走過化療的日子．．．入睡的秘密

你地係點樣瞓覺架呢？

 

細個時，好難先可以入睡，早早上床，但就搌轉反側，想東想西，看看書，聽聽音樂都未能入睡

 

近呢十幾年，我有一個秘方，百試百靈，完全無失眠

 

呢個秘方就係－－－－金田一一少年事件簿

 

無論本漫畫睇過幾多次，只要睇幾頁，即刻瞓得着，快過ｄ安眠藥

 

但係，童話都有幻滅既一日

 

第一針既第二日，我想瞓下啦，於是攞出金田一一，睇完成本，都瞓吾到，仲愈睇愈驚，開始有精神緊張既情況出現

 

之後，３６個小時未能入睡，童話幻滅

 

而家，要夜晚可以睡得著（都吾敢諗瞓得好呢個問題），無所不用其極：

1. 家庭醫生教，日間撐住吾好瞓，小小都吾好

2. 吾可以飲茶或咖啡，但有ｄ花草茶就可以幫助入

　睡，可以試下啱吾啱自己

3. 日間要消耗多d，因為平日返工時，無論係體力或

　腦力都好大消耗；做多ｄ運動，最好係游水，最少

　都要散下步

4. 打機或睇書，令自己傷神ｄ

5. 浸浴，化療時醫生提議既，加入可以令自己放鬆既

　入浴劑

6. 親愛的會好輕柔咁幫我按摩下

7. 噴灑或抹上有香味既噴劑或潤膚露，據聞薰衣草味

　可以令人放鬆ｄ，瞓得好ｄ

8. 食ｄ安神既野，好似圓肉，蓮子百合咁

9. 聽音樂，我會聽住Kenny G令自己容易ｄ瞓著

10.無辦法之下都會食安眠藥，但最多都係打完針食

　三日，之後就努力戒左佢，吾想依賴左

11.護士小姐教：躺在床上，全身收緊，然後慢慢放

　鬆，做幾次，可以幫助入睡

12. 自我催眠http://pda.cellinnet.com/free/hk_apple/sub_main.php?iss_id=20081020&art_id=11739658

 

由於長期瞓吾到又瞓吾好，令我吾敢去海洋公園，因為驚ｄ人誤會左安安佳佳走左出黎．．．

 

 

午後凶鈴

今日係與Bloggers相聚既日子，亦係我白血球最低既日子（剛好化療針後第十日），所以，留一陣就要走啦！

 

預備左ｄ小禮物比Bloggers，不過就吾係好多，因為製作需時，我手腳又比較慢．．．

 

而家就好似打機咁，整日在家，蓄埋ｄ能量，等去Gathering時一鋪用左佢！

 

本來都無咁驚架，但昨日接左個午後凶鈴，令我不敢造次．．．

 

午後七點幾．．．

我：喂！

對方：吾該你黃佩英女士呀？

我：我係．．．

對方：我地係九龍醫院化驗室呀！你今日見醫生之後

　　　咪抽左血既，我地發現你ｄ血有ｄ吾正常，提

　　　議你去急症室度check下

我：吓？．．．其實，我剛剛打完化療針，ｄ血吾正

　　常都好平常咋喎！

對方：哦！原來係咁！

我：係咩野吾正常呀？係咪肝酵素高呀？

對方：咁又吾係，係白血球低姐

我：哦！咁都好正常

對方：其實你個醫生都有提過，但我地循例都要打電

　　　話提一提你，你好好休息啦！

我：麻煩晒你啦！

 

而家政府醫院既服務真係好好，對方又好有禮貌，最窩心個句係叫我好好休息．．．

 

 

再世為人

今日晚飯時，突然有一種再世為人既感覺

化療初期，胃口差，身體弱，咩野都食吾到，邊度都吾去得，只可以在家待好；

而家，最後一針化療針，雖然身體上仍然有好多好多既不適，但今日食到大半碗飯，食到鮮香味美既餸菜時，已經非常非常感恩，同時，亦都有無限感慨－－－－我係點樣走過黎架？真係走完化療？真有點難以至信！

只要捱多幾日，以後都無咁辛苦既日子啦！

 

 

　　　　昨日妹妹送的打氣花

 

 

病簿四十一......手術前

終於到左去廣華覆診既大日子啦！

 

以為今日會決定到幾時做手術，同埋點樣做手術，但原來係吾得架！

 

