吾識節制既後果

由於昨日吾識節制，一用電腦就用左六個鐘，又玩MSN，又巡BLOG，又上家族，又寫BLOG；結果，搞到夜晚精神緊張

 

 

 

加上打左幾日白血球針，所以骨骼開始有反應，尤其牙關有Ｄ合吾埋－－－－都幾搞笑架，成晚都好似金魚咁！

 

 

而且，一日嘔幾暈，真係肺都甩呀！

 

 

結果，未夠八點，就係間屋度行黎行去

 

 

 

親愛的見到就梗係好心痛啦！所以我未夠九點，就破戒食左粒安眠藥瞓啦！

 

 

 

安眠藥呢家野，我已經熟知佢既個性啦！食左，個人好暈

，好沉重！而且，早食，早瞓，早醒！

 

 

 

有幾早醒呢？半夜兩點幾！

 

 

 

都吾錯架啦！有得瞓成六個鐘－－－－雖然中間醒過一次去洗手間

 

 

瞓醒左，精神好左，金魚游走左，又吾見作嘔作悶，亦都吾洗行黎行去，個人鎮定左好多，但就有ｄ肚仔餓；不過，都係吾敢再食野啦！

 

然後，咪HEA下囉，好在保媽借左溫馨既 '我們這一家' 比我，等我可以消磨下，輕鬆下！

 

又結果，四點幾，有Ｄ累，再食半粒安眠藥，咁又瞓到八點幾勒！真係好！

 

所以，今日決定吾打白血球針住－－－－因為打到六至七針時，白血球過多，會骨痛同發燒－－－－今日都有小小痛啦！

 

 

 

遲一日先打－－－－即係九月一日放左學至打，否則，要頂住骨痛返學，好慘架！

 

 

 

希望好Ｄ啦！亦都希望可以捱多幾日，返多幾日學，開心下啦！

 

 

今日，雖然都有作嘔，但就無真係嘔啦！下午仲同親愛的行左一陣街街

 

 

今晚要早ｄ瞓，聽日要早起返學

 

但係而家仲好精神喎－－－－一陣間打一陣ｗｉｉ，再浸返個泡泡浴，再吾得既，咪唯有再破戒囉－－－－希望吾洗啦！

 

 

 

 

 

每當天氣變幻時

不得不承認，我係一個長期病患者

 

 

只要有風刮起，馬上來一個噴嚏－－－－無論當天天氣係幾多度

 

 

所以只要入到有冷氣既地方，要即刻多穿一件外套

 

 

凡係衛生署有咩公佈，都係同我地呢ｄ同期病患者講－－－－因為我地既抵抗力特別弱

 

 

我都會留意下中國既廿四氣節，好似大暑小暑處暑立秋中秋咁，因為會直接影響病人體質既變化，亦都比較容易病！

 

 

 

呢幾日，特別熱，瞓到半夜，一頭都係汗－－－－除左熱，亦都可能係ｄ止嘔藥既副作用

 

 

 

一過朝早十點，一頭都係汗，所以吾想再食止嘔藥－－－－因為會一頭汗之外，又會昏昏欲睡

 

 

 

但係吾食止嘔藥，又真係止吾到嘔．．．．．．今日又嘔啦！

 

 

無法啦！食就食啦！

 

 

 

唯有安慰自己－－－－比起第一二針，而家，已經處身於天堂啦！

 

 

感謝主．．．第四針真係好清爽

第四針同第一二針比較起上黎，真係一個天，一個地

 

雖然都係有嘔，有暈，有作悶，但就無左我最最最怕既過度活躍

 

第一針之後，頭兩日又瀉又嘔，兩日都瞓吾到，又過度活躍；

幸得相熟既有料私家醫生開到ｄ藥比我，等我起死回生；

過左頭七，稍有好轉時，竟然發高燒入院七日吊抗生素；

返出黎幾日，又要再打針，再死過－－－－好忙呀！

 

 

第二針，頭七都未過，就因為過度活躍要求特別診，急求靈藥－－－－瞓覺藥同鎮定劑；

吾夠兩日，又發燒入院－－－－又係好忙！

 

 

第三針就好好多啦－－－－只係嘔下，只係作下悶，只係標下冷汗，只係有ｄ累，只係無咩精神，只係心跳手震姐，已經好好架啦！

時間多左，開始好驚自己一個人，好驚悶，要成日找節目，要有人氣，要找人陪

結果，打晒ｄ友情牌，過左一個好開心既第三針

 

 

捱左咁耐，終於都黎到第四針啦！如上所言，副作用少左好多，只係嘔下暈下標下冷汗之類！雖然行得慢ｄ，但都叫行得走得，吾洗人扶－－－－原來，我已經淪落到咁低要求啦！

 

 

學校開學既日期又迫近啦！從未試過咁期待開學！可以返去搗亂啦！

 

 

 

 

 

帽同頭巾

未掉頭髮之前，野心勃勃，諗住日日戴假髮，一口氣買左兩個假髮，所費不菲......

