多啦！
姑娘話我係好少數好好彩既人，原來好多先打化療，再做手術既病人，多數都仲係要全乳切，原因係，就算打左化療先，個腫瘤都吾會細好多；而我既情況就係個瘤比Ｄ藥打到差吾多無晒，所以先有機會做局部切除手術
有時聽到其他人講化療都吾係幾辛苦時，就會覺得點解自己對化療藥既反應會咁大既，點解咁吾好彩呀！
原來，塞翁失馬，焉知非福呢！
今日見物理治療師，佢話我情況都幾好，只係刀疤位既肌肉因為纖維化左，變得好緊，所以而家開始，又要搓my breast啦！
另外，又叫我做多ｄ深呼吸，因為電療時除左電燶左個一尺乘一尺既表面之外，仲會電到個肺，所以會吾夠氣，而深呼吸就可以幫助擴張返ｄ肺氣胞
無以前咁長氣．．．睇怕最開心既都應該係親愛的．．．同埋我ｄ學生．．．
訂閱：
文章 (Atom)