今日只係好初步咁討論下個手術點做，包括有：

plan 1　局部性切左，但就要照左x-ray先知得吾得

plan 2　全乳切，吾整形住，方便電療

plan 3　全乳切，加整形

 

結果，我就梗係想plan 1啦！所以而家要排期做x-ray，再決定手術點做．．．

 

希望一切順利啦！

 

 

 

 

比返隻手我

後日係去廣華覆診既大日子，因此呢幾日既情緒都吾係好穩定，因為．．．

 

好吾想做手術，因為．．．

第一，怕要全乳切

第二，做左手術之後，右手，就殘廢左啦！

 

以後，吾可以擰重野，最多只可以擰四個小橙既重量

以後，吾可以擰靚靚大手袋

以後，吾可以擰盛滿水既水煲

以後，吾可以再揸鑊，咩鑊就得

以後，吾可以打羽毛球，籃球，乒乓球．．．

以後，仲要每日四次做排水既運動，要做一世．．．

 

初初知道自己有癌症時，最重要係執返條命仔；

而家執得七七八八，又得一想二，想保住個胸，想保住隻手．．．

好似．．．有資格申請傷殘津貼個噃？吾知個車牌可吾可以掛個傷殘牌架呢？泊車可以方便好多架！

第八針

第八針，種藍豆時．．．

姑娘：你仲有無打白血球針呀？

我：無啦！醫生話可以試下吾打

姑娘：記得你好掂呀，第二日就話可以自己返屋企

　　　自己打

我：我都係頂硬上架咋！（啊！原來係教我打白血

　　球針既姑娘，我吾認得佢添，因為好耐無見過

　　佢啦！佢好好人架，教我打針時又好細心）

 

 

吊藥吊左５分鐘左右，心跳加速，呼吸困難，心口受壓，仲見頭暈添，即刻叫救命．．．

 

又係ｃａｌｌ醫生

又係要轉床，可以睇清楚個天花板

又係要照心電圖

又係抖一陣可以繼續毒死我

 

 

照心電時，係一個成日同我抽血既姑娘出手．．．　

姑娘：唉！呢部野仲老過我呀！

我：咁都係廿幾年姐！

姑娘：咁我又吾止廿幾歲

 

跟住就左縛右縛，要插好多制同好多電線，仲要係我雙手雙腳縛上連鐵片既膠手帶，仲要箍到好實好實，好鬼痛

最後，醫生都忍吾住要幫手

醫生：嘩！部野上個世紀個噃！

姑娘：新個ｄ去左ｓｔｕｄｉｅｓ個度，鎖住左吾

　　　比人用呀！

醫生：唉！醫管局成日都ｃｕｔ資源，ｃｕｔ左又

　　　吾見會用左係我度噃！

姑娘：都吾見用係我度噃！

我：我都無份，吾知去左邊！

姑娘：你吾洗驚，部機係老爺ｄ，但都係一樣準確架！

我：哦！

 

 

 

拜拜啦！又愛又恨既化療藥！

 

藍豆與我，訣別啦！

 

 

 

 

 

 

 

 

 

病簿四十......最後一針

 

又越過高山又越過谷，

藥煲身體似飛機，

ＱＥ任意飛，

飛出ＱＥ精靈令人地歡喜；

 

讓那個Big Head圓圓Kick緊那頂帽，

隱起了眉矇起光頭腮也脹起，

要shopping靈敏身手快似電光去，

將壞細胞一一消滅好比玩把戲，

行動似蕃薯那樣論盡又傻氣，

Blogger們最友善與你做朋友，

藥煲喜歡你！

 

 

吾識唱呢首歌？

吾好扮細囉

一係就年紀太大，所以無睇過．．．

 

捱下捱下，今日打第八針啦！最後一針啦！咁就足足五個月啦！

 

昨日早上抽血，下午見醫生，安排左腫瘤科療既覆診期１２月１８日，應該已經做完手術出左院啦啩？之後先至再排期做電療，希望快ｄ啦！好心急呀！想快ｄ完成所有療程，重新做人！

 

幾時做手術？１１月２６日見外科醫生後先知，可能會係生日前後做，都好既，重生一次呀！

 

走過化療的日子．．．藥物篇

打化療針有副作用，所以醫生會用藥物去減輕這些副作用；但服用這些藥物又會有不同的副作用．．．

 

