滿清十大酷刑

12月尾到廣華覆診時，醫生話我左面個'鬆'好似或者有機會希望吾係有問題，所以安排左我早ｄ做乳房造影．．．

 

今日，死期到．．．

 

同事：你今日覆診呀？見吾見到靚仔醫生架？

我：今日只得姑娘，仲要係滿清十大酷刑覆診法！

同事：吓？

我：首先，將個'鬆'放上枱（Ｘ光枱），然後，用兩塊透明膠板夾'實'，要'實'到就蒞爆但又未爆之間（嘩！好玄呀！），跟住同你影相（照死光）．．．如果我痛到暈左，姑娘會水潑醒我，或者摑醒我囉！

同事：痴線！

我：真係好鬼死痛架！呀！吾想去覆診呀！

 

咁，當然，時辰到，我都係死死地氣準時到醫院報到啦！

 

見到張姑娘．．．

我：張姑娘！

張姑娘：Hi!

親愛的：（剛剛行入蒞）張姑娘！

張姑娘：呀！又係你呀！（即係認得親愛的）

我：而家都仲係，遲ｄ睇下有無得換啦！

張姑娘：（你隻衰野ar！）

 

等左好耐，姑娘做低左四五個之後，到我啦！

 

先係右面，然後左面；跟住右側面，左側面；再蒞多個上面．．．我張張都交足貨架，我有對鏡頭笑架！

影完著好衫到外面等．．．

等左一陣．．．

姑娘：小黃菊，你要加照呀！入蒞除衫啦！

我：吓？咁大鑊？點解呀？

姑娘：ｍ．．．照到你有鈣化點呀，不過好多人都有囉．．．

 

即時諗：鈣化點．．．即係有異常，有腫瘤，好似仲要係惡性先會出現鈣化點．．．定係個'鬆'生左隻牙呀？咁，今年無去荷蘭睇花展，出年會吾會無機會呀？咁係咪要辭工呀？玩下先再落場得吾得呀？係咪又要化療呀？有無第二ｄ揀呀？又跨欄？咩原來有千五米欄架？

 

除衫，再照幾張，著番衫後，姑娘話要再照多幾張，又要除衫．．．

 

總共照左十九幾張．．．

 

出到去．．．

姑娘：（打開門）你吾走得住喎，醫生send左野蒞叫你去照埋超聲波喎！

我：吓，我十二月尾先照完喎，又照（咁抵？）？

姑娘：係呀，你坐低等一陣啦！

 

一回頭，親愛的已經喊緊．．．

我：（嘩！會吾會開心得早左小小呀？咁快想換老婆？）ｍ．．．都未有事．．．照埋睇下點先啦！（er.......到底係邊個有事呀？仲要我安慰佢，以後吾帶佢蒞啦！）

 

照超聲波時，個女醫生照左好耐，跟住仲要加多個年紀大好多，好似好有經驗既醫生．．．總之又照左好耐啦！

 

著衫時．．．

我：咁，係咪跟返覆診時間呀？

姑娘：係呀！

我：有問題既話會收到電話？

姑娘：係呀！

我：兩個星期左右？

姑娘：係呀！

 

又等電話，又等個電話吾好響起．．．

 

如有笑死，閣下自理

警告：以下事件全部屬實，如有笑死，閣下自理！

 

某一年，任教二年班的中文；

有一篇作文的課題是－－－－我的媽媽

我：同學，有無人吾知媽媽叫咩名架？

一二三四五六七八九隻手舉起上蒞．．．

我：咁．．．嗱，今日返屋企記住問下媽咪叫

　　咩名喎！

同學們：哦！　

第二日．．．

又係我：同學知道媽咪叫咩名未呀？

都仲係有四五六隻手舉起．．．

都係我：咁．．．其實你地可以喺手冊度噚到媽媽

　　　　個名架噃！

同學們：哦！

結果，我收到以下一篇作文：

我的媽媽叫陳太．．．

 

 

有一年，同事收到以下呢份考試卷．．．

有一天，我和媽媽到ＸＸ去，在Ｘ上，我們見到一個老皮皮，老皮皮在Ｘ着ＸＸ，我們見到，馬上走上前去Ｘ老皮皮，我ＸＸＸ，媽媽ＸＸＸＸＸＸＸ，後來媽媽和我ＸＸＸＸＸ，ＸＸＸＸＸＸＸ，老皮皮說：ＸＸＸＸＸＸ，ＸＸＸＸＸＸＸ，ＸＸＸＸＸＸＸＸＸＸＸ，ＸＸＸＸＸＸＸＸ，最後，ＸＸＸＸＸＸＸ！

 

成篇都媽媽ＸＸ．．．

 

跳掣燒fuse

近排，忙．．．

 

