後日係去廣華覆診既大日子，因此呢幾日既情緒都吾係好穩定，因為．．．
好吾想做手術，因為．．．
第一，怕要全乳切
第二，做左手術之後，右手，就殘廢左啦！
以後，吾可以擰重野，最多只可以擰四個小橙既重量
以後，吾可以擰靚靚大手袋
以後，吾可以擰盛滿水既水煲
以後，吾可以再揸鑊，咩鑊就得
以後，吾可以打羽毛球，籃球，乒乓球．．．
以後，仲要每日四次做排水既運動，要做一世．．．
初初知道自己有癌症時，最重要係執返條命仔；
而家執得七七八八，又得一想二，想保住個胸，想保住隻手．．．
好似．．．有資格申請傷殘津貼個噃？吾知個車牌可吾可以掛個傷殘牌架呢？泊車可以方便好多架！
唔好諗得咁嚴重啦! 只係儘量唔好拎咁重嘢喳!
回覆刪除[版主回覆11/25/2008 21:06:00]吾可以打ｂｏｘｉｎｇ啦！
不要想得太灰.... 一切交給上天安排, 心中有平安!
回覆刪除[版主回覆11/25/2008 21:06:00]多謝！
吓！原來影響會咁大，我以為只係會影響外觀，原來手都有關連…… 咁……唔做手術掂唔掂？
回覆刪除[版主回覆11/25/2008 21:05:00]吾做手術．．．會死囉！
唔使怕喎,全乳切除,可以再重建.
回覆刪除[版主回覆11/25/2008 21:05:00]都會吾開心
無想像中咁差嘅，唔好自己嚇自己啦！
回覆刪除[版主回覆11/25/2008 21:05:00]我個人比較悲觀ｄ架！
但如果您講嘅情況真係出現咗 其實重可唔可以渣車呀? 喺英國 ~ 有Disable標誌 可以在任何地方泊車 更不用付泊車費呢 香港市民應該沒有這種「禮遇」吧 .... ....
回覆刪除[版主回覆11/25/2008 21:04:00]好似無咁筍
我就快又要做電療喇 過多幾個鐘就要去劃位
回覆刪除[版主回覆11/25/2008 21:04:00]祝你順利！
看開心一點吧, 起碼你還會康復 我外祖母兩星期前diagnosed with breast cancer 末期了, 也不打算做任何手術/化療 時間... 大概只有3個月至1年 所以, 你很幸運了 =]
回覆刪除[版主回覆11/25/2008 21:04:00]
但你外祖母比我活得長久多了！呢個角度睇，她比我幸運啦！
或者乜事都無, 唔駛做手術呢
回覆刪除[版主回覆11/25/2008 21:01:00]吾做手術．．．應該會死囉
之前腫瘤已經縮細, 經過八針的努力, 可能已消失, 不需太擔心
回覆刪除[版主回覆11/25/2008 21:01:00]希望啦！
ok架，我隻手也切了林巴，只要勤力做運動，就可以好正常架，我開頭都好唔慣，覺得似廢人，但現在唔覺得自己廢啦，仲好過正常人。
回覆刪除[版主回覆11/25/2008 21:01:00]多謝你既安慰！
做下其他野,分散下D注意力.願明天一切順利.
回覆刪除[版主回覆11/25/2008 21:00:00]所以今日去左見朋友同ｓｈｏｐｐｉｎｇ
邊有咁嚴重呀？唔係一世都係咁，係頭幾年啫，淋巴水腫係可以靠做運動有改善架，比D恆心做就OK啦！我都切咗一邊，做返整形就得啦，中意做埋隆胸都得(講下笑咋)，行出街，你唔講無人知，老公唔介意就得啦。我都切咗5粒淋巴，而家一年啦，傷ロ皮膚係仲有D奇奇地感覺，但一樣拎到靚大手袋，揸鑊(我隻係双人牌添)，打乒乓球(唔好一味掛住扣剎就得啦)...化療咁難你都挨過，做運動啫，你一定得，仲有我哋咁多人陪你。
回覆刪除想想如果セ後遺症都無，但連命仔都無埋，咁咪仲弊。努力呀Daisy！支持你！Pray for you...