Filgrastim 0.5ML～～提升白血球針

吾係個個化療病人都要打既

化療針會令骨髓功能降低，因此白血球會減少，針藥效力過左，白血球就會升返；但有３％既病人既會完全造吾到血，因此要靠提升白血球針去刺激骨髓，幫助提升白血球

醫生會根據病人既體重計算用藥份量，一般由打完化療針第四日開始打，連打七日，約為六千蚊左右；最新既就一劑過打一支，但現時只限私家醫院，政府醫院暫時未有提供

打完之後會有骨痛，嘔吐，發熱，發燒，尿酸増高等副作用

因為係注射形既針藥，所以可以自行在家中注射（姑娘會教你打，教到你好好打為止！）；或到附近賽馬會診所要求姑娘注射，每次收費１７蚊

 

如果自行在家中注射，記緊於完成後要把針筒放入有蓋的水樽內，以免針鋒傷害自己或他人

 

Metoclopramide HCL～～一般既止嘔藥

對我個人黎講就吾算係好得，食左都會嘔幾次，會有ｄ眼瞓，仲會勁出汗　

 

Lorazepam 1MG～～鎮定劑加止嘔　

止嘔藥既加強版，食左個人會攰ｄ，日間都會有睡意，幾好架，但就吾可以食咁多日，一般醫生只會開三至四日　

 

自費止嘔藥　

政府醫生話仲有一隻自費既止嘔藥，靚ｄ既，但因為我食Lorazepam都ＯＫ，所以無食過；好似都吾係好貴，幾百蚊左右啦！

 

Dexamethasone 4MG～～類固醇

又叫肥仔丸，可以防敏感，可以止嘔，仲有鎮靜作用；食左個人會好攰下，仲會水腫，皮膚乾燥，痕癢，所以都係吾可以食咁多日，醫生一般都係會開三至四日左右

　

Lomotil～～止瀉藥　

如果打左化療針後，一個鐘要去一次既，就隨佢啦！但如果一個鐘要去幾次既，就要食啦！當然係去左好多次之後先食啦！因為去得多，表示幫你排左ｄ吾好既野去，但去太多，好辛苦架！

 

Endopain～～必理痛　

止痛退燒，吾好亂咁食，除非好似我咁，知道自己因咩事痛或因咩事發燒

例如發燒，可能係因為白血球太低，但又可能係因為白血球太高，又或者係受到細菌感染，因此最好係睇醫生

 

Zopiclone Tablet 7.5MG～～安眠藥

初級版，一般醫生都會開呢隻

 

Nitrazepam 5MG～～安眠藥　

醫生話呢隻最勁架啦！但對我就作用不大，食左之後成半個鐘都未有睡意，食左個人好暈，成晚起身去洗手間，仲要中下中下咁去

我通常會係打完針第二至四日食，之後既日子盡量吾食，免得依賴左ｄ安眠藥

 

Folic Acid 5MG～～葉酸　　

刺激骨髓，幫助提升白血球，所以食左兩三日會開始骨痛

 

Alprazolam 0.25MG～～鎮靜劑　　

因為我打針後有焦慮不安既反應，所以醫生開鎮靜劑比我；

食左個人攰ｄ，日間都會有睡意，個人會慢左，遲鈍左

 

Famotidine 20MG～～胃藥

跟類固醇或止痛藥一齊食，保護個胃；試過胃痛時食－－－－吾得既，止吾到痛

 

 

初級安眠藥　葉酸　　大路止嘔藥　止瀉藥

 

 

凡係藥都會加重個肝既負擔，所以當ｄ副作用開始無咁嚴重時，我就會盡快停左有關既藥物

 

以上只係個人既小經驗，有問題最好問清楚醫生，因為每個人既反應都吾同架！

有得玩好玩．．．

未病之前，間吾中都會外遊

病左，身體太弱，出吾到外埠

親愛的在我最辛苦既日子，成日都氹我，話好番之後，同我去邊度邊度；而我自己亦都好渴望可以去外地，想去好多好多地方．．．

而家化療去到尾聲啦！反而會為左減少支出而刪減外遊既次數

但係，今日突然有一種想法：呢幾年可能係我收尾個幾年，一旦復發，一不可以外遊，二又有排辛苦，不如找緊時間，想去邊就去邊啦，玩左至算啦－－－－其實我不嬲都係咁，有得食好食，有得玩好玩，未有絕症時都當自己有病咁．．．