試後入分（幾十萬樣勁複雜極抽象的各項進展性評估分，考試分．．．）；

填寫各項試後表格；

試後各科組的長途會議（校務會議，校支組，英文科，常識科，數學科，視藝科．．．）；

編寫進度；

設計英文科寫作工作紙；

編寫全方位教材（包括開會，powerpoint，教學流程，工作紙，活動安排．．．）

帶隊比賽（籃球，舞蹈，兩星期內出了三次比賽兩次表演．．．）

視藝科要安排學生作品參展．．．

 

前個星期五，放學後連開四個全方位教學會議，結果，右面肩頭打上抽筋至右面大腦－－－－名副其實"痴"孖筋．．．

 

星期一至五，最基本的朝六晚六；

有時/常常，還要在home office加班．．．

 

上星期日，帶學生外出表演．．．

這個星期六，帶學生到電視台表演；

這個星期日，黃昏時帶學生外出比賽至晚上十時－－－－第二天，還是要朝早六時正爬起來穿帶整齊上班去．．．真係想請事假（因累請假一天＾＾）

 

上星期一連幾天，工作至夜深；

終於，上星期四晚上，我完成左一個powerpoint，第二個ppt 做左一半時（大概十二點左右啦！），嘩啦嘩啦地一吐而快－－－－真係做到嘔！

我視之為燒fuse．．．

最後，都係做多４５分鐘就瞓啦！都叫做完成左大半啦．．．

 

多項選擇題：

點解小妹會跳掣燒fuse(嘔)呢？

Ａ　因為身體弱左好多

Ｂ　咁做法，超人都死

Ｃ　天讉

Ｄ　犯賤

 

By the way, 近排個腦真係吾夠ＲＡＭ用，好多字都吾記鬼得點寫，吾好話英文（complicated都吾記得點串，要查字典．．．），連中文都吾識（吾記得 "複雜" 個 "複" 字，硬係以為係 "復雜" 或者 "覆雜"．．．仲有 "筋" "痴" "掣" 字都吾記得點寫．．．），呢篇blog寫左我個半鐘（平時１５分鐘就ＫＯ啦！），咁既水平教書，真係呃飯食．．．

吾緊要啦！做晒以上事務性既工作，都無咩可能有時間教好Ｄ書架啦！

港燦北上拾趣記

以前北上，多數都係羅湖城闊太；

而家北上，吾同年齡層面都有；

當然，活動方向都吾同啦！

按摩美容，書城買書，日本餐廳豪吃，小肥羊打邊爐，各式其色．．．

 

這一天，跟狗場主人北上．．．

 

場景一　福田文具批發中心

一面揀文具，一面傾閒計．．．

主人：想買水仙頭，吾知呢度有無呢？

我：副校話佢浸左水仙啦！問我要吾要呀！佢好似

　　都行呢頭架喎．．．

主人：日頭吾好講人呀！但佢好似識去再平ｄ既批

            發喎...

吾夠三分鐘，副校真係出現我地面前．．．

 

場景二　地鐵出口

主人：我上次喺水上明珠都撞到羊sir呀！

我：咁．．．點呀？佢同邊個蒞呀？

主人：我見佢一個人，佢話同老婆蒞喎！

我：（好衰咁）大老婆定小老婆呀？

主人：吾知呀！我趕住入房．．．

我：嘩！比着我，第一時間問佢攞揞口費啦！蝕

　　左啦你！

 

注：羊sir其實係正值老實既好男人，衰嗰個係我！

 

 

場景三　福田人人樂百貨暨超級市場

一班客人在揀緊開心果．．．

主人：嘩！ｄ開心果可以逐粒揀架？

我：依？佢地响南京買返蒞既碧根果噃！

主人：（已經逐粒揀緊．．．）

 

　收穫．．．

　

　

 

其實，都吾知買蒞做咩．．．因為我都吾係好食pancake既．．．但係見到好鬼得意，又平，所以忍吾住．．．

請你滾．．．滾起佢！

學期即將結束，是我們又忙，又快樂的日子！

忙，是因為上下學期交替，要趕緊完成上學期的工作的同時，又要開展下學期的工作．．．

縱然學生上課半天，但我們仍要留守開會改卷入分；但也因為學生下午不用上課，可以回家吃午飯，我們這班奴婢也不用侍候主子們午膳了！

 

平日午飯．．．

 

三十五分鐘內要安排學生洗手派飯食飯收拾食具寫手冊去廁所排隊小息；逢星期三，五仲要膽拖檢查學生手冊．．．

我和同工們都好有效率，簡直係社會精英，國家棟樑啦！咁mission impossible既野，每天都發生，每天都解決到！仲有時間淨．．．因此我吾明點解好多小朋友在家吃飯時，又要氹又要罵，仲要成個鐘！

 

黃金三十五分鐘內．．．

 

學生Ａ：（攞住個食哂既飯盒出來）老師，得未呀？

老師（即係我啦！）：．．．（含住啖飯點頭）乖啦！

學生Ａ：（將個飯盒返入飯箱度，返埋位寫手冊）

 