結果，由於天氣太熱，小英１號同２號出埸既次數，係少之又少.......

 

太難頂啦！見暈tim呀！

 

加上，我吾太介意人地既目光－－－－係囉！我係有病囉！仲吾讓個位比我坐？

 

所以，而家出街時，都係靠佢地......

 

Ｎ年前係泰國玩時，吾覺意買既，平（幾十蚊港銀），靚，柔軟舒適，包到個頭又吾見熱，而家，買吾返啦！　

 

 

前兩次去泰國買既（係呀！我都去得好密架！），襯返我Ｄ粉紅Ｔ，百幾港銀啦！平過香港買，都幾型仔！但就遮吾晒個光頭......　

 

 

 

前兩個星期係狗仔衫店買既，愛不釋手，因為可以遮掩晒無頭髮既地方，一般人直行直過，係吾覺我無頭髮架－－－－不過就吾平囉，折左都要２百幾

 

試過戴住佢入左買化妝品既地方，個店員仲介紹佢地既特價洗髮水套裝比我~~

親愛的拿拿淋拉我走，仲一面行，一面講：我老婆有名你叫長毛啦！．．．．．．其實我真係吾介意架！有無試用裝呀？　

 

 

 

呢頂有水晶／定係膠珠既就貴啦！成三舊水咁制！

話說有一日約左姐妹係旺角食ｔｅａ，包住條巾出去，諗住去到戴返頂帽－－－－點知出到去先發現吾記得帶帽！

剛巧個排瞓吾到，精神面貌都差，為左吾想嚇親街坊，拿拿淋四出搜尋見得人既帽子，結果，呢頂都係勉勉強強咁啦！但係就好肉痛囉！　

 

 

 

如果好熱，又要出街，會先以頭巾包頭，到左有冷氣既地方先至大挪移－－－－換返頂帽！

 

 

以下係我常戴既：

上年冬天去韓國時買既，一式兩款，有新舊既首爾地圖，由於係月下貨（Hi！ Seoul 係當地旅遊局既夏天宣傳口號），所以我都係响ｄ便利店ｄ吾起眼既地方尋寶咁找出黎，仲有特價ｔｉｍ　

 

 

呢條就新鮮熱辣好多，係電車男由日本空運送到既，ｄ色好靚，襯到好多衫架，而且布質通爽柔軟，又夠大條，好好用架！

 

 

 

 

 

 

 

 

好大陣病人除

 

打左針後，成日都嗅到自己身上的病人除

 

所以，呢幾日會：

1. 盡量打開晒屋企的窗

2. 噴下香水

3. 用濃味入浴用品浸泡，又可以令自己瞓得好ｄ

4. 四周噴下d香香噴霧

5. 插下d香花

6. 開少D冷氣

 

 

八鄉狗場主人由泰國帶返黎既香氛，係我喜愛既西柚味，可以加水後噴灑於屋內

 

 

自己係優之良品買既西柚味浴鹽，好清香，又吾太貴，只係＄４０，比卓悅既浴鹽清好多，香好多

 

 

天水圍師奶提供的泡泡浴露，勁多泡，泡沫細密纏綿

 

 

又係天水圍師奶提供既，不過未開　

 

 

而家，日日都可以有好心情啦！

洗衫大好日子

 

颱風走左，風和日麗，又係洗衫既大好日子

 

 

 

雖然遠處仲有層層疊疊的雨雲，未算係好天朗氣清，但已經令我心情好好多啦！

 

今日都無咩特別，都係作下嘔出下冷汗咁啦！過度活躍都未到；

所以今日可以同親愛的到街市買野，回家又可以親手煲湯；

又可以食到ｄ野；

又可以睇電視同雜誌；

仲可以上網寫blog添

今日真係要感謝天主比左咁清爽既一日我

 

 

 

 

 

 

病簿二十二......打針後既第二日同第十二日既分別

今日係打針後既第二日，真係好似天山童姥散左功咁，好虛好虛！

 

昨日食左野都嘔返出黎，諗住飲杯菊花茶清下佢啦！連杯茶都完完本本出返黎－－－－比條路行下好喎！

最後，出絕招－－－－食橙！

結果，昨日既戰績就係食左兩個橙勒！

結果，虛到要親愛的事事為我張羅......

 

例如：

　　

我：好熱呀！

親愛的拿拿聲去開風扇

 

又例如：

我：想食橙！

又拿拿淋開個橙我食

 

再例如：

我未出聲，已經倒定ｄ水比我飲

又會日日掃地拖地清潔家居

仲會用扇同我撥涼

又會幫我按摩令我容易入睡

 

但係，出得黎行，預左要還........

 

 

十二日後......