好似今年四月咁，明明知道胸部有硬塊，都去埋旅行先去睇醫生．．．

六月時，明明知道有癌症，都去埋台灣先做化療．．．

都係有今生，無來世，玩左至算

 

 

爆粗band友

前幾日睇左呢套戲

 

純情可愛既鄉下仔，為左生計而化身爆粗band友

 

松山研一誇張的演技十分討好

 

 

好搞笑既一幕

 

 

劇情比較適合年青人（好似我咁），所以，吾知啱吾啱你．．．有時間就去捧下場啦！

 

 

 

我的口金包

近期網友們流行自製口金包，個個都造型漂亮可愛，好羨慕佢地有如斯手藝！

 

我應該或者斷估真係吾可能做個口金包出黎，所以都無謂花精神啦！

 

結果，我睇中左一個口金包，但以我呢ｄ婆仔性格，只會睇中，係吾會有行動既

 

睇左幾次，結果，前日．．．

 

親愛的打完機返黎．．．

 

親愛的：依？咩野黎架？

我：．．．（因為在廚房煮緊飯，無聲嗌出廳，所以

　　吾出聲）

親愛的：哦！你衰啦！

我：．．．．．．（開始吾耐煩）

親愛的：你出黎先啦！

我：點呀！（好惡咁行出廳）

親愛的：你又話吾買，點解係度架？

我：吓？

親愛的：鍾吾鍾意呀？

我：你傻左咩？咁貴！買黎做咩喎！（其實開心到

　　爆，但又肉赤到癲呀！）

親愛的：（開始偏嘴）咁你鍾意呀馬！　

我：但係咁貴！（即刻咩上身）

親愛的：所以咪知你吾捨得買囉！

我：有好多隻色架喎．．．

親愛的：可以換色架！

我：咁．．．有無得換返錢架？

親愛的：（偏晒嘴）．．．．．．　

 

 

 

 

 

 

病簿三十九......吾使打白血球針

由於上一針打左三針提升白血球針後已經發燒，所以今針醫生提議可以吾打白血球針試試

 

提升白血球針對我既副作用：

1. 骨痛

2. 嘔

3. 勁出汗

4. 發燒

5. 潮熱

6. 合埋個口有困難

7. 食吾落野

 

無打白血球針之後：

1. 自閉－－－－白血球低，吾敢出街

2. 恢復慢左，精神吾夠

3. 身體吾係幾舒服，感到抵抗力吾夠

4. 遲鈍

今日已經打完第七針既第十日，但就仲有ｄ手痺腳痺，仲係吾係好食到野，個人仲係好遲鈍．．．

昨日切青瓜做早餐時，差ｄ加料－－－－加多一節手指．．．好在而家只係流下血姐，都未見骨！

昨日下午同朋友係黃金海岸食左晏，步出餐廳時，成個仆左係度，條褲差ｄ仆穿，膝頭哥有小小損左．．．個鬼佬仲係度同佢老婆講笑，對象緊係我啦！我祝福佢可以平平安安返老家．．．

 

 

 

 

生活因你們動聽

之前幾日可能受藥物影響，情緒好低落，但係今日就好好多啦！

 

打化療之後，最怕星期六日，因為街上人多，不適宜出街（怕多菌）；而且精神吾係咁好既日子（好似呢幾日咁），就更加不宜或不能出街勒！

 

呢ｄ日子好難捱，成日屈係屋企，個身爭ｄ就出草菇，可以加餸．．．

 

今日，有朋友來我家陪我，還帶上其他人既祝福．．．

 

 

仲有巨峰提子同草莓．．．咁大個女都未食過巨峰．．．可吾可以以形補形呢？

 

 

朋友知道我有睡眠困難，所以特地買左花茶比我，我即晚試左一包，好香好香！

 

 

我地仲一齊造麵粉花．．．

 

 

呢盆係我早幾日造好，送左比人既拙作．．．真係幾拙下，好在友人吾介意．．．

 

而家既生活充實左ｄ，吾洗再捱日子，捱時間，因為我可以：

1. 造麵粉花（好多野造，造吾切添！）

2. 游水

3. 返學校行下，搞下人

4. 假日去朋友家搞搞震

5. 假日朋友來我家陪我

6. 精神ｄ成日週街走

 