學生Ｂ：（攞住個食左兩啖既飯盒出來）老師，得

　　　　　未呀？

老師：（嗱嗱臨吞埋啖飯）未得呀！食得兩啖，浪

　　　　費哂Ｄ食物，返埋位再食多Ｄ啦！

學生Ｂ：我好飽啦！

老師：咁我叫你媽咪吾好再安排零食比你帶返學啦！

　　　小息時食完零食，而家又吾願食飯！

學生Ｂ：．．．（無聲出，返埋位誓願．．．）

 

學生ＣＤＥ：（食完飯，鬼殺咁嘈．．．）

老師：（溫柔地）食完飯就寫手冊，或者攞野出蒞

　　　　做，一陣間小息先玩啦！

學生ＣＤＥＦ：（吾識死，繼續嘈．．．）

老師：（仲有半盒飯未食）吾好再玩啦！

學生ＣＤＥＦＧ：（靜左一陣，繼續玩．．．）

老師：（着左火，下刪三百字，太得人驚啦！）

 

每天都發生．．．直至．．．．．．

考試，學生上課半天．．．

嘿！我們會．．．

　

　

　

 

　或者．．．

　

　

 

仲有幾日好日子過．．．

 

追趕跑跳碰日子中的樂子

復工後，忙亂了一陣子，轉眼間，又開始放聖誕假了！

以為聖誕假期可以好好玩一下，豈料整個假期都要背着個大藥煲！

 

　　　　　　　　　第一煲

　　

 

　　　　　　　　　　第二煲

　　

 

 

　　　　　　　最近一煲．．．

　　

　　都未斷尾．．．

 

最後，假又放完，錢又洗晒（去執藥），工又要返．．．仲未病好添！

 

結果，只有在尋常的追趕跑跳碰日子中找樂子．．．

 

本來，我一星期的安排是（亂得）很有規律的：

星期一　最忙亂的一天，放學後回家休息

星期二　這一天不那麼忙，放學後和同事逛街晚膳

　　　　或買菜回家煮飯仔

星期三　工作工作和工作，回家休息

星期四　拚命工作，回家休息

星期五　開會後盡早離開，找樂子去，渡小週末

 

但這一個星期，忙亂了好幾天－－－－忙着工作，忙着看醫生．．．

因此，星期四，拚命工作後，我們再拚命去找樂子！

 

　未入電梯，我們會．．．

　

　

　

 

 

　再看看三年前的我們．．．

　

　食左防腐劑！定係三年蒞都咁白痴．．．

 

 

然後，一個特價２０大元牡丹樓巨無霸餐，三個人分．．．仲要多左兩杯水同一把膠刀（用蒞分贓．．．），每人７個大洋，未食，已經覺得好鬼抵！

 

跟住，逛超市，行左成個鐘，三個人買左五百幾蚊！

 

　送走左保保媽，和狗場主人在快餐廳的快樂晚餐！

　

 

 

第二日，我地仲無聊到作詩．．．

大藥煲要煮risotto

狗場主人要打邊爐

保保媽要食麥當奴

愛美妮食吾到蝦堡

結果走左去噚Juno

 

．．．真係，無聊到爆，白痴到死！

 

有時，快樂真係可以好簡單！尤其係當你吾太介意自己係一個又白痴又無聊的人時．．．

聖誕遊踪

各路英雄：

　　聖誕快樂！

　　願大家在未來的日子，都順順利利，開開心心！

　　你們到了什麼地方玩樂呢？

 

我就到了南Ｙ島，

因為，

我喜歡坐船，

我喜歡大海，

我喜歡看見小船畫破平靜的大海，在船身濺出綿密豐盈的泡沫．．．

　

 

　　趕着去平安夜派對吧？可否帶我同往？

　

 

　　　　有保護色的小狗＠洪聖爺灣

　

 

　　　　　　　　風和日麗

　

 

　　　　　　　觀境亭＠山頂（啩？）　

　

 

　　　　　山下，是水清沙幼的無人海灘

　

 

　　　　　　滿載而歸的釣魚郎

　

 

　

　

　

 

又一個聖誕節，

和親愛的已經渡過了很多的聖誕節，

十多年來，我們都從未停止過對話（當然，當中有不少是謊話吧！），在一起的時光，天南地北，總有話題，總有笑位，我想，這樣大概不容易吧！

 

昨天，在山上，（碌）落山時．．．

他：其實我成日都吾覺你就蒞四十歲．．．

我：吓？我似五十歲咩？

他：我覺得你似廿幾歲囉！

我：想借幾多？

他：一千呀！

 

很無聊吧？

但我覺得很幸福．．．

有人陪我郊遊，

有人陪我從街頭吃到巷尾，

有人陪我說無聊話，

我覺得很幸福．．．

謝謝你，親愛的！

 

愛一個人不難．．．

要你愛的人也愛你，大概要看緣份吧！

要你愛的人長久地愛你，我想，是很不容易的一件事！

我想，我還是幸運的！

 

希望你們也能找緊自家的幸福，常常都能遇見幸運！

聖誕快樂！