 

早上　

我會一早起身出街買餸，返歸煲湯煮飯等親愛的返歸

 

飯前

親愛的：洗吾洗幫手呀？

我：吾洗，你出去坐啦！

 

飯後

親愛的：等我洗啦！

我：千祈吾好，等我做，可以消磨下ｄ時間，有返

　　ｄ運動，可以早ｄ瞓得著！

 

頭七快ｄ過啦！

最辛苦既第三四日就黎啦！有無棍呀？扑暈我先啦！

 

病簿二十一......天山童姥

中學時最愛刨金鏞小說

 

 

大家記吾記得天龍八部裏面，虛竹和尚遇上天山童姥既一段呢？

 

話說虛竹遇上一個小女孩，小女孩十分虛弱，功力全無－－－－原來她正是手段毒辣，武功高強既天山童姥；只是當時佢剛散功，所以武功全失

 

親愛的話我似天山童姥－－－－打針前，行得走得，食得玩得，武功高強，手段毒辣......；打針後......吾洗講啦......

 

 

本來昨日係打第四針既日子，但因颱風既關係，ＱＥ星期四已經

左我返去抽血，並通知我如果星期五打吾到針，就今朝早去補打

 

 

所以，又可以輕鬆多一日啦！

 

 

 

由於三七呢個星期行得走得，又吾洗入廠維修，所以日日有街出，亦都日日有食神，食左好多野，所以肥返幾磅，而家總數都係無左廿五六磅......

 

希望第四針又比第三針好啦！

 

而家，剛剛死完返黎，仲好快手咁食左碗麵，叻呢？點知轉個頭就成碗嘔返出黎..........果然係天山童姥......

 

營養補充品又要出動啦！

 

 

 

 

 

 

我的頭七和三七

頭七：打完針頭七日，所有副作用出晒黎，比死更難受

三七：打完針第三個禮拜，行得走得食得瞓吾得，但已經好開心

頭七就吾好提啦！

三七，日日出街會親朋好友，朝朝去街市買餸煲湯煮飯，晚晚打wii游水做運動，都好開心，好精彩

都係要多謝親朋好友撥出寶貴既時間同我killing time啦！

 

　月上柳稍頭，人約黃昏後－－－－去奶奶家途中

　　

 

 

　　　　　　有閒情逸緻可以插下花　

　　　　　　

 

　　　　　煮飯煮到悶，轉下口味包水餃

　　

中間個幾隻創意水餃係親愛的既作品，我就悶ｄ，包極都係咁既樣！

 

本來今日又係頭七既第一日－－－－今次第四針啦！但因颱風既關係，昨日被ＱＥ召左去抽血，聽日早上先打針！

又可以輕鬆多一日啦！

聽日先再死過啦！

而家要死去煮飯啦！

下一個可能係你...............

被朋友所害，要玩答問題遊戲！

遊戲規則如下：

被點中名的朋友請像我一樣回答所有問題，並發一篇BLOG在自己的網誌上！回答之前，請刪除一條你不喜歡的問題，另出一條問題代替。完成後，再點另外10個人繼續遊戲，並到這10個人的BLOG留言通知對方。

被點名者不得拒絕回答問題，不完成遊戲的人，會是一個無義氣的人！

1）你自己的最大優點？

喜歡令身邊既人／朋友快樂

 

2）你最鍾意什麼活動/運動？

同親朋戚友親愛的一齊，玩咩都開心

3）到目前為止, 有咩令你最難忘?

證明患上癌症　

4）你最想去旅行的地方是哪裡？

法國南部既普羅詩旺

英國既運河船屋

阿拉斯加或芬蘭睇極光

5）人生中最後悔既事？（自己出的題目)

未有好好照顧患病既媽媽


6) 如果一生人只可以吃一種食物渡日，你希望那東西是什麼？

水果　

7) 妳生日想媽咪同daddy點同妳慶祝？

同我一齊就得啦

8) 人生中，最快樂嘅一件事

認識我老公

9) 你最欣賞嘅人？

努力謙和又幽默既人

10) 如果可以再選擇, 你還會選擇現時的伴侶嗎?
會.......因為怕佢會睇到呢篇blog

要老點10個人, 中獎者係：睇到呢篇ｂｌｏｇ既人，自己執生啦！

人彘的製作過程

 

　　根據史記記載, 漢高祖劉邦有位寵妃----戚姬; 也有位妒忌心極強的皇后----呂后

　　話說劉邦死後, 呂后把戚姬砍斷手腳, 挖去雙目

, 熏聾兩耳

, 藥啞喉嚨

, 將之扔在茅厠中

, 起名"人彘"

 

　　2008年的盛暑, 讓我們一起來把"人彘"重現人間吧!

 

                    

首先, 砍斷雙手

 

                    

然後, 砍斷雙腳

 

                  

再者.................

 

　　由於餘下過程過於殘暴

, 未能通過廣播事務處的檢測

, 該等片段無緣播與各位觀賞了