[版主回覆11/25/2008 21:00:00]真係做幾年就得？吾係要做足一世架咩？
以後，吾可以擰重野，最多只可以擰四個小橙既重量 <<0甘咪好0羅, 明正言順叫人做
回覆刪除以後，吾可以擰靚靚大手袋 <<擰手袋仔先似闊太嘛
以後，吾可以擰盛滿水既水煲 <<你擰盛滿水既水煲做咩? 用電煲嘛
以後，吾可以再揸鑊，咩鑊就得 <<揸鑊? 你煮完整到污污穢穢叫人洗, 爽呀
以後，吾可以打羽毛球，籃球，乒乓球．．． <<0甘打機呢? 打blog呢?
以後，仲要每日四次做排水既運動，要做一世．．． <<我日日都唔止shu shu四次wor
好似．．．有資格申請傷殘津貼個噃？吾知個車牌可吾可以掛個傷殘牌架呢？泊車可以方便好多架 <<呢個好呀, 你約我去街0甘我就唔使煩搵位泊車啦
加油呀, 凡事有兩面, 多向好方面諗呀~
[版主回覆11/25/2008 20:59:00]多謝晒！
放心, 隻手無你唸得咁嚴重, 每日只要做半小時伸展運動, 其實冇病都應該做架, 被免拎重野, 我地平時都唔係做粗工既人, 其實影响不大, 如果要拎重野咪叫你親愛的拎或帶車仔去拎都得, 你重可以游水, 太陽下山後, 被免被太陽晒傷, 要小心保護患支, 如有任何損傷應立即消毒, 包括蚊咬 至於拎水煲的問題, 好簡單, 我轉晒不銹鋼煲, 落水煲湯改用湯碗裝水, 代替一次過裝一大煲水用手拎, 我冇病時都係咁做, 因為我之前用的黑色厚身大瓦煲好重, 連埋水更加重到拎唔到, 我都係用湯碗裝水 鑊用易潔鑊都好輕, 可以用左手拎, 冇問題架 拎大手袋應該冇問題, 不過唔好拎成日咁耐, 真係有咁多野拎咩? 女人手袋最多咪銀包, 鎖匙, 唇糕, 紙巾, 縮骨遮, 拎呢幾樣野係冇問題喎 你重有隻左手姐, 可以咩左邊, 我都係咁, 絶對冇問題 盡量訓練隻左手做啦, 好容易, 我而家都適應左 人係適應能力好強的動物, 你咁叻女聰明, 只要想一想改變一下方法就可以適應 你應該唔駛做全乳切除, 執返條命應該唔好咁執著, 小心保護患支, 愛錫自己身體
回覆刪除[版主回覆11/25/2008 20:50:00]多謝你既安慰，多謝你既資料提供，其實我到而家都吾係好知後遺症既低線係點架！
而家唯有習慣下用多ｄ左手啦！
唔好咁擔心, 化療咁艱難你都捱過咗, 你會冇事的, 我聽日都要返醫院檢血見醫生, 睇吓使唔使打白血球針, 大家一齊努力, 加油, 加油!
回覆刪除[版主回覆11/25/2008 20:48:00]加油呀！
我最初都有咁諗呀.我原本係左手怪.依家咪掉返轉囉.慢慢會習慣.講真.做咩防水腫運動..我都係每日早晚係床到做彩虹放上blog那條短片跟著做...其他都無咩...運動那些我就唔知..重野就真係有少少避.
回覆刪除你應該不用全乳的.醫生話依家先化後做手術的目的在於縮細個瘤保留乳房.不過.醫生話有些病人反而會自己要求全乳.好似覺得徹底些好些咁.其實效果一樣喎
總之唔晒驚.呢到好多個人都係咁做.我全乳後總咩都無整呀~咪又係咁過~ ~努力呀~化療都完成晒.其他的事不用怕!
[版主回覆11/25/2008 20:48:00]好多運動都再做吾到啦！本來想去泰國芭提雅學泰拳ｔｉｍ，而家都吾洗諗啦！
放心啦﹗你睇見我抱long哥，你就唔會覺得嚴重﹗
回覆刪除[版主回覆11/25/2008 20:47:00]咁你隻手吾會水腫咩？
傻婆，睇吓幾多人支持你！
回覆刪除無論你多咗啲乜小咗啲物，我哋都係咁愛你！
[版主回覆11/25/2008 21:31:00]咁就要多ｄ幫我咩下鑊啦
很多人關心你及鼓勵你. 你一定要挺過去.
回覆刪除我都覺得, 如果全割是可以把病魔殺絕的, 就豁出去!