都係要多得眾多朋友既關心，幫助，體諒同支持，多謝晒！

走過化療的日子．．．第一針的事前準備

經過四個月既化療，終於都到尾聲啦！

化療係最辛苦架，因此，化療前，最好做小小準備

我第一至四針打ＡＣ針，是出名辛苦的紅魔鬼針，以下是我個人小經驗

 

1. 清潔家居

因為打完化療針，個人既抵抗力會差左，尤其係白血球會跌到好低，若然生活環境吾夠乾淨，便容易受細菌感染，易病難好

2. 準備一ｄ可以食既野

～打第一針時，因為身體未能適應，所以會好辛苦，

　最常見既係嘔吐

～因此，我會預備水果，因為比較容易入口同消化

　－－－西瓜（排毒），車厘子，提子，士多啤利

　（補血），蘋果（正氣ｄ），檸檬，橙，奇怪果

　（酸酸地易入口）

～食麵包都係一個好選擇，無流質食物咁容易嘔

～另外，要預備啱口味既營養補充品，因為食吾到野

　會無營養，個人會好弱，更加吾舒服，幫吾到打仗

　我就選擇左果汁味既

 

3. 安排照顧者

打完針，個人會好無精神，我就連睇電視都睇吾到，因此，最好有人可以係頭四日照顧到你

 

 

4. 剪頭髮

打完第一針之後兩三個星期，ｄ頭髮就會丟，因此宜先剪短，甚至剃光佢

 

5. 配假髮同帽

無左頭髮就緊係要帶假髮或帽啦！

假髮有平有貴，可以自行選擇

夏季宜選一些軟熟疏氣既帽

 

6. 睇牙

因為化療會令白血球同血小板降低，有傷口會好難好，所以如果化療中要整牙會好麻煩，因此最好先檢查牙齒

 

7. 安排化療其間的節目

～提升鬥志，排遣寂寥

～做下手工藝

～學一門語言

～準備幾本有興趣既書

 

仲有．．．未諗到，有無人可以分享下？

 

 

 

 

 

 

十穀

患病後，不少朋友介紹我吃不同的健康食品，由於正值化療期間，要小心飲食，因此要小心選擇

 

其中，我比較有興趣的，是十穀粥

 

早幾年閱讀李碧華的文章，已有提到十穀粥對人的好處，但當時不甚盛行，因此要買齊十種穀物，真的頗為傷腦筋

 

現在有很多現成的十穀米包，但十穀粥要先沈後煮，工序不是不煩覆的，自知無恆心，因此亦未有行動，直至我遇上了．．．．．．

 

粉狀的十穀米麩，可以淨沖，也可以混入豆漿，麥精，好立克，麥皮得飲品食品中

 

朋友們，有興趣的可以試一試啊！我在永安百貨買的，價錢不是太貴，味道也不差呢！

病簿三十八......打針時有反常反應

打針之前一日要抽血同見醫生，睇下身體狀況適吾適合繼續打針

 

醫生：你上次打針時心跳快左喎，返去仲有無心跳呀？

我：ｍ．．．無跳咁快囉！（梗有心跳啦！無心跳咪

　　死得？）

醫生：咁可以繼續打啦！

我：醫生呀！我上次打左三針提升白血球針就發燒

　　啦！所以無打第四枝，今次可吾可以只打三枝

　　呀？

醫生：打三枝同吾打無咩分別架喎，一係就吾好打啦！

我：但係吾打我又驚吾夠數喎！

醫生：吾關事既，但就驚你好似第一次咁發燒囉！

我：吓？（咁大鑊？）

醫生：咁你打左有無吾舒服呀？

我：都係出汗，發燒，嘔吐，骨痛，失眠，合吾埋

　　個口個ｄ囉！

醫生：咁你打吾打呀？

我：博一博，吾打啦！

 

第二日早上打針．．．

 

手背種左豆，準備吊針　

 

 

點知吊左五分針，胸口好似有大石責住咁，呼吸困難！

於是姑娘即刻同我停針，叫我深呼叫，跟手ｃａｌｌ醫生，然後同我轉床（本來坐櫈架！），接駁心電機ｃｈｅｃｋ住我個心跳

醫生黎到，睇左個心電圖，同我做檢查，話可以繼續吊針．．．

五分針之後繼續，雖然都仲有小小吾舒服，但已經比之前好好多啦！

姑娘好細心，ｄ針同我慢慢落，等我無咁辛苦；也因此要多花時間，本來吊一個鐘，變左兩個半鐘！

個人怪，ｄ反應都怪ｄ架！