鬥志不死!
[版主回覆11/25/2008 21:31:00]多謝你呀！
緊係唔會日日抱啦﹗不過重野我間中都會拎，暫時未有事，遲D就唔知LU。
回覆刪除[版主回覆11/25/2008 21:30:00]你好堅呀！
最緊要保住命仔嘛!
回覆刪除支持你!
[版主回覆11/26/2008 20:03:00]都係架！多謝！
平常心啦﹗唔好太緊張，煮到埋唻就食
回覆刪除[版主回覆11/26/2008 20:03:00]食吾切．．．
因為呢套唔係英國,係香港
回覆刪除[版主回覆11/26/2008 20:04:00]香港又有香港好架姐！
你睇吓，咁多人支持同鼓勵你。啲過來人嘅經驗分享，唔駛咁担心啦。
回覆刪除只要執番條命仔，都可以過回正常生活了。雖然有啲事我們不可做 (例如浸温泉)，但仍有好多好多好多事可以做啊！
啲粗重嘢梗係留番俾你嘅親愛的做啦，有哂藉口啦！
[版主回覆11/26/2008 20:05:00]浸吾到溫泉．．．
(Empty)
回覆刪除[版主回覆11/26/2008 20:05:00](Empty)
唔好太擔心, 就算要做一世伸展運動都係當keep fit 姐, 好多人每天做 2 至 3 小時健身都係咁啦, 做半小時伸展運動, 咪當柔軟體操keep fit , 好多公公婆婆每朝一早落公園打太極都係咁啦, keep 住做身體都好d 架
回覆刪除[版主回覆11/26/2008 21:13:00]要做當個鐘咁耐架？咁一日要做幾多個半個鐘呀？
關於淋巴水腫，其實好視乎切除了多少粒淋巴。零至一期乳癌，癌細胞只於乳房位置，二期或以上，會於腋下或更遠的位置發現。之前做檢查，會知道癌細胞去到那裡。原發位置的癌腫，會因電療縮小，要切除幾多淋巴，視乎檢查後該淋巴是否高危，是否要切除。切除全乳不代表淋巴水腫會較嚴重，但切除了腋下淋巴，水腫較難消退，要恆心和耐心做拉筋運動，避免拿重物也是必需的，而且根本就拿不起。手術後由拆線開始，要量力而做拉筋運動，一般在一個月內，四肢活動角度會回復，但腫脹感覺會持續 (参看： 術後篇 及 分享 )，一般這拉筋運動要做一年，但一年後仍是會有少許腫脹感，但肯定會越來越有改善的。
回覆刪除患病後，一定體力不復當年，尤其化療後對心臟定有形响，就好像隨着年齡長大，我們不會像小孩子蹦蹦跳跳，但你仍有很多活動可以做呢。化療比手術和電療都辛苦，即是你己過了最難的一關，邁向康復。努力呀，勇敢面對，有鬥志，不認輸，是成功的一半！加油呀！擔心就祈禱啦！會安心好多，因為有主同行。Pray for you...
[版主回覆11/26/2008 21:14:00]多謝你既資料呀！
汪明荃, 葉麗儀, 蘇絲黃, 都做了割除淋巴結手術 其中汪明荃同葉麗儀做了超過十年, 你覺得佢地似唔似傷殘人仕呢
回覆刪除[版主回覆11/26/2008 20:02:00]我又真係吾知阿姐都做左喎．．．
好番仲要切
回覆刪除[版主回覆11/26/2008 20:01:00]未好番，吾切好吾番．．．
加油
回覆刪除[版主回覆11/26/2008 20:00:00](Empty)
每天臨睡前做半小時即可, 你睇我個BLOG 既乳癌手術後伸展運動, 好簡單, 既可預防淋巴手腫, 又可加強睡眠質數 汪明荃曾患過甲狀線癌和乳癌 http://the-sun.on.cc/channels/ent/20050127/20050126232701_0003.html
回覆刪除[版主回覆11/27/2008 21:15:00](Empty)
您啱 您啱
回覆刪除[版主回覆11/27/2008 21:15:00](Empty)
先唔好想得太多,太複雜, 一切順其自然吧,最緊要就係將個衰瘤割左出呢先,其他的...別想太多,我地個個完成療程都好ok呀...駛乜驚...努力呀.
回覆刪除[版主回覆11/27/2008 21:15:00]咁又